ରାୟଗଡା ଅଫିସ,୧୦।୨: ରାୟଗଡ଼ା ପୋଲିସକୁ ଏକ ସଫଳତା ମିଳିଛି । ଗତ ଜାନୁୟାରୀ ୧ ଏବଂ ୬ ତାରିଖ ଓ ୨୦୨୨ ଜୁଲାଇ ୧୬ରେ ହୋଇଥିବା ଚୋରି ମାମଲାରେ ରାୟଗଡା ଟାଉନ ଥାନା ପୋଲିସ ଶୁକ୍ରବାର ଏକ ଡକାୟତ ଗ୍ୟାଙ୍ଗର ୬ ଅଭିଯୁକ୍ତଙ୍କୁ ଗିରଫ କରିଛି। ପୋଲିସ ତାଙ୍କଠାରୁ ୪୮ ହଜାର ଟଙ୍କା, ୨ଟି ବାଇକ୍, ୫ଟି ମୋବାଇଲ ଫୋନ, ୪୯ ଗ୍ରାମ୍ ସୁନା ଜବତ କରିଥିବା ଜିଲା ପୋଲିସ ଅଫିସ କାର୍ଯ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ଟାଉନ ଥାନା ଆଇଆଇସି ରଶ୍ମି ରଞ୍ଜନ ପ୍ରଧାନ ଏହି ସୂଚନା ଦେଇଛନ୍ତି।
ଗିରଫ ଅଭିଯୁକ୍ତମାନେ ହେଲେ ଲକ୍ଷ୍ମୀପୁର ଥାନା ଅଧୀନ ହ୍ରଲେମାଣ୍ଡୁଲୁଗୁଡା ଗ୍ରାମର ସୁଦର୍ଶନ କନ୍ଧପାଣି (୨୪), କାଶୀପୁର ଗ୍ରାମର ଶଙ୍କର ନାୟକ(୨୧), କେସିଂପୁର ଥାନା ଅଞ୍ଚଳର ଯୁଧିଷ୍ଠିର କୌଶଲ୍ୟା(୨୪), ରାୟଗଡା ପାଇକ ସାହିର ବାଣ୍ଡି ଶଙ୍କର ରାଓ (୫୮), ଆନ୍ଧ୍ରପ୍ରଦେଶର ପି.ସୂର୍ଯ୍ୟା ମଣୟମ(୨୯), କୋରାପୁଟ ଜିଲାର ଟିକିରି ସାହିର ମଧୁ ଖରା(୨୯)। ଅନ୍ୟପକ୍ଷେ ପୋଲିସ ତଦନ୍ତ ପରେ ଚୋରି ସମ୍ପର୍କରେ ଅଭିଯୋଗ କରିଥିବା ଜଣେ ବ୍ୟକ୍ତିଙ୍କୁ ତାଙ୍କ ଚୋରି ସୁନା ଫେରାଇଛି।