ସୋନପୁର,୧୧।୨(ନି.ପ୍ର.): ସୁବର୍ଣ୍ଣପୁର ଜିଲା ଯୋଜନା କମିଟିର ବୈଠକ ଜିଲାପାଳଙ୍କ ସମ୍ମିଳନୀ କକ୍ଷରେ ଶୁକ୍ରବାର ଅନୁଷ୍ଠିତ ହୋଇଯାଇଛି । ଜିଲା ଯୋଜନା କମିଟିର ଅଧ୍ୟକ୍ଷ ତଥା ଜଙ୍ଗଲ, ପରିବେଶ ଏବଂ ସୂଚନା ଓ ଲୋକସମ୍ପର୍କ ବିଭାଗ ମନ୍ତ୍ରୀ ପ୍ରଦୀପ କୁମାର ଅମାତ ବୈଠକରେ ଅଧ୍ୟକ୍ଷତା କରିଥିଲେ । ୨୦୨୧-୨୨ ଆର୍ଥତ୍କ ବର୍ଷରେ ବିଜୁ କେବିକେ ଯୋଜନାରେ ୩ କୋଟି ଟଙ୍କାର ୧୨୩ଟି ପ୍ରକଳ୍ପ ଓ ୨୦୨୨-୨୩ ଆର୍ଥତ୍କ ବର୍ଷରେ ବିଜୁ କେବିକେ ଯୋଜନାରେ ୩ କୋଟି ଟଙ୍କାର ୧୩୪ଟି ପ୍ରକଳ୍ପ ପାଇଁ ପ୍ରସ୍ତାବ ଅନୁମୋଦନ ହୋଇଥିଲା । ଗତ ଦୁଇଟି ଆର୍ଥିକ ବର୍ଷରେ ବିଜୁ କେବିକେ ଯୋଜନାରେ ଜିଲାର ମୋଟ ୬ କୋଟି ଟଙ୍କାର ୨୫୭ଟି ପ୍ରକଳ୍ପ ପାଇଁ ବୈଠକରେ ପ୍ରସ୍ତାବ ଅନୁମୋଦନ ହୋଇଥିଲା । ପ୍ରତି ବ୍ଲକକୁ ସମାନ ଭାବେ ୫୦ ଲକ୍ଷ ଟଙ୍କାର ପ୍ରକଳ୍ପ ଦିଆଯାଇଛି । ସେହିପରି କୃଷି, ଉଦ୍ୟାନ କୃଷି, ମୃର୍ତ୍ତିକା ସଂରକ୍ଷଣ, ପ୍ରାଣୀ ସମ୍ପଦ, ମତ୍ସ୍ୟ, ଗ୍ରାମ୍ୟ ଉନ୍ନୟନ, ଜଳସେଚନ ଓ ବନ୍ୟା ନିୟନ୍ତ୍ରଣ, ଶକ୍ତି, ପରିବହନ ଏବଂ ସାମାଜିକ ସେବା ପାଇଁ ୨୦୨୨-୨୩ ଆର୍ଥିକ ବର୍ଷରେ ୨ହଜାର ୩୧୫କୋଟି ୪୨ଲକ୍ଷ ୩୪ ହଜାର ଟଙ୍କାର ଜିଲା ଯୋଜନା ବାର୍ଷିକ ଅଟକଳ ଅନୁମୋଦିତ ହୋଇଥିଲା । କରୋନା ମହାମାରୀ ପାଇଁ ଅନୁମୋଦନ ହୋଇ ପାରି ନ ଥିବା ୨୦୨୦-୨୧ ଆର୍ଥିକ ବର୍ଷରେ ୨ହଜାର ୫୭କୋଟି ୫ଲକ୍ଷ ୫୧ହଜାର ଟଙ୍କାର ଜିଲା ଯୋଜନା ବାର୍ଷିକ ଅଟକଳ ଓ ୨୦୨୧-୨୨ ଆର୍ଥିକ ବର୍ଷରେ ୨ହଜାର ୧୮୮କୋଟି ୮୯ଲକ୍ଷ ୭୬ହଜାର ଟଙ୍କାର ଜିଲା ଯୋଜନା ବାର୍ଷିକ ଅଟକଳ ଅନୁମୋଦିତ ହୋଇଥିଲା । ଏହି ବୈଠକରେ ଅର୍ଥ, ସ୍ବାସ୍ଥ୍ୟ ଓ ପରିବାର କଲ୍ୟାଣ ଏବଂ ସଂସଦୀୟ ବ୍ୟାପାର ମନ୍ତ୍ରୀ ନିରଞ୍ଜନ ପୂଜାରୀ ଯୋଗଦେଇ ଜିଲାର ବାର୍ଷିକ ଯୋଜନା ଓ ଏହାର ସଫଳ ରୂପାୟନ ସମ୍ପର୍କରେ ଆଲୋଚନା କରିଥିଲେ। ଜିଲା ପରିଷଦ ଅଧ୍ୟକ୍ଷା ତଥା ଜିଲା ଯୋଜନା କମିଟି ସଭ୍ୟ ସୁପାର ଠେଲା, ଜିଲାପାଳ ଅବୋଲି ସୁନିଲ ନରଓ୍ବଣେ, ଜିଲା ପରିଷଦ ଉପାଧ୍ୟକ୍ଷ ତଥା କମିଟି ସଭ୍ୟ ଝସକେତନ ବଘାର, ଜିଲା ମୁଖ୍ୟ ଉନ୍ନୟନ ଅଧିକାରୀ ତଥା ମୁଖ୍ୟ କାର୍ଯ୍ୟନିର୍ବାହୀ ଜିଲା ପରିଷଦ ନିହାର ରଞ୍ଜନ କହଁର, ଜିଲା ପରିଷଦ ସଭ୍ୟ ତଥା ଜିଲା ଯୋଜନା କମିଟି ସଭ୍ୟ ବଶିଷ୍ଟ ଭରାସାଗର, ଚନ୍ଦ୍ରକାନ୍ତି ଦନ୍ତା, ମଞ୍ଜୁଶ୍ରୀ ମାଝୀ, ଗଣେଷ ଚନ୍ଦ୍ର ଭୋଇ, ମଧୁସୂଦନ ଓତା, ଅଞ୍ଜଳି କମ୍ପ, ଶକୁନ୍ତଳା ପୃଷ୍ଟି ଓ ବିଜୟଲକ୍ଷ୍ମୀ ତରାଇ, ବନଖଣ୍ଡ ଅଧିକାରୀ ମଦନଲାଲ ଶର୍ମା, ପୂର୍ତ୍ତ ବିଭାଗର ଅଧୀକ୍ଷଣ ଯନ୍ତ୍ରୀ ଇଂ ଦାମୋଦର କୈବର୍ତ୍ତ, ଅତିରିକ୍ତ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡା. ଦୈତ୍ୟ ନାରାୟଣ ପାଢୀ, ଜିଲା ମୁଖ୍ୟ କୃଷି ଅଧିକାରୀ ନାରାୟଣ ଚନ୍ଦ୍ର ସେଠୀ, ତେଲ ଜଳସେଚନ ବିଭାଗର ନିର୍ବାହୀ ଯନ୍ତ୍ରୀ ଇଂ ଜିତେନ୍ଦ୍ର ପାଢୀ ଓ ଗ୍ରାମ୍ୟ ଉନ୍ନୟନ ବିଭାଗର ନିର୍ବାହୀ ଯନ୍ତ୍ରୀ ଇଂ ନରେନ ରେଡ୍ଡି ପ୍ରମୁଖ ଉପସ୍ଥିତ ଥିଲେ ।