କେନ୍ଦୁଝର,୩।୪(ସ୍ବ.ପ୍ର.) : କେନ୍ଦୁଝର ସହର ରାସ ମନ୍ଦିର ବଜାରରେ ସୋମବାର ଭୟଙ୍କର ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡରେ ୬୯ଟି ଖୁଚୁରା ଦୋକାନ ଜଳି ଯାଇଥିବାବେଳେ ବ୍ୟାପକ ସାମଗ୍ରୀ ପୋଡିଯାଇଥିବା ସୂଚନା ମିଳିଛି। ସଟସର୍କିଟ ଯୋଗୁ ନିଆଁ ଲାଗିଥିବା ଆଶଙ୍କା କରାଯାଉଛି। ନିଆଁର ପ୍ରଭାବ ଏତେ ଅଧିକ ଥିଲା ଯେ ଦୁଇଟି ଅଗ୍ନିଶମ ଗାଡି ଆୟତ୍ତ କରି ନ ପାରିବାରୁ ବାଂଶାପାଳ,ପାଟଣା,ଝୁମ୍ପୁରା ଦମକଳ କେନ୍ଦ୍ର ତଥା ଏମ୍ଏସ୍ପି କାରଖାନାର ଦମକଳ ଗାଡି ନିୟୋଜିିତ କରାଯାଇଥିଲା। ଏପରିକି ନିଆଁ ଲିଭାଇବା ପାଇଁ ସାଧାରଣ ଲୋକଙ୍କ ଉପଯୋଗୀ ପାଣି ଟ୍ୟାଙ୍କର ଅଣାଯାଇ ନିଆଁ ଲିଭାଯାଇଥିଲା। ଖବରପାଇ ଏସ୍ଡିପିଓ ମହେନ୍ଦ୍ର ନାଥ ମୁର୍ମୁଙ୍କ ନେତୃତ୍ୱରେ ଟାଉନ ଥାନା ଅଧିକାରୀ ସୁନିଲ କର,ସବଇନ୍ସପେକ୍ଟର ସୁନିଲ କୁମାର ନନ୍ଦଙ୍କ ସମେତ ବହୁ ପୋଲିସ ଅଧିକାରୀ ଉପସ୍ଥିତ ରହି ଟ୍ରାଫିକ ନିୟନ୍ତ୍ରଣ କରିବା ସହ ନିଆଁ ଲିଭାଇବା କାମରେ ଲାଗିଥିଲେ। ଭୀଷଣ ନିଆଁରେ ବ୍ୟବସାୟୀ ଜିନିଷପତ୍ର ପୋଡି ପାଉଁଶ ହୋଇଯାଇଛି।
ଅନ୍ୟପଟେ ଜିଲାପାଳ ଆଶିଷ ଠାକ୍ରେ,ଉପଜିଲାପାଳ ରାମଚନ୍ଦ୍ର କିସ୍କୁ,ପୌରପାଳିକା ନିର୍ବାହୀ ଅଧିକାରୀ ଧିମନ ଚକମା,ତହସିଲଦାର ଆଶିଷ ମହାପାତ୍ର ସମେତ ବହୁ ପଦାଧିକାରୀ ଗସ୍ତ କରି କ୍ଷୟକ୍ଷତି ଅନୁଧ୍ୟାନ କରିଥିଲେ। ଜିଲାପାଳଙ୍କ ଆଦେଶକ୍ରମେ ରାଜସ୍ବ ବିଭାଗ ପକ୍ଷରୁ ଏକ ୫ ଜଣିଆ ଟିମ ଯାଇ ଆକଳନ କରି ରିପୋର୍ଟ ପ୍ରଦାନ କରିଛନ୍ତି। ରାସ ପୂଜା କମିଟିର ସମ୍ପାଦକ ହରିଶ ଚନ୍ଦ୍ର ଦାସ ଏବଂ ଅନ୍ୟ କର୍ମକର୍ତ୍ତାମାନେ ଜିଲା ଯୋଜନା ବୋର୍ଡ ଅଧ୍ୟକ୍ଷ ଜଗନ୍ନାଥ ନାୟକ ଏବଂ ଜିଲାପାଳ ଆଶିଷ ଠାକ୍ରେଙ୍କ ସହ ଆଲୋଚନା କରି କ୍ଷତିଗସ୍ତ ବ୍ୟବସାୟୀଙ୍କୁ ଆଇନ ମୁତାବକ ସହାୟତା ପ୍ରଦାନ କରିବାକୁ ଅନୁରୋଧ କରିଥିଲେ। ଉପଜିଲାପାଳ ରାମଚନ୍ଦ୍ର କିସ୍କୁ କହିଛନ୍ତି ଯେ କ୍ଷୟକ୍ଷତିର ଆକଳନ କରାଯାଉଛି ା ଆକଳନ ପରେ ଆପାତକାଳୀନ ବିଭାଗ ପକ୍ଷରୁ ନିଷ୍ପତି କ୍ରମେ ନିୟମାନୁଯାୟୀ ପଦକ୍ଷେପ ନିଆଯିବ ା
