କଟକ ଅଫିସ,୨୮ା୫: ଦିନକୁ ଦିନ ନୂଆ ନୂଆ ତରିକାରେ ଠକେଇ ହେଉଛି। ଯାହାର ଶିକାର ହେଉଛନ୍ତି ବଡ଼ ବଡ଼ ବ୍ୟବସାୟୀ। ଖାଇବା ତେଲ ବ୍ୟବସାୟ ନଁାରେ ୬୩.୯୪ ଲକ୍ଷ ଟଙ୍କାର ଠକେଇ ହୋଇଛି। ବିହାର-ଓଡ଼ିଶା ଆନ୍ତଃରାଜ୍ୟ ଠକ ଏଭଳି କାରବାରରେ କାର୍ପଟ୍ଦାର ସାଜିଛନ୍ତି। ଏଭଳି ଏକ ଠକେଇ ଘଟଣାରେ ବିଡ଼ାନାସୀ ପୋଲିସ ଜଣେ ଅଭିଯୁକ୍ତଙ୍କୁ କୋଲ୍କାତାରୁ ଗିରଫ କରିଛି। ଏଥିରେ ସମ୍ପୃକ୍ତ ଅନ୍ୟ ଅଭିଯୁକ୍ତ ଫେରାର ଥିବାବେଳେ ପୋଲିସ ସେମାନଙ୍କୁ ଧରିବାକୁ ଯୋଜନା ପ୍ରସ୍ତୁତ କରୁଛି।
ପୋଲିସ ସୂଚନା ଅନୁଯାୟୀ, ବିଡ଼ାନାସୀ ଥାନା ଅନ୍ତର୍ଗତ ଶତାବ୍ଦୀ ବିହାର ଅଞ୍ଚଳର ବିଶ୍ୱରଞ୍ଜନ ସେଠୀଙ୍କର ଖାଇବା ତେଲ କମ୍ପାନୀ ରହିଛି। ସୁବାସ ଚନ୍ଦ୍ର ଦାଶ ଓ ଶିତିକଣ୍ଠ ମହାନ୍ତି ନାମକ ୨ ଜଣ ବ୍ୟକ୍ତି ୨୦୨୨ ଜାନୁୟାରୀରେ ବିଶ୍ୱରଞ୍ଜନଙ୍କ ନିକଟକୁ ଆସି ଏକ କମ୍ପାନୀର ଓଡ଼ିଶା ରିଜିଅନ୍ ମାର୍କେଟିଂ ମ୍ୟାନେଜର ଭାବେ ନିଜର ପରିଚୟ ଦେଇଥିଲେ। ସେମାନଙ୍କ କମ୍ପାନୀ ନିକଟରୁ ପାମ୍ ତେଲ କିଣିବା ପାଇଁ ସେମାନେ ବିଶ୍ୱରଞ୍ଜନଙ୍କୁ କହିଥିଲେ। ପରବର୍ତ୍ତୀ ସମୟରେ ଉକ୍ତ କମ୍ପାନୀର ନିର୍ଦ୍ଦେଶକ ସତ୍ୟପ୍ରକାଶ ସିଂହ ଓ ପରିଚାଳନା ନିର୍ଦ୍ଦେଶିକା ସୀମା ସିଂହ ତାଙ୍କ ଘରକୁ ଆସି କମ୍ପାନୀରୁ ତେଲ କିଣି ବ୍ୟବସାୟ କରିବାକୁ କହିଥିଲେ। ବିଶ୍ୱରଞ୍ଜନ ଏଥିରେ ସହମତି ପ୍ରକାଶ କରିବା ପରେ ତାଙ୍କ କମ୍ପାନୀର ବିହାରରେ ଥିବା ଉକ୍ତ କମ୍ପାନୀ ସହ ୨୦୨୨ ମାର୍ଚ୍ଚ ୨୩ରେ ଏକ ଚୁକ୍ତିନାମା ହୋଇଥିଲା। ପରେ ବିଶ୍ୱରଞ୍ଜନ ଅପରପକ୍ଷ ଆକାଉଣ୍ଟରେ ୯୬ ଲକ୍ଷ ଟଙ୍କା ଜମା କରିଥିଲେ। ମାତ୍ର ଉକ୍ତ କମ୍ପାନୀ ୫୦ ଲକ୍ଷ ଟଙ୍କାର ପାମ୍ ତେଲ ଯୋଗାଇଥିଲା, ଯାହାକି ବଜାର ଦରଠାରୁ ବହୁ ଉଚ୍ଚା ଦରରେ। ହେଲେ ସୁବାସ ଲିଖିତ ଭାବେ ଏହି କ୍ଷତି ଅବଶିଷ୍ଟ ୪୬ ଲକ୍ଷ ଟଙ୍କାର ତେଲ ଦେବାବେଳେ ଭରଣା କରିଦେବେ ବୋଲି କହିଥିଲେ। ଦୀର୍ଘଦିନ ପରେ ସୁବାସ ୯୧୮ ଟିଣ ପାମ୍ ତେଲ ଧରି ପହଞ୍ଚିଥିଲେ, ଯାହାର ମୂଲ୍ୟ ୧୭ ଲକ୍ଷ ୪୪ ହଜାର ୨୦୦ ଟଙ୍କା ହେବ। ସେହି ତେଲକୁ ବଜାରରେ ବିକ୍ରି କରିବା ପାଇଁ ସେ ପୁଣି ବିଶ୍ୱରଞ୍ଜନଙ୍କଠାରୁ ନେଇଗଲେ। ଏଥିସହ ୫୦ ହଜାର ଟଙ୍କା ମଧ୍ୟ ନଗଦ ଆକାରରେ ନେଇଗଲେ। ହେଲେ କୌଣସି ପଇସା ଦେଲେନାହିଁ। ୨୦୨୨ ଅକ୍ଟୋବର ୧୧ରେ ବିଶ୍ୱରଞ୍ଜନ ରାଞ୍ଚି ଅଫିସକୁ ଯାଇ ସତ୍ୟପ୍ରକାଶଙ୍କୁ କହିବା ପରେ ସେ ତାଙ୍କୁ ଗାଳିଗୁଲଜ କରିବା ସହ ମାରିଦେବାକୁ ଧମକ ଦେଇଥିଲେ। ସେ ବିଶ୍ୱରଞ୍ଜନଙ୍କଠାରୁ ମୋଟ ୬୩ ଲକ୍ଷ ୯୪ ହଜାର ଟଙ୍କା ଠକି ନେଇଥିଲେ। ଏ ନେଇ ବିଶ୍ୱରଞ୍ଜନ ଅଭିଯୋଗ କରିବା ପରେ ପୋଲିସ ଏକ ମାମଲା(ନଂ.୨୦୩/୨୩) ରୁଜୁ କରିଥିଲା। ପରେ କୋଲ୍କାତାରୁ ସତ୍ୟପ୍ରକାଶଙ୍କୁ ଗିରଫ କରି ସେଠାକାର କୋର୍ଟରେ ହାଜର କରାଇଥିଲା। ସେଠାରୁ ରିମାଣ୍ଡରେ ଓଡ଼ିଶା ଆଣିବା ପରେ ଶନିବାର କଟକସ୍ଥିତ ଅଦାଲତାରେ ହାଜର କରାଇଛି। ଅନ୍ୟ ଅଭିଯୁକ୍ତଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ଡିସିପି ପିନାକ ମିଶ୍ର କହିଛନ୍ତି।