ଝିଙ୍କପାହାଡ଼ି ସ୍କୁଲର ୬ ଛାତ୍ରୀ ଅସୁସ୍ଥ
10:59 pmAugust 8, 2022August 8, 2022 / 09

ବାଙ୍ଗିରିପୋଷି,୮ା୮(ଡି.ଏନ.ଏ.): ବାଙ୍ଗିରିପୋଷି ବ୍ଲକ ନାଫ୍ରି ପଞ୍ଚାୟତ ଅନ୍ତର୍ଗତ ଝିଙ୍କପାହାଡ଼ି ସରକାରୀ ପ୍ରାଥମିକ ବିଦ୍ୟାଳୟର ୬ ଛାତ୍ରୀ ସୋମବାର ହାଠାତ୍‌ ଅସୁସ୍ଥ ହୋଇ ପଡ଼ିଥିଲେ। ଚିକିତ୍ସାପାଇଁ ସେମାନଙ୍କୁ ବାଙ୍ଗିରିପୋଷି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ସେମାନେ ସୁସ୍ଥ ହୋଇ ଫେରି ଆସିଥିବା ସୂଚନା ମିଳଛି।
ସୂଚନା ଅନୁଯାୟୀ, ଅସୁସ୍ଥ ଛାତ୍ରୀମାନେ ନେତ୍ରାପଟ ଆବାସିକ ବିଦ୍ୟାଳୟ ହଷ୍ଟେଲରେ ରୁହନ୍ତି। ସେଠାରୁ ୯ଟା ବେଳେ ଭାତ ଓ ସୋୟାବିନ ତରକାରୀ ଭୋଜନ କରି ଝିଙ୍କପାହାଡ଼ି ପ୍ରାଥମିକ ବିଦ୍ୟାଳୟକୁ ଅଧ୍ୟୟନ ପାଇଁ ଆସିଥିଲେ। ମଧ୍ୟାହ୍ନ ସମୟରେ ୬ଜଣ ଛାତ୍ରୀ ବାନ୍ତି କରିବା ସହ ଅସୁସ୍ଥ ହୋଇ ପଡ଼ିଥିଲେ। ବିଦ୍ୟାଳୟର ପ୍ରଧାନ ଶିକ୍ଷକ କୁଳଦା ବେହେରା ଓ ସହକାରୀ ଶିକ୍ଷୟିତ୍ରୀ ସରସ୍ବତୀ ସୋରେନ ଅଧ୍ୟୟନରତ ମୋଟ ୬୬ଜଣ ଛାତ୍ରୀଛାତ୍ରଙ୍କୁ ବାଙ୍ଗିରିପୋଷି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ୩ଟି ଗାଡ଼ିରେ ନେଇ ଆସିଥିଲେ। ପ୍ରାଥମିକ ଚିକିତ୍ସା ପରେ ସୁସ୍ଥ ଅନୁଭବ କରିବାରୁ ଡାକ୍ତର ସେମାନଙ୍କୁ ବିପଦମୁକ୍ତ ବୋଲି କହି ଡାକ୍ତରଖାନାରୁ ଛାଡ଼ି ଦେଇଥିଲେ। ତେବେ କେଉଁ କାରଣରୁ ଛାତ୍ରୀମାନେ ଅସୁସ୍ଥ ହୋଇପଡ଼ିଲେ ତାହା ସ୍ପଷ୍ଟ ହୋଇନି।