ୱାଶିଂଟନ: ବହୁତ ଲୋକ ନିଜ ଘରେ ଗୃହପାଳିତ ପ୍ରାଣୀ(ପେଟ୍)ଙ୍କୁ ରଖିଥାନ୍ତି। ସେମାନେ ପ୍ରାଣୀଙ୍କୁ ଏତେ ଭଲ ପାଆନ୍ତି ଯେ, ତାଙ୍କ ପାଇଁ ସବୁ କିଛି କରିବାକୁ ପ୍ରସ୍ତୁତ ଥା’ନ୍ତି। ହେଲେ ଅନେକ ସମୟରେ ସେମାନେ ତାଙ୍କ ପେଟ୍ଙ୍କ ଭାଷା ବୁଝିବାରେ ସକ୍ଷମ ହୋଇ ନ ଥା’ନ୍ତି। ତେବେ ଏପରି କିଛି ଲୋକ ଅଛନ୍ତି, ଯେଉଁମାନଙ୍କ ପାଖରେ ପ୍ରାଣୀଙ୍କ ଭାଷା ବୁଝିପାରିବାର କଳା ରହିଥାଏ। ଆମେରିକାର ଜଣେ ମହିଳାଙ୍କ ପାଖରେ ମଧ୍ୟ ଏପରି ଅସାଧାରଣ କଳା ରହିଛି; ଯାହା ତାଙ୍କୁ ପ୍ରସିଦ୍ଧ କରୁଛି। ଜଣେ ଓକିଲ ଥିବା ୩୩ ବର୍ଷୀୟା ନିକି ଭାସ୍କୋନେଜ୍ଙ୍କୁ ଲୋକେ ଏବେ ପ୍ରାଣୀଙ୍କ ପ୍ରଫେଶନାଲ ଥେରାପିଷ୍ଟ ମାନୁଛନ୍ତି। ପ୍ରାଣୀ ମନୋବୈଜ୍ଞାନିକଙ୍କ ପ୍ରତି ସେ ତାଙ୍କର ଏକ କ୍ୟାରିୟର ଆରମ୍ଭ କରିଦେଇଛନ୍ତି। ଏବେ ସେ ସେଥିପାଇଁ ଅଧିକ ପ୍ରସିଦ୍ଧ ହୋଇଛନ୍ତି। ନିକିଙ୍କ ଓକିଲାତି ପାଇଁ ତାଙ୍କୁ ପ୍ରାୟ ୬୨ ଲକ୍ଷ ଟଙ୍କା ମିଳୁଥିଲା। ନିକି ଏହା ମଧ୍ୟରେ ନିଜକୁ ପ୍ରାଣୀଙ୍କ ମନୋବିଜ୍ଞାନ ପଢ଼ିବାକୁ ଟ୍ରେନ କରିଛନ୍ତି। ଏହାପରେ ତାଙ୍କୁ ଏହି କାମରେ ଏତେ ମଜା ଲାଗିଲା ଯେ, ସେ ନିଜ ଚାକିରି ଛାଡ଼ିଦେଲେ ଏବଂ ଏକ ଥେରାପି କ୍ଲିନିକ୍ ଖୋଲିଦେଲେ। ୨୦୨୦ ସେପ୍ଟେମ୍ବରରେ ସେ ତାଙ୍କ ସ୍ବପ୍ନର ଚାକିରି ଆରମ୍ଭ କରିଥିଲେ। ତାଙ୍କୁ ଏଥିରେ ବହୁତ ଶୀଘ୍ର ସଫଳତା ମଧ୍ୟ ମିଳିଗଲା। ରିପୋର୍ଟ ମୁତାବକ, ନିକି ତାଙ୍କ ଏହି ନୂଆ ଚାକିରିରେ ବହୁତ ଖୁସି ଅଛନ୍ତି। ସେ କହିଛନ୍ତି, ଆଗରୁ ତାଙ୍କୁ ଏହି କାମ ଓକିଲାତି ସହିତ କରିବାକୁ ପଡୁଥିଲା। ହେଲେ ଏବେ ସେ କେବଳ ଏହି କାମ କରୁଛନ୍ତି। ଏଥିପାଇଁ ତାଙ୍କୁ ମଧ୍ୟ ଅଧିକ ଡକରା ଆସୁଛି। ତାଙ୍କ ଥେରାପି ପାଇଁ ସେ ୨୭ ହଜାର ଟଙ୍କା ଡିମାଣ୍ଡ କରିଥାନ୍ତି। ସେ ତାଙ୍କର ଏହି କାମର ଆରମ୍ଭ ନିଜ ପେଟ୍ ଏବଂ ଅଜଣା ପ୍ରାଣୀଙ୍କଠାରୁ କରିଥିଲେ। ଏହାପରେ ସେ ଏଥିରେ ପ୍ରଫେଶନାଲ ଲେଭଲରେ କାମ କରିବାକୁ ଆରମ୍ଭ କଲେ।
