ନୂଆଦିଲ୍ଲୀ,୨୦।୧୨ : ପୁଣିଥରେ ଭାରତରେ କରୋନା ଭାଇରସ ସଂକ୍ରମଣ ରୋଗ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ କେରଳରେ ତିନି ଜଣଙ୍କ ମୃତ୍ୟୁ ସହିତ ସାରା ଦେଶରେ ମୃତ୍ୟୁ ସଂଖ୍ୟା ୫,୩୩,୩୨୧କୁ ବୃଦ୍ଧି ପାଇଛି ।
ଭାରତରେ ୬୧୪ ନୂତନ କରୋନା ଭାଇରସ ମାମଲା ରେକର୍ଡ କରାଯାଇଛି। ଯାହା ମେ ୨୧ ଠାରୁ ସର୍ବାଧିକ ରହିଛି। ଏହା ସହିତ ସକ୍ରିୟ ମାମଲା ୨,୩୧୧ କୁ ବୃଦ୍ଧି ପାଇଛି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟରେ କୁହାଯାଇଛି ଦେଶରେ କରୋନା ମାମଲା ବର୍ତ୍ତମାନ ସାଢ଼େ ୪ କୋଟିକୁ ବୃଦ୍ଧି ପାଇଛି।
କରୋନା ଭାଇରସରୁ ସୁସ୍ଥ ହେଉଥିବା ରୋଗୀଙ୍କ ସଂଖ୍ୟା ବର୍ତ୍ତମାନ ୪,୪୪,୭୦,୩୪୬ କୁ ବୃଦ୍ଧି ପାଇଛି। ଜାତୀୟ ସୁସ୍ଥତା ହାର ୯୮.୮୧ ପ୍ରତିଶତରେ ପହଞ୍ଚିଛି। ମୃତ୍ୟୁ ହାର ବର୍ତ୍ତମାନ ୧.୧୯ ପ୍ରତିଶତ ରହିଛି। ସ୍ବାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ସମଗ୍ର ଦେଶରେ ୨୨୦.୬୭ ଡୋଜ କୋଭିଡ ଟିକା ଦିଆଯାଇଛି।
କରୋନା ଭାଇରସ ସଂକ୍ରମଣ ଯୋଗୁ ପୁଣି ସରକାରଙ୍କ ଚିନ୍ତା ବଢ଼ିବାରେ ଲାଗିଛି। ୨୪ ଘଣ୍ଟାରେ କେରଳରେ ୨୯୨ ଜଣ ଆକ୍ରାନ୍ତଙ୍କୁ ଚିହ୍ନଟ କରାଯାଇଛି। ଏହା ସହିତ କେରଳରେ ସକ୍ରିୟ ମାମଲା ସଂଖ୍ୟା ୨୦୪୧ କୁ ବୃଦ୍ଧି ପାଇଛି। ୩ ଜଣଙ୍କ ମୃତ୍ୟୁ ସହିତ,ଗତ ତିନି ବର୍ଷ ମଧ୍ୟରେ କେରଳରେ କରୋନା ଭାଇରସ କାରଣରୁ ମୃତ୍ୟୁ ସଂଖ୍ୟା ବର୍ତ୍ତମାନ ୭୨,୦୭୬ କୁ ବୃଦ୍ଧି ପାଇଛି।
ଗତ ୨୪ ଘଣ୍ଟା ମଧ୍ୟରେ ୨୨୪ ଜଣ ଆକ୍ରାନ୍ତ ସୁସ୍ଥ ହୋଇଛନ୍ତି। ବର୍ତ୍ତମାନ ପର୍ଯ୍ୟନ୍ତ କରୋନା ଆକ୍ରାନ୍ତଙ୍କ ମାମଲା ୬୮,୩୭, ୨୦୩କୁ ବୃଦ୍ଧି ପାଇଛି। କେରଳ ସ୍ବାସ୍ଥ୍ୟମନ୍ତ୍ରୀ ଭୀନା ଜର୍ଜ କହିଛନ୍ତି କେରଳରେ ବଢୁଥିବା କରୋନା ମାମଲାରେ ଚିନ୍ତା କରିବାର କୌଣସି ଆବଶ୍ୟକତା ନାହିଁ, କାରଣ ଏହି ସଂକ୍ରମଣ ସହ ମୁକାବିଲା ପାଇଁ ରାଜ୍ୟ ସମ୍ପୂର୍ଣ୍ଣ ପ୍ରସ୍ତୁତ।
ରାଜ୍ୟର ଆକ୍ରାନ୍ତଙ୍କ ପାଇଁ ବିଶେଷ ସୁବିଧା ଯୋଗାଇବା ଏବଂ ଡାକ୍ତରଖାନାରେ ଆଇସୋଲେଶନ ୱାର୍ଡ, ଅମ୍ଳଜାନ ଶଯ୍ୟା, ଆଇସିୟୁ ବେଡ ଏବଂ ଭେଣ୍ଟିଲେଟର ଉପଲବ୍ଧତା ନିଶ୍ଚିତ କରିବାକୁ ସେ ନିର୍ଦ୍ଦେଶ ଦେଇଛନ୍ତିି।
କରୋନା ରୋଗର ବୃଦ୍ଧି ଏବଂ ଶ୍ୱାସ ସମସ୍ୟାରେ ପୀଡିତ ଲୋକଙ୍କ ସଂଖ୍ୟାକୁ ଦୃଷ୍ଟିରେ ରଖି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ବୁଧବାର ରାଜ୍ୟ ଅଧିକାରୀମାନଙ୍କ ସହ ଏକ ଉଚ୍ଚ ସ୍ତରୀୟ ସମୀକ୍ଷା ବୈଠକ କରିଛନ୍ତି। ଏହି ବୈଠକରେ ସ୍ବାସ୍ଥ୍ୟମନ୍ତ୍ରୀ ଏବଂ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ଅଧିକାରୀମାନେ ଯୋଗ ଦେଇଥିଲେ। ଏହି ସମୟରେ ସ୍ବାସ୍ଥ୍ୟ ସୁବିଧା ଏବଂ ପ୍ରସ୍ତୁତି ତଥା ସଂକ୍ରମଣକୁ ରୋକିବା ପାଇଁ ପଦକ୍ଷେପ ଉପରେ ଆଲୋଚନା କରାଯାଇଥିଲା।