ବୌଦ୍ଧ, ୩୦।୪: ମାଙ୍କଡ ଶିକାର ଅଭିଯୋଗରେ ବୌଦ୍ଧ ବନ ବିଭାଗ ଏକ ଶିକାରୀ ଦଳର ୬ଜଣଙ୍କୁ ଶୁକ୍ରବାର ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ସମ୍ବଲପୁର ଜିଲା ଜମନକିରା ଥାନା କଦଳୀପାଲି ଗ୍ରାମର ଚନ୍ଦ୍ର ହେମ୍ବ୍ରମ, ଜତ୍ରୁ ଲୁଗୁନ, ଦେବସାଙ୍ଗ ଲୁଗୁନ, ସୁନୀଲ ହେମ୍ବ୍ରମ, ସନାରାମ ଗୁଡଲା ଓ ବିଜୁ ଲୁଗୁନ। ଅଭିଯୁକ୍ତଙ୍କଠାରୁ ମାଙ୍କଡ ମାଂସ, ପାପୁଲି ଏବଂ ଗୋଡ ଜବତ କରାଯାଇଛି। ସମସ୍ତ ଅଭିଯୁକ୍ତଙ୍କୁ ଶନିବାର କୋର୍ଟ ଚାଲାଣ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି।
ସମ୍ବଲପୁର ଜିଲା ଜମନକିରା ଥାନା କଦଳୀପାଲି ଗ୍ରାମର ଏହି ଶିକାରୀ ଦଳ ଜଙ୍ଗଲରୁ ଶିଆଳି ଲଇ ସଂଗ୍ରହ କରିବା ବାହାନାରେ ପ୍ରତିଦିନ ଜଙ୍ଗଲରୁ ମାଙ୍କଡ ଶିକାର କରୁଥିଲେ। ଶିକାର କରିବା ପରେ ମାଙ୍କଡ ମାଂସକୁ ଶୁଖାଇବା ସହ ଛାଲ ହାତ ପାପୁଲି ଆଦି ସଂଗ୍ରହ କରୁଥିଲେ। ମାଙ୍କଡିଆ ସମ୍ପ୍ରଦାୟର ଏହି ଶିକାରୀମାନେ ମାଙ୍କଡ ଶିକାର ପରେ ମାଂସକୁ ଶୁଖାଇ ରଖିବା ସହ ବର୍ଷତମାମ ଖାଇଥାନ୍ତି ବୋଲି ତଦନ୍ତ ବେଳେ ଜଣାପଡିଛି। କୌଣସି ସୂତ୍ରରୁ ଖବର ପାଇ ବୌଦ୍ଧ ବନ ବିଭାଗର ଏକ ଟିମ୍ ଶୁକ୍ରବାର ସକାଳୁ ବୌଦ୍ଧ ରେଞ୍ଜ ବଘିଆପଡା ସେକ୍ସନର ଜାମଖୋଲ ସଂରକ୍ଷିତ ଜଙ୍ଗଲ ଅଧୀନ କଡାମୁଣ୍ଡା ଗ୍ରାମ ନିକଟରେ ଅସ୍ଥାୟୀ ଶିବିର ପକାଇଥିବା ଶିକାରୀ ଗ୍ୟାଙ୍ଗ ଉପରେ ଚଢାଉ କରିଥିଲା। ଚଢାଉ ବେଳେ ସେମାନଙ୍କ ନିକଟରୁ ୧୦ କିଲୋ କଞ୍ଚାମାଂସ,୨ କିଲୋ ଶୁଖାମାଂସ, ୨୦ଟି ହାତ ପାପୁଲି, ୨୦ଟି ଗୋଡ, ୨ଟି ଟାଙ୍ଗିଆ ଓ ୧୧୦ କିଲୋ ଶିଆଳି ଲଇ ଜବତ କରାଯାଇଥିଲା। ଜିଲା ବନଖଣ୍ଡ ଅଧିକାରୀ ଯଶୋବନ୍ତ ସେଠୀଙ୍କ ନିର୍ଦ୍ଦେଶ କ୍ରମେ ଏହି ଚଢାଉ ହୋଇଥିଲା।
