ନିମାପଡ଼ା,୧୭।୯(ଡି.ଏନ୍.ଏ.): ପୁରୀ ଜିଲା ନିମାପଡ଼ା ବ୍ଲକ ଅନ୍ତର୍ଗତ ଭୋଗଶାଳଦା ପଞ୍ଚାୟତର ବଡ଼ରିକିଲୋ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ନିର୍ମାଣକୁ ୬୩ ବର୍ଷ ପୂରିଲାଣି। ହେଲେ ଏହା ବିକାଶ ଆଢୁଆଳରେ ରହିଯାଇଛି। ୧୯୫୯ରେ ପ୍ରତିଷ୍ଠିତ ଏହି ପୁରାତନ ବିଦ୍ୟାଳୟଟି ପ୍ରଶାସନିକ ଉଦାସୀନତା ଏବଂ ସ୍ଥାନୀୟ ଲୋକପ୍ରତିନିଧିମାନଙ୍କ ଆନ୍ତରିକତା ଅଭାବରୁ ଅବହେଳିତ ହୋଇପଡ଼ିଛି। ଏପର୍ଯ୍ୟନ୍ତ ସ୍କୁଲ ରୁପାନ୍ତରକରଣ ଯୋଜନାରେ ଏହି ବିଦ୍ୟାଳୟକୁ ସାମିଲ କରାଯାଇ ନ ଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ଏଠାରେ ପ୍ରଥମରୁ ଅଷ୍ଟମ ପର୍ଯ୍ୟନ୍ତ ଶ୍ରେଣୀ ଥିବାବେଳେ ମୋଟ ୬୯ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ପ୍ରଧାନ ଶିକ୍ଷକଙ୍କ ସମେତ ୫ ଶିକ୍ଷୟିତ୍ରୀ ଶିକ୍ଷକ ରହିଛନ୍ତି। ତେବେ ୮ଟି ଶ୍ରେଣୀ ନିମନ୍ତେ ମାତ୍ର ୨ଟି କୋଠରୀ ରହିଛି। ସେଥିରୁ ଗୋଟିଏ ଶ୍ରେଣୀରେ ୧ମ, ୨ୟ, ୩ୟ, ୫ମ ଶ୍ରେଣୀର ପିଲା ଏବଂ ଅନ୍ୟଟିରେ ୪ର୍ଥ, ୬ଷ୍ଠ, ୭ମ, ୮ମ ଶ୍ରେଣୀର ପିଲା ପଢୁଛନ୍ତି। ଶ୍ରେଣୀ କକ୍ଷରେ ମଧ୍ୟାହ୍ନଭୋଜନ ପାଇଁ ଚାଉଳ, ସଉଦା, ପନିପରିବା, ରନ୍ଧନ ଗ୍ୟାସ୍ ଆଦି ରଖାଯାଇଛି। ମଧ୍ୟାହ୍ନଭୋଜନ ରୋଷେଇ ପାଇଁ ଘର ନ ଥିବାରୁ ବିଦ୍ୟାଳୟ ବାରଣ୍ଡାରେ ଖାଦ୍ୟ ପ୍ରସ୍ତୁତ କରାଯାଉଛି। ବିଦ୍ୟାଳୟ ଚତୁଃପାର୍ଶ୍ୱରେ ସୁରକ୍ଷା ପ୍ରାଚୀର ନ ଥିବାରୁ ଏହାର ପରିସର ବୁଲା ଗୋରୁ, ଛେଳି, ମେଣ୍ଢାଙ୍କ ଲାଗି ଆଶ୍ରୟସ୍ଥଳୀ ପାଲଟିଛି। ଏଥିସହ ଶିକ୍ଷୟିତ୍ରୀ ଶିକ୍ଷକଙ୍କ ପାଇଁ କମନ୍ ରୁମ୍, ପିଲାଙ୍କ ପାଇଁ ଖେଳପଡ଼ିଆ, ଷ୍ଟୋର ରୁମ୍ ନ ଥିବାବେଳେ ସ୍କୁଲର ଭିତ୍ତିଭୂମି ଅତି ଶୋଚନୀୟ। ଏ ସମ୍ପର୍କରେ ଛାତ୍ରୀଛାତ୍ର ପ୍ରଭାତ କାଣ୍ଡି, ଆଇସା ଦାସ, ଅର୍ଚ୍ଚନା ଭୋଇ ଏବଂ ଦିବ୍ୟଜ୍ୟୋତି ବେହେରା ପ୍ରମୁଖଙ୍କୁ ପଚାରିବାରେ କହିଛନ୍ତି, ଆମ ବିଦ୍ୟାଳୟରେ ଶ୍ରେଣୀଗୃହ ଅଭାବ ଯୋଗୁ ପାଠପଢ଼ାରେ ସମସ୍ୟା ଉପୁଜୁଛି। ଗୋଟିଏ କୋଠରୀରେ ୪ଟି ଶ୍ରେଣୀର ପିଲା କଷ୍ଟେମଷ୍ଟେ ବସିବାକୁ ବାଧ୍ୟ ହେଉଛୁ। ସେହିପରି ଖେଳ ପଡ଼ିଆ ନ ଥିବାରୁ ଖେଳି ପାରୁନାହାନ୍ତି ବୋଲି ଏହି ଛାତ୍ରୀଛାତ୍ରମାନେ ପ୍ରକାଶ କରିଛନ୍ତି। ପ୍ରଶାସନ ପକ୍ଷରୁ ସ୍କୁଲର ମୌଳିକ ବିକାଶ ପାଇଁ ପଦକ୍ଷେପ ନିଆଯିବାକୁ ଗ୍ରାମବାସୀ ଦାବି କରିଛନ୍ତି। ସମସ୍ୟାଗୁଡ଼ିକର ସମାଧାନ ଲାଗି ଚେଷ୍ଟା ଚାଲିଛି ବୋଲି ବ୍ଲକ ଶିକ୍ଷା ଅଧିକାରୀ ଦ୍ୱିତୀକାନ୍ତ ପ୍ରଧାନ କହିଛନ୍ତି।