ଭୁବନେଶ୍ୱର,୨୧।୩(ସ୍ପୋର୍ଟ୍ସ ବ୍ୟୁରୋ): ସୁରଟରେ ଚାଲିଥିବା ମହିଳା ସିନିୟର ଦିନିକିଆ ଟ୍ରଫିରେ ଶନିବାର ଓଡ଼ିଶା ୬ ଉଇକେଟରେ ଘରୋଇ ଗୁଜରାଟକୁ ସହଜରେ ପରାସ୍ତ କରିଛି। ସୁରଟର ଖୋଲଭାଡ ଜିମ୍ଖାନ୍ନା ଗ୍ରାଉଣ୍ଡରେ ଖେଳାଯାଇଥିବା ଏହି ଲୋ ସ୍କୋରିଂ ମ୍ୟାଚ୍ରେ ଟସ୍ ଜିତି ଓଡ଼ିଶା ଫିଲ୍ଡିଂ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ଗୁଜରାଟ ୨୯.୨ ଓଭରରେ ୭୦ ରନକରି ଅଲଆଉଟ ହୋଇଥିଲା। ଜବାବରେ ଓଡ଼ିଶା ବ୍ୟାଟିଂ କରି ୨୩ ଓଭରରେ ୪ ଉଇକେଟ ହରାଇ ବିଜୟ ଲକ୍ଷ୍ୟ ହାସଲ କରି ନେଇଥିଲା। ଏଥିସହ ଓଡ଼ିଶା ଟୁର୍ନାମେଣ୍ଟର ଏଲିଟ୍ ଗ୍ରୁପ୍ ଏ’ରେ ୫ଟି ମ୍ୟାଚ୍ ଖେଳି ୪ଟିରେ ବିଜୟୀ ହୋଇ ମୋଟ୍ ୧୬ ପଏଣ୍ଟ ହାସଲ କରିବା ସହ ଦ୍ୱିତୀୟ ସ୍ଥାନରେ ରହିିଛି।
ଓଡ଼ିଶା ତରଫରୁ ବ୍ୟାଟିଂରେ ସୁଶ୍ରୀ ଦିବ୍ୟଦର୍ଶନୀ ୩୫ଟି ବଲ୍ ଖେଳି ୩୪ ରନକରି ଅପରାଜିତ ରହିଥିଲେ। ସେହିପରି ସରିତା ମେହେର ୫୩ ବଲରୁ ୧୫, ଅଞ୍ଜଳି ସିଂ ୪୨ ବଲରୁ ୧୫ ରନ ସଂଗ୍ରହ କରିଥିଲେ। ବୋଲିଂରେ ଗୁଜରାଟ ତରଫରୁ ମୁସ୍କାନ ଭାସଭା ଓ ରେଣୁକା ଚୌଧୁରୀ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ। ପ୍ରଥମେ ବ୍ୟାଟିଂ କରିଥିବା ଗୁଜରାଟ ତରଫରୁ ସିମରନ ୧୭, ଭାବନା ଗୋପ୍ଲ୍ାନି ୧୪, ମନାଲି ବାଘେଲା ୧୧ ରନ ସଂଗ୍ରହ କରିଥିଲେ। ଓଡ଼ିଶା ତରଫରୁ ବୋଲିଂରେ ରାମେଶ୍ୱରୀ ନାଏକ ସର୍ବାଧିକ ୬ ଉଇକେଟ ଅକ୍ତିଆର କରି ଗୁଜରାଟର ବିପର୍ଯ୍ୟୟ ଘଟାଇଥିଲେ। ସେହିପରି ସୁଜାତା ମଲିକ ୨ ଉଇକେଟ ଅକ୍ତିଆର କରିଥିବା ବେଳେ ପ୍ରିୟଙ୍କା ପ୍ରିୟଦର୍ଶନୀ ଓ ସୁଶ୍ରୀ ଦିବ୍ୟଦର୍ଶନୀ ଗୋଟିଏ ଲେଖାଏ ଉଇକେଟ ହାସଲ କରିଥିଲେ।
ସଂକ୍ଷିପ୍ତ ସ୍କୋର:
ଗୁଜରାଟ ୨୯.୨ ଓଭରରେ ୭୦, ଅଲଆଉଟ
(ସିମରନ- ୧୭, ଭାବନା- ୧୪, ମନାଲି- ୧୧, ରାମେଶ୍ୱରୀ- ୬/୨୬, ସୁଜାତା- ୨/୨୩, ପ୍ରିୟଙ୍କା- ୧/୨, ସୁଶ୍ରୀ- ୧/୬)।
ଓଡ଼ିଶା ୨୩ ଓଭରରେ ୭୪/୪
(ସୁଶ୍ରୀ- ୩୪*, ସରିତା- ୧୫, ଅଞ୍ଜଳି- ୧୫, ମୁସ୍କାନ ୨/୭, ରେଣୁକା- ୨/୨୧)।