ହାର୍ଲସୋ ନାମକ ଏକ କୁକୁରର ଫଟୋ ଓ ଭିଡିଓ ସୋସିଆଲ୍ ମିଡିଆରେ ଏବେ ବେଶ୍ ଭାଇରାଲ୍ ହେବାରେ ଲାଗିଛି। କାରଣ ଏହି କୁକୁର ପାଖରେ ରହିଛି ମୁଣ୍ଡରେ ବିଭିନ୍ନ ପ୍ରକାର ଜିନିଷକୁ ବାଲାନ୍ସ କରି ରଖିବାର ଅପୂର୍ବ କଳାକୌଶଳ। ତା’ର ମାଲିକ ପଲ୍ ଲାଭେରୀଙ୍କ କହିବା ଅନୁଯାୟୀ, ହାର୍ଲସୋକୁ ଯେବେ ମାତ୍ର ଦୁଇବର୍ଷ ହୋଇଥିଲା ସେବେ ଭୁଲ୍ବଶତଃ ମୁଁ ତା’ ମୁଣ୍ଡ ଉପରେ ଏକ ଛୋଟ ଖେଳଣାଟିଏ ଥୋଇ ଦେଇଥିଲି। କିଛି ସମୟ ପରେ ଦେଖିଲା ବେଳକୁ ସେହି ଖେଳଣାଟି ସେମିତି ତା’ ମୁଣ୍ଡ ଉପରେ ଥୁଆ ହୋଇଛି ଆଉ ହାର୍ଲସୋ ବି ଆଦୌ ବିଚଳିତ ହେଉନାହିଁ। ସେଦିନ ପ୍ରଥମ ଥର ପାଇଁ ମୋତେ ଟିକେ ଆଶ୍ଚର୍ଯ୍ୟ ଲାଗିଥିଲା। ଏହାର କିଛିଦିନ ପରେ ଭାଲେଣ୍ଟାଇନ୍ସ ଡେ’ ଅବସରରେ ଗୋଟିଏ ଗୋଲାପ ଫୁଲ ମୁଁ ତା’ମୁଣ୍ଡ ଉପରେ ରଖିଦେଲି। ସେଦିନ ବି ସେୟା ହେଲା। ତା’ପରଠୁ ମୁଁ କନ୍ଫର୍ମ ହୋଇଗଲି ଯେ, ହାର୍ଲସୋ ପାଖରେ ଜିନିଷକୁ ବାଲାନ୍ସ କରି ରଖିବାର ଏକ ଅପୂର୍ବ କଳା ରହିଛି। ବାସ୍ ତା’ପରଠୁ ତା’ର ଟ୍ରେନିଂ ଆରମ୍ଭ କରିଦେଲି; ଯାହାର ଫଳସ୍ବରୂପ ଏବେ ହାର୍ଲସୋ ତା’ ମୁଣ୍ଡରେ ଛୋଟ କଖାରୁଠୁ ଆରମ୍ଭ କରି ଫୁଲକୁଣ୍ଡ, ପାଣି ଭର୍ତ୍ତି ଗ୍ଲାସ୍, ଥାକ ଥାକ ହୋଇ ରହିଥିବା ଏକାଧିକ ପିଜା, ଆଇସ୍କ୍ରିମ୍ କପ୍, ଫୁଟ୍ବଲ୍ ତଥା ବିଭିନ୍ନ ପ୍ରକାର ଫଳ ଇତ୍ୟାଦିକୁ ଆରାମରେ ବାଲାନ୍ସ କରି ବେଶ୍ କିଛି ସମୟ ରଖିପାରୁଛି। ଆଉ ଯେଉଁଥିପାଇଁ ସୋସିଆଲ୍ ମିଡିଆରେ ଏବେ ତା’ର ଖୁବ୍ ଚର୍ଚ୍ଚା ବି ହେଉଛି।
