ଭୁବନେଶ୍ୱର, ୭।୯(ବ୍ୟୁରୋ): ଓଡ଼ିଶାରେ ପ୍ରଥମ ଡୋଜ୍ ଟିକାକରଣ ୬୦% ରହିଛି। ତେବେ ଦେଶରେ ପ୍ରଥମ ରାଜ୍ୟ ଭାବେ ହିମାଚଳ ପ୍ରଦେଶ ଯୋଗ୍ୟ ହିତାଧିକାରଙ୍କୁ ଶତ ପ୍ରତିଶତ ଟିକାକରଣ କରିବାରେ ସଫଳତା ହାସଲ କରିଛି। ଏଥିପାଇଁ ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉକ୍ତ ରାଜ୍ୟକୁ ପ୍ରଶଂସା କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, ହିମାଚଳ ପ୍ରଦେଶର ଯୋଗ୍ୟ ହିତାଧିକାରୀ ଶତପ୍ରତିଶତ ପ୍ରଥମ ଡୋଜ୍ ଓ ଏକ ତୃତୀୟାଂଶ ଦ୍ୱିତୀୟ ଡୋଜ୍ ଟିକା ନେଇଛନ୍ତି। ଏହା ମୋତେ ଗର୍ବିତ କରିବାର ସୁଯୋଗ ଦେଇଛି। ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ସୂଚନାନୁସାରେ, ୮୫%ରୁ ଅଧିକ ଟିକାକରଣ ହାସଲ କରିଥିବା ରାଜ୍ୟ ଏବଂ କେନ୍ଦ୍ରାଞ୍ଚଳ ମଧ୍ୟରେ ତ୍ରିପୁରା ୮୯%, ଲଦାଖ ୮୮%, ଦାମନ ଏବଂ ଡିୟୁ ୮୮%, ଲାକ୍ଷାଦୀପ ୮୮% ଏବଂ ମିଜୋରାମ ୮୫% ରହିଛି। ଓଡ଼ିଶାରେ ଯୋଗ୍ୟ ହିତାଧିକାରୀଙ୍କୁ ଶତପ୍ରତିଶତ ଟିକାକରଣ ପାଇଁ ୬କୋଟି ଡୋଜ୍ ଆବଶ୍ୟକ କରୁଥିବା ବେଳେ ଏ ପର୍ଯ୍ୟନ୍ତ ୨.୩୯ କୋଟି ଡୋଜ୍ ଟିକାକରଣ ହୋଇଛି। ଏଥିରେ ପ୍ରଥମ ଡୋଜ୍ ଟିକାକରଣ ୧,୮୦,୪୫,୪୦୧ ହୋଇଛି, ଯାହାକି ୬୦%ରୁ ଅଧିକ। ସେହିଭଳି ୧୯.୭% ଅର୍ଥାତ୍ ୫୯,୧୧,୦୮୨ ଲୋକଙ୍କୁ ସମ୍ପୂର୍ଣ୍ଣ ଟିକାକରଣ କରାଯାଇଥିବା ମନ୍ତ୍ରଣାଳୟ ତଥ୍ୟରୁ ଜଣାପଡିଛି।
ଏପଟେ ରାଜ୍ୟରେ ଟିକାକରଣ ସ୍ଥିତି ନେଇ ପରିବାର କଲ୍ୟାଣ ନିର୍ଦ୍ଦେଶକ ତଥା ରାଜ୍ୟ ଟିକାକରଣ ନୋଡାଲ ଅଫିସର ଡା. ବିଜୟ ପାଣିଗ୍ରାହୀ କହିଛନ୍ତି, ଏ ଯାଏ ୧ ଲକ୍ଷ୧୪ ହଜାର ଗର୍ଭବତୀଙ୍କୁ ଟିକା ଦିଆହୋଇଛି। କିଛି ପାର୍ଶ୍ୱ ପ୍ରତିକ୍ରିୟା ନାହିଁ। ପାଖାପାଖି ୩୩ ଲକ୍ଷ ଟିକା ମହଜୁଦ ଅଛି। ଏଥିମଧ୍ୟରୁ ୩୧ ଲକ୍ଷ ୫୯ ହଜାର ୨୬୦ କୋଭିଶିଲ୍ଡ ଓ ୨ ଲକ୍ଷ ୬୫ ହଜାର ୫୨୦ ଡୋଜ୍ କୋଭାକ୍ସିନ ରହିଛି। ନିୟମିତ ଭାବେ ଟିକା ଆସୁଛି ଓ ଟିକାକରଣ ଚାଲିଛି। ନକଲି କୋଭିଶିଲ୍ଡ ନେଇ କେନ୍ଦ୍ର ସରକାର ଚିଠି କରି ସତର୍କ କରିଥିଲେ। ହେଲେ ଏ ଯାଏ ଓଡ଼ିଶାରେ ନକଲି ଟିକା ଦୃଷ୍ଟିକୁ ଆସିନାହିଁ। ଟିକା ନେବା ପାଇଁ ଆଗ୍ରହ ଲୋକଙ୍କ ଭିତରେ ଅଛି। କିନ୍ତୁ ଟିକାକରଣ କେନ୍ଦ୍ରରେ ଗହଳି ନ କରି ଠିକ୍ ସମୟରେ ଆସନ୍ତୁ। ରାତି ତମାମ ଅପେକ୍ଷା କରିବାର ଆବଶ୍ୟକତା ନାହିଁ। କିଛି ସ୍ଥାନରେ ଗହଳି ନିୟନ୍ତ୍ରଣ କରିବାକୁ ଟୋକନ ବ୍ୟବସ୍ଥା ହୋଇଛି। ହେଲେ ସେଠାରେ ବି ଗହଳି ଦେଖିବାକୁ ମିଳୁଛି। ଭୁବନେଶ୍ୱରରେ ୧୭ ଲକ୍ଷ ଡୋଜ୍ ଟାର୍ଗେଟ ଥିଲା। ବାହାର ଲୋକ ଏଠାରେ ଆସିବାରୁ ଏବେ ଟିକାକରଣ ୨୨ ଲକ୍ଷ ଡୋଜ୍ରେ ପହଞ୍ଚତ୍ଥିବା ପରିବାର କଲ୍ୟାଣ ନିର୍ଦ୍ଦେଶକ ସୂଚନା ଦେଇଛନ୍ତି।