ଯାଜପୁର,୨୨ା୩(ହର୍ଷବର୍ଦ୍ଧନ ବେହେରା):କେନ୍ଦ୍ର ସରକାରଙ୍କ ସ୍ବତନ୍ତ୍ର ଯୋଜନା ଚ୍ୟାଲେଞ୍ଜିଂ ମୋଡ୍ରେ ଯାଜପୁର ଜିଲାରେ ସରକାରୀ ମେଡିକାଲ କଲେଜ ଓ ଅଧ୍ୟାପନା ଡାକ୍ତରଖାନା ଗୃହ ନିର୍ମାଣ ପ୍ରାୟ ଅନ୍ତିମ ପର୍ଯ୍ୟାୟରେ ପହଞ୍ଚିଛି। ଆସନ୍ତା ୨୦୨୪-୨୫ ଆର୍ଥିକ ଶିକ୍ଷାବର୍ଷରେ ୧ଶହ ସିଟ୍ ବିଶିଷ୍ଟ ଏହି ମେଡିକାଲ କଲେଜରେ ନାମ ଲେଖା ଆରମ୍ଭ ହେବ ବୋଲି ସୂଚନା ମିଳିଛି। ତେଣୁ ବିଭିନ୍ନ ମହଲରୁ ଦାବି ଅନୁଯାୟୀ ଏହି କଲେଜର ନାମକରଣ ସମ୍ରାଟ ଯଯାତି କେଶରୀଙ୍କ ନାମରେ ଯଯାତି କେଶରୀ ମେଡିକାଲ କଲେଜ ଏବଂ ହସ୍ପିଟାଲ ରଖାଯାଇଛି। ମେଡିକାଲ କଲେଜ ଏବଂ ଉକ୍ତ ନାମକରଣକୁ ସାଧାରଣରେ ସ୍ବାଗତ କରାଯାଇଛି। ତେବେ ଇତିମଧ୍ୟରେ କଲେଜ ଗୃହର ଅନ୍ୟାନ୍ୟ ନିର୍ମାଣ ପାଇଁ ପୁଣି ୧୦୪ କୋଟି ୧୬ ଲକ୍ଷ ୬୮ ହଜାର ୫୩୨ ଟଙ୍କା ମଞ୍ଜୁର ହୋଇଛି। ଏଥିମଧ୍ୟରୁ ୬୫ କୋଟି ୩୨ ଲକ୍ଷ ୯୦ ହଜାର ୬୦୩ ଟଙ୍କା ଓଡ଼ିଶା ମିନେରାଲ ବିଅରିଂ ଏରିଆ ଡେଭଲପମେଣ୍ଟ କର୍ପୋରେଶନ(ଓଏମ୍ବିଏଡିସିି) ଅଥାତ୍ ଓଡ଼ିଶା ଖଣିଜ ପଦାର୍ଥ ଧାରକ ଅଞ୍ଚଳ ଉନ୍ନୟନ ନିଗମ ପାଣ୍ଠିରୁ ପ୍ରଦାନ କରାଯାଇଛି। ଉକ୍ତ ପାଣ୍ଠିରୁ କେଉଁ କେଉଁ ବିଭାଗରେ କେତେ ଖର୍ଚ୍ଚ କରାଯିବ ଏବଂ ଅବଧି ସମୟ ମଧ୍ୟରେ ପାଣ୍ଠି ଖର୍ଚ୍ଚ କରିବାକୁ ବିଭାଗ ପକ୍ଷରୁ ନିର୍ଦ୍ଦେଶ ହୋଇଛି। ହେଲେ ଓଏମ୍ବିଏଡିସିି ପାଣ୍ଠି ଖଣି ପ୍ରଭାବିତ ଅଞ୍ଚଳର ବିକାଶରେ ଖର୍ଚ୍ଚ କରାଯିବ ବୋଲି ଯେଉଁ ନିଷ୍ପତ୍ତି ନିଆଯାଇଥିଲା ତାହାର ଏଠାରେ ବ୍ୟତିକ୍ରମ ଘଟିଛି। ରାଜ୍ୟ ଓ କେନ୍ଦ୍ର ସରକାରଙ୍କ ବିଭିନ୍ନ ଯୋଜନାରେ ଏଥିପାଇଁ ବିପୁଳ ପାଣ୍ଠି ମହଜୁଦ ରହିଥିଲେ ହେଁ ଖଣି ପ୍ରଭାବିତ ଅଞ୍ଚଳବାସୀଙ୍କ ପାଇଁ ଉଦ୍ଦିଷ୍ଟ ଏହି ପାଣ୍ଠି ଅନ୍ୟ କ୍ଷେତ୍ରରେ କାହିଁକି ବିନିଯୋଗ ହେଉଛି ବୋଲି ସାଧାରଣରେ ମତ ପ୍ରକାଶ ପାଇଛି।
ଓଏମ୍ବିଏଡିସି ଅର୍ଥକୁ ମୁଖ୍ୟତଃ ବୋର୍ଡ ଅଫ୍ ଡାଇରେକ୍ଟର ଏବଂ ଓଭରସାଇଟ୍ ଅଥରିଟିଙ୍କ ଅନୁମୋଦନ ନେଇ ୭ଟି କ୍ଷେତ୍ରରେ ବ୍ୟୟ କରାଯିବା ପାଇଁ ସ୍ଥିର କରାଯାଇଛି। ଏଥିରେ ପାନୀୟ ଜଳ ଯୋଗାଣ, ଶିକ୍ଷା(ପ୍ରଶିକ୍ଷଣ ଏବଂ କୌଶଳ ବିକାଶ), ସ୍ବାସ୍ଥ୍ୟ(ଅଙ୍ଗନଓ୍ବାଡି କେନ୍ଦ୍ର), ଜୀବନ ଜୀବିକା, ଗ୍ରାମ୍ୟ ସଂଯୋଗୀକରଣ, ପରିବେଶ ସୁରକ୍ଷା ଓ ପ୍ରଦୂଷଣ ନିୟନ୍ତ୍ରଣ, ଜଳ ସଂରକ୍ଷଣ ଓ ଭୂତଳ ଜଳ ରିଚାର୍ଜ ରହିଛି। ଏଥିନିମନ୍ତେ ବିଭିନ୍ନ ବିଭାଗଗୁଡ଼ିକ ଓଏମ୍ବିଏଡିସିକୁ ଡିପିଆର(ଡିଟେଲ ପ୍ରୋଜେକ୍ସ ରିପୋର୍ଟ) ପ୍ରଦାନ କରିଥାନ୍ତି। ଏହି ଡିପିଆର ଆଧାରରେ ଓଏମ୍ବିଏଡିସି ଦ୍ୱାରା ପ୍ରକଳ୍ପଗୁଡ଼ିକ ଅନୁମୋଦନ ହୋଇଥାଏ। ଏହି କ୍ରମରେ ଯାଜପୁର ଜିଲାର ଖଣି ପ୍ରଭାବିତ ସୁକିନ୍ଦା ବ୍ଲକରେ ମେଗା ଜଳଯୋଗାଣ ପ୍ରକଳ୍ପରେ ୮୯.୩୫ କୋଟି ଟଙ୍କା ସର୍ବାଧିକ ଭାବେ ଖର୍ଚ୍ଚ ହୋଇଛି। ଗାଇଡ୍ ଲାଇନ ଅନୁସାରେ ଅନ୍ୟାନ୍ୟ କ୍ଷେତ୍ରରେ ଖର୍ଚ୍ଚ ପରିମାଣ ନୈରାଶ୍ୟଜନକ ରହିଛି। ଉପରୋକ୍ତ ତଥ୍ୟକୁ ଅବଲୋକନ କଲେ ଓଏମ୍ବିଏଡିସିରେ ପାଣ୍ଠି ଥାଇ ମଧ୍ୟ ଗତ ୪ବର୍ଷ ହେଲା ପ୍ରଶାସନିକ ଉଦାସୀନତା କାରଣରୁ ବିଭିନ୍ନ ପ୍ରକଳ୍ପ କାର୍ଯ୍ୟକାରୀ ହୋଇ ପାରୁନାହିଁ। ଫଳରେ ଖଣି ଦ୍ୱାରା କ୍ଷତିଗ୍ରସ୍ତ ହୋଇଥିବା ଆଦିବାସୀଙ୍କ ଜୀବନଧାରଣର ମାନ ଅପରିବର୍ତ୍ତିତ ରହିଛି ା ଅନ୍ୟପକ୍ଷେ ଜିଲାର ସ୍ବାସ୍ଥ୍ୟକ୍ଷେତ୍ରରେ ଉନ୍ନତି ପାଇଁ ୨୦୨୦ ଡିସେମ୍ବରରେ ମେଡିକାଲ କଲେଜ ନିର୍ମାଣ ପାଇଁ କ୍ୟାବିନେଟ ଅନୁମୋଦନ ମିଳିଥିଲା। ଏଥିପାଇଁ ଆବଶ୍ୟକ ଗୃହ ଓ ଅନ୍ୟାନ୍ୟ କାର୍ଯ୍ୟ କରିବାକୁ ୪୨୬ କୋଟି ଟଙ୍କାର ବ୍ୟୟ ଅଟକଳ ପ୍ରସ୍ତୁତ ହୋଇଥିଲା। ଜିଲା ପ୍ରଶାସନ ପକ୍ଷରୁ ଏଥିପାଇଁ ଆଙ୍କୁଳା ଛକ ନିକଟରେ ନିର୍ଦ୍ଧାରିତ ୪୦ଏକର ଜମିର ବ୍ୟବସ୍ଥା ହୋଇଥିଲା। ଏହାକୁ ଜିଲାର ସମସ୍ତ ବର୍ଗର ଲୋକେ ସ୍ବାଗତ କରିଥିଲେ। ଜିଲାରେ ଏକ ମେଡିକାଲ କଲେଜ ସ୍ବପ୍ନ ପୂରଣ ହେଲା ବୋଲି ସେତେବେଳେ ମତପ୍ରକାଶ ପାଇଥିଲା। କିନ୍ତୁ ଖଣି ଖନନ ଦ୍ୱାରା ପ୍ରଦୂଷଣ ଓ ପରିବେଶଗତ ସମସ୍ୟାର ସମ୍ମୁଖୀନ ହେଉଥିବା ଅନୁନ୍ନତ ସୁକିନ୍ଦା ବ୍ଲକ ଅଞ୍ଚଳରେ କାହିଁକି ଓଏମ୍ବିଏଡିସି ପାଣ୍ଠି ସର୍ବାଧିକ ଖର୍ଚ୍ଚ ହୋଇ ପାରୁନାହିଁ ବୋଲି ଅଞ୍ଚଳବାସୀଙ୍କ ମଧ୍ୟରେ ପ୍ରଶ୍ନ ଉଠିଛି। ବର୍ତ୍ତମାନ ମେଡିକାଲ କଲେଜ ପାଇଁ ମଞ୍ଜୁର ପାଣ୍ଠିରେ ଗୃହ ନିର୍ମାଣ ସର୍ବାଧିକ ୫୬.୭୧ କୋଟି ଟଙ୍କା ଖର୍ଚ୍ଚ ହେଉଥିବାବେଳେ ବାକି ମୋଡୁଲାର ଓଟି, ସାଇଟ୍ ଡେଭଲପ୍ମେଣ୍ଟ, ଚିଲର ପ୍ଲାଣ୍ଟ ରୁମ୍, ମେଡିକାଲ ଗ୍ୟାସ୍ ପ୍ଲାଣ୍ଟ ରୁମ, ପାର୍କିଂ, ଡ୍ରେନ, ସାଇଟ୍ ଫିଲିଂ, ସୋଲାର ହଟ୍ ଓ୍ବାଟର ସିଷ୍ଟମ, ମେଡିକାଲ ଗ୍ୟାସ ପାଇପ୍ ସିଷ୍ଟମ, ଇଲେକ୍ଟ୍ରିକାଲ ଓ୍ବାର୍କ ଇତ୍ୟାଦି କ୍ଷେତ୍ରରେ ଖର୍ଚ୍ଚ କରାଯିବାକୁ ନିର୍ଦ୍ଦେଶ ହୋଇଛି।
ମେଡିକାଲ କଲେଜ ଗୃହ ନିର୍ମାଣ ଦାୟିତ୍ୱରେ ଥିବା ପୂର୍ତ୍ତ ବିଭାଗର ଯାଜପୁର ସହକାରୀ ନିର୍ବାହୀ ଯନ୍ତ୍ରୀ ଭାଗବାନ ସାହୁଙ୍କୁ ଏ ସଂକ୍ରାନ୍ତରେ ପଚାରିବାରୁ ସେ କହିଛନ୍ତି, ବିଭିନ୍ନ ପର୍ଯ୍ୟାୟରେ ଉଚ୍ଚ କର୍ତ୍ତୃପକ୍ଷଙ୍କ ନିଷ୍ପତ୍ତି ଅନୁସାରେ ଓଏମ୍ବିଏଡିସି ପାଣ୍ଠି ମଞ୍ଜୁର ହୋଇଛି ।