ବାରିପଦା ଅଫିସ,୧ା୬: ମୟୂରଭଞ୍ଜ ଜିଲାରେ ହେବାକୁ ଥିବା ସମବାୟ ନିର୍ବାଚନ-୨୦୨୨ର ପ୍ରଥମ ପର୍ଯ୍ୟାୟ ନାମାଙ୍କନ ପତ୍ର ଦାଖଲ ୩୧ ତାରିଖରେ ଶେଷ ହୋଇଛି। ଚଳିତ ୧୯ ଓ ୨୬ ତାରିଖରେ ୨ଟି ପର୍ଯ୍ୟାୟରେ ଏହି ନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ ଜିଲାର ମୋଟ ୧୯୪ରୁ ୧୯୩ଟି ସମବାୟ ସମିତିରେ ନିର୍ବାଚନ ହେବାକୁ ଯାଉଛି।
ପ୍ରଥମ ପର୍ଯ୍ୟାୟ ଅର୍ଥାତ ଜୁନ୍ ୧୯ରେ ୧୦୩ଟି ଓ ୨ୟ ପର୍ଯ୍ୟାୟରେ ୯୦ଟି ସେବା ସମବାୟ ସମିତି ଲାଗି ନିର୍ବାଚନ ହେବ। ମୟୂରଭଞ୍ଜ ସମବାୟ ନିର୍ବାଚନ ଅଧିକାରୀ ତଥା ଜିଲା ନିବନ୍ଧକ ସମବାୟ ସମିତି ସମୂହଙ୍କ କାର୍ଯ୍ୟାଳୟ ପକ୍ଷରୁ ପ୍ରଥମ ପର୍ଯ୍ୟାୟ ନିର୍ବାଚନ ଲାଗି ଗତ ୨୭ ତାରିଖରେ ଚୂଡ଼ାନ୍ତ ଭୋଟର ତାଲିକା ପ୍ରକାଶ ପାଇଛି। ପରେ ୩୦ ଓ ୩୧ ତାରିଖ ୨ଦିନ ନାମାନଙ୍କନ ପତ୍ର ଦାଖଲ କାର୍ଯ୍ୟ ଶେଷ ହୋଇଛି। ନିର୍ବାଚନ ହେବାକୁ ଥିବା ୫୧ଟି ଲ୍ୟାମ୍ପସରୁ ପ୍ରଥମ ପର୍ଯ୍ୟାୟରେ ୨୮ଟି ଲ୍ୟାମ୍ପସରେ ନିର୍ବାଚନ ଅନୁଷ୍ଠିତ ହେବ। ପ୍ରତ୍ୟେକରେ ୧୫ଜଣ ପରିଚାଳନା ସଦସ୍ୟାସଦସ୍ୟ ପଦବୀ ପାଇଁ ନିର୍ବାଚନ ହେବାକୁ ଥିବା ବେଳେ ମୋଟ ୪୨୦ ପଦବୀ ପାଇଁ ୬୨୭ଜଣ ନାମାନଙ୍କନ ପତ୍ର ଦାଖଲ କରିଛନ୍ତି। ଜିଲାର ଉଦଳା ଲ୍ୟାମ୍ପସରେ ସର୍ବାଧିକ ୪୯ଟି ନାମାନଙ୍କନ ପତ୍ର ଦାଖଲ ହୋଇଥିବା ବେଳେ ରାଇରଙ୍ଗପୁର ଲ୍ୟାମ୍ପସରେ ସର୍ବନିମ୍ନ ୭ଜଣ ନାମାନଙ୍କନ ପତ୍ର ଦାଖଲ କରିଛନ୍ତି।
