ମାଟ୍ରିମୋନିଆଲ୍ ସାଇଟ୍ରେ ଯୁବତୀଙ୍କ ସହ ବିବାହ ପ୍ରସ୍ତାବ : ଡାକ୍ତର ପରିଚୟ ଦେଇ ଯୁବକ ଗିରଫ
01 ଭୁବନେଶ୍ୱର,୧୯।୮(ବ୍ୟୁରୋ): ନିଜକୁ ଡାକ୍ତର ପରିଚୟ ଦେଇ ଜଣେ ବିବାହିତ ପୁରୁଷ ଅବିବାହିତା ଡାକ୍ତରାଣୀଙ୍କୁ ଠକେଇବାକୁ ଚେଷ୍ଟା କରୁଥିବା ଜଣାପଡ଼ିବା ପରେ ତାଙ୍କୁ କମିଶନରେଟ୍ ପୋଲିସ ରବିବାର ଗିରଫ କରିଛି। ଅଭିଯୁକ୍ତ ବିରଞ୍ଚତ୍ ନାରାୟଣ ନାଥ (୩୮)ଙ୍କ ଘର ଅନୁଗୋଳ ଜିଲା ଛେଣ୍ଡିପଦାର ଖମାର। ସେ ଭୁବନେଶ୍ୱର ସାଲିଆ ସାହିର ତାରିଣୀ ନଗରରେ ଏକକୋଠରି ବିଶିଷ୍ଟ ଭଡ଼ାଘରେ ପରିବାର ସହ ରହନ୍ତି। ନାଥଙ୍କ ସ୍ତ୍ରୀ ଏକ ଘରୋଇ ସଂସ୍ଥାରେ କାର୍ଯ୍ୟ କରୁଥିବା ଜଣାପଡ଼ିଛି।
ମିଳିଥିବା ସୂଚନା ଅନୁଯାୟୀ ‘ସାଦି. କମ୍’ ମାଟ୍ରିମୋନିଆଲ ସାଇଟ୍ରେ ଜଣେ ଡାକ୍ତରାଣୀ ବିବାହ ପାଇଁ ବିଜ୍ଞାପନ ଦେଇଥିଲେ। ସେହି ସାଇଟ୍ରେ ନାଥ ନିଜକୁ ଏମ୍ସର ସ୍ନାୟୁରୋଗ ବିଶେଷଜ୍ଞ ବୋଲି ପରିଚୟ ଦେଇ ଏକ ଆକାଉଣ୍ଟ ଖୋଲିଥିଲେ। ତା’ ପରେ ସମ୍ପୃକ୍ତା ଯୁବତୀଙ୍କ ଫୋନ୍ ନମ୍ବର ନେଇ ତାଙ୍କ ସହ ସମ୍ପର୍କ ବଢାଇଥିଲେ। ନିଜକୁ ଥିଲାବାଲା ଘରର ପୁଅ ବୋଲି କହି ଡାକ୍ତରାଣୀଙ୍କ ବିଶ୍ୱାସ ଜିତିବାକୁ ଉଦ୍ୟମ କରିଥିଲେ। ଅଭିଯୁକ୍ତଙ୍କ ଏଭଳି କଥାରେ ଯୁବତୀ ଓ ତାଙ୍କ ପରିବାର ଲୋକେ ଫସିଯାଇଥିଲେ। ତେବେ ଡାକ୍ତରାଣୀଙ୍କ ସମ୍ପର୍କୀୟ ତଥା ରେଲଓ୍ବେ ଟ୍ରାଫିକ୍ ସର୍ଭିସରେ କାର୍ଯ୍ୟରତ ଅନୁପ କୁମାର ଶତପଥୀ ନାଥଙ୍କ ବିଷୟରେ ତଥ୍ୟ ସଂଗ୍ରହ କରିବାରେ ଲାଗିଲେ। ଏମ୍ସ ସହ ଯୋଗାଯୋଗ କରିବା ପରେ ଅନ୍ୟମାନେ ମଧ୍ୟ ଏହିଭଳି ନାଥଙ୍କ ବିଷୟରେ ପଚାରି ବୁଝୁଛନ୍ତି ବୋଲି ସେ ଜାଣିବାକୁ ପାଇଥିଲେ। ତେବେ ପରବର୍ତ୍ତୀ ସମୟରେ ଶତପଥୀ ଯୋଗାଯୋଗ କଲା ବେଳେ ନାଥ ନିଜ ଆକାଉଣ୍ଟ ବନ୍ଦ କରିଦେଇଥିଲେ। ସେତିକିରେ ତାଙ୍କ କାରନାମା ଶେଷ ହୋଇ ନ ଥିଲା। ସେ ପୁନଶ୍ଚ ଅନ୍ୟ ଏକ ଆକାଉଣ୍ଟ ଖୋଲିଥିଲେ। ସେଥିରେ ସେ ନିଜକୁ ଭୁବନେଶ୍ୱରର ଜଣେ ମେଡିକାଲ ପ୍ରଫେସର ବୋଲି ଦର୍ଶାଇଥିଲେ। ଏ ସମ୍ପର୍କରେ ଶତପଥୀ ଜାଣିବା ପରେ ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଧମକ ଦେଇଥିଲେ।
କିଛିଦିନ ଗଲା ପରେ ନାଥ ପୁଣି ଥରେ ପ୍ରୋଫାଇଲ ବଦଳାଇ ନିଜକୁ ୨୦୧୫ ବ୍ୟାଚ୍ର ଆଇଆର୍ଏସ୍ ଅଫିସର ଓ ସେ ଚଣ୍ଡିଗଡ଼ରେ ରହୁଥିବା ଦର୍ଶାଇଥିଲେ। ପୁନର୍ବାର ସମ୍ପୃକ୍ତା ଯୁବତୀଙ୍କ ସହ ସମ୍ପର୍କ ବଢ଼ାଇବାକୁ ବାରମ୍ବାର ମିଛର ଆଶ୍ରୟ ନେଇଥିଲେ। ନାଥଙ୍କ ଠକାମି ବିଷୟରେ ଜାଣିବା ପରେ ବରିଷ୍ଠ ପୋଲିସ ଅଧିକାରୀଙ୍କ ସହ ତାଙ୍କୁ ଧରିବାକୁ ଯୋଗାଯୋଗ କରାଯାଇଥିଲା। ଯୋଜନାବଦ୍ଧ ଭାବେ ନାଥ ଏବଂ ଡାକ୍ତରାଣୀଙ୍କ ମଧ୍ୟରେ ଭୁବନେଶ୍ୱରର ଏକ ହୋଟେଲରେ ଦେଖାସାକ୍ଷାତ୍ କରିବା ଲାଗି ଶନିବାର ରାତିରେ ସମୟ ଧାର୍ଯ୍ୟ କରାଯାଇଥିଲା। ଏହି ସମୟରେ ପୋଲିସ ଚଢ଼ାଉ କରି ଅଭିଯୁକ୍ତଙ୍କୁ ଧରିଥିଲା। ଏ ନେଇ ଏକ ମାମଲା (ନଂ. ୩୭୩/୧୯) ଆଇପିସି ଦଫା ୪୧୯, ୪୨୦ ଓ ୫୧୧ରେ ରୁଜୁ କରାଯାଇ ତାଙ୍କୁ କୋର୍ଟଚାଲାଣ କରାଯାଇଛି।ପ