ଲଖିମପୁର ଖେରି, ୩୧ା୧୦: ଉତ୍ତରପ୍ରଦେଶର ଦୁଧଓ୍ବା ବ୍ୟାଘ୍ର ସରଂକ୍ଷଣ (ଡିଟିଆର୍)ର ସାଉଥ ଖେରି ଫରେଷ୍ଟ ଡିଭିଜନରେ ବାଘ ଆକ୍ରମଣରେ ଜଣେ ୪୦ ବର୍ଷୀୟ ଯୁବ ଚାଷୀଙ୍କ ମୃତ୍ୟୁ ଘଟିଛି। ଲଖିମପୁର ଖେରି ଜିଲାରେ ଏହାକୁ ମିଶାଇ ଚଳିତ ମାସରେ ମୋଟ ୬ ଜଣ ବାଘ ଆକ୍ରମଣରେ ପ୍ରାଣ ହରାଇଲେଣି। ଚାଷୀ ବୀରପାଲ ମହମଦି ରେଞ୍ଜରେ ଥିବା ଏକ ଆଖୁ କିଆରିକୁ ଯାଇଥିବା ବେଳେ ବାଘ ହାବୁଡ଼ରେ ପଡ଼ିଯାଇଥିଲେ। ତାଙ୍କ ଚିତ୍କାର ଶୁଣି ଆଖପାଖର ଲୋକେ ସେଠାରେ ପହଞ୍ଚିବା ପରେ ବାଘଟି ଜଙ୍ଗଲ ମଧ୍ୟକୁ ପଳାଇଥିଲା। ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲେ ହେଁ ସେଠାରେ ତାଙ୍କର ମୃତ୍ୟୁ ଘଟିଥିଲା। ଦିନକ ପୂର୍ବରୁ ମହମଦି ରେଞ୍ଜରେ ଜଣେ ୩୮ ବର୍ଷୀୟା ମହିଳା ବାଘ ଆକ୍ରମଣର ଶିକାର ହୋଇଥିଲେ। ଏଥିସହ ଏହି ମାସରେ ଜଙ୍ଗଲରେ ଆଉ ୪ ଜଣ କଲରାପତରିଆ ବାଘ ଆକ୍ରମଣରେ ପ୍ରାଣ ହରାଇଛନ୍ତି।