ମିରଟ୍: ରୋଗୀଙ୍କ ପେଟରୁ ବାହାରିଲା ୬୩ ଚାମଚ। ଉତ୍ତରପ୍ରଦେଶର ମିରଟ୍ରେ ଥିବା ଏକ ଡାକ୍ତରଖାନାରୁ ଏଭଳି ଏକ ଚକିତ କଲା ଭଳି ଖବର ସାମ୍ନାକୁ ଆସିଛି। ଦୁଇ ଘଣ୍ଟାର ଅପରେଶନ ପରେ ରୋଗୀଙ୍କ ପେଟରୁ ବିନା ମୁଣ୍ଡ ଥିବା ଚାମଚଗୁଡ଼ିକୁ ବାହାର କରାଯାଇଛି। ତାଙ୍କର ସ୍ବାସ୍ଥାବସ୍ଥା ସ୍ଥିର ରହିଛି। କିଛି ଦିନ ପରେ ତାଙ୍କୁ ଡିସଚାର୍ଜ କରିଦିଆଯିବ ବୋଲି ଅସ୍ତ୍ରୋପଚାର କରିଥିବା ଡାକ୍ତର କହିଛନ୍ତି।
ସର୍ଜନ ଡା. ରାକେଶ ଖୁରାନା ସବିଶେଷ ସୂଚନା ଦେଇ କହିଛନ୍ତି, ମୁଜାଫରନଗର ଜିଲାର ବୋପାରା ଗ୍ରାମର ରୋଗୀ ବିଜୟ ଚୌହ୍ବାନ ପ୍ରାୟ ୧୫ ଦିନ ପୂର୍ବେ ପେଟରେ ଯନ୍ତ୍ରଣା ଅନୁଭବ କରିବାରୁ ଡାକ୍ତରଖାନାରେ ଭର୍ତ୍ତି ହୋଇଥିଲେ। ତାଙ୍କର କିଛି ପରୀକ୍ଷା କରାଯିବା ପରେ ତାଙ୍କ ପେଟରେ କିଛି ଅଜବ ଜିନିଷର ଉପସ୍ଥିତିକୁ ସନ୍ଦେହ କରି ଅସ୍ତ୍ରୋପଚାର ଲାଗି ସୁପାରିଶ କରିଥିଲୁ। ରବିବାର ତାଙ୍କ ପେଟର ଅପରେଶନ କରାଯାଇ ୬୨ ଚାମଚ ଏବଂ ଅନ୍ତନଳୀରୁ ଗୋଟିଏ ଚାମଚ ବାହାର କରାଯାଇଥିଲା। ତେବେ ସେ କିଭଳି ଏବଂ କାହିଁକି ଚାମଚ ଗିଳିଛନ୍ତି ତାହା ଜଣାପଡ଼ିନାହିଁ।
ପରିବାରଲୋକଙ୍କ ମୁତାବକ ସେ ଜଣେ ନିଶାଗସ୍ତ ଯୁବକ। ଏଣୁ ତାଙ୍କୁ ନିଶାମୁକ୍ତ ଅନୁଷ୍ଠାନରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କୁ ଜୋର ଜବରଦସ୍ତ ଚାମଚ ଖାଇବାକୁ ବାଧ୍ୟ କରାଯାଇଥିବା ସେମାନେ ଅଭିଯୋଗ କରିଛନ୍ତି। ହେଲେ ଏହି ମାମଲାରେ ପୋଲିସ ନିକଟରେ କୌଣସି ଅଭିଯୋଗ କରାଯାଇନାହିଁ।