ମହାକାଳପଡ଼ା, ୧୯ା୧୧(ପ୍ରତାପ ଚନ୍ଦ୍ର ସ୍ବାଇଁ): ପୂର୍ବ ସରକାର ଶାସନ ସମୟରେ ଛାତ୍ରୀମାନଙ୍କୁ ମାଗଣାରେ ନାପକିନ ବଣ୍ଟନ କରିବାକୁ ନିର୍ଦ୍ଦେଶ ଥିଲା। ହେଲେ ୬ଷ୍ଠରୁ ୧୦ମଶ୍ରେଣୀ ଛାତ୍ରୀଙ୍କୁ ଅଦ୍ୟାବଧି ସେମାନଙ୍କୁ ନାପକିନ ମିଳିନାହିଁ। ସ୍ବାସ୍ଥ୍ୟ ବିଭାଗ ପକ୍ଷରୁ ପ୍ରତି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଲକ୍ଷ ଲକ୍ଷ ନାପକିନ ଯୋଗାଣ କରାଯାଇଥିଲା। ହେଲେ ଛାତ୍ରୀମାନଙ୍କୁ ବଣ୍ଟନ ପୂର୍ବରୁ ସ୍ବାସ୍ଥ୍ୟକେନ୍ଦ୍ରରୁ ସମସ୍ତ ନାପକିନ ଚୋରି ହୋଇଛି। ସ୍ବାସ୍ଥ୍ୟକେନ୍ଦ୍ରର ଗୋଦାମ ଗୃହ ସୁରକ୍ଷା ବ୍ୟବସ୍ଥାକୁ ନେଇ ବିଭାଗୀୟ ପ୍ରତି ଅଙ୍ଗୁଳି ନିର୍ଦ୍ଦେଶ କରୁଥିବା ବୁଦ୍ଧିଜୀବୀ ମହଲରେ ଆଶଙ୍କା ପ୍ରକାଶ ପାଇଛି।
ମିଳିଥିବା ସୂଚନା ଅନୁସାରେ, ଚଳିତବର୍ଷ ୨ା୭ା୨୪ ଓ ୧୪ା୯ା୨୪ ପୃଥକ୍ ପୃଥକ୍ ଭାବେ ୨ ଥର ୪ ଲକ୍ଷ ୫୫ ହଜାର ୮ ଶହ ୧୪ ପିସ୍ ବା ସମୁଦାୟ ୯ ଲକ୍ଷ ୧୧ ହଜାର ୬୬ ଖଣ୍ଡ ନାପକିନ ଯୋଗାଣ କରାଯାଇଛି। ଉକ୍ତ ନାପକିନକୁ ଏକ ଘରୋଇ ଯୋଗଣକାରୀ ସଂସ୍ଥା ଶ୍ରୀରାଧେ ହାଇଜେନିକ ପ୍ରାଇଭେଟ ଲିମିଟେଡ଼ ପକ୍ଷରୁ ମହାକାଳପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଗୋଦାମ ଗୃହରେ ଗଚ୍ଛିତ ରଖିଥିଲା। ତେବେ ଛାତ୍ରୀମାନଙ୍କୁ ବଣ୍ଟନ ନ କରି କାହିଁକି ଗୋଦାମ ଘରେ ରଖିଲା, ଏ ନେଇ ବିଭାଗୀୟ ପ୍ରତି ଅଙ୍ଗୁଳି ନିର୍ଦ୍ଦେଶ କରିଛନ୍ତି। ତେବେ ଏଠାରେ ପ୍ରଶ୍ନ ଉଠେ ସ୍ବାସ୍ଥ୍ୟକେନ୍ଦ୍ର ପରିସରକୁ ୨୪ ଘଣ୍ଟିଆ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲେ ମଧ୍ୟ କିପରି ଲକ୍ଷ ଲକ୍ଷ ସଂଖ୍ୟାରେ ନାପକିନ ଚୋରି ହେଲା ବୋଲି ଅନ୍ୟ ପକ୍ଷରେ କୁହାଯାଇଛି। ଏ ନେଇ ମହାକାଳପଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଭାରପ୍ରାପ୍ତ ମେଡ଼ିକାଲ ଅଫିସର ଡା. ନିରଞ୍ଜନ କର ଗତ ସପ୍ତାହରେ ମହାକାଳପଡ଼ା ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗରେ ୭୦ ପେଟିରୁ ଅଧିକ ନାପକିନ ଥିଲା। ପ୍ରତି ପେଟିରେ ହାଜରରୁ ଅଧିକ ପ୍ୟାକିଂ ରହିଛି। ସେହିପରି କିଛି ମାସ ପୂର୍ବରୁ ସମାନ ଧରଣର ନାପକିନ ଚୋରି ହୋଇଥିବା ନେଇ ଥାନାରେ ଅଭିଯୋଗ ହୋଇଥିଲା ବୋଲି ଥାନା ଅଧିକାରୀ ଧୀରଜ କୁମାର ଲେଙ୍କା ସୂଚନା ଦେଇଛନ୍ତି।
ଏ ସଂକ୍ରାନ୍ତରେ ମହାକାଳପଡ଼ା ଆଇଆଇସି ଲେଙ୍କାଙ୍କୁ ପଚାରିବାରେ ୪ ଦିନ ପୁର୍ବରୁ ନାପକିନ ଚୋରି ହେବା ନେଇ ଡା. କର ଲିଖିତ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ନଂ. ୨୨୪/୨୪ରେ ମାମଲା ରୁଜୁ ହୋଇଛି ବୋଲି କହିଛନ୍ତି। ପୋଲିସ ପକ୍ଷରୁ ତଦନ୍ତ ଚାଲିଛି। ଅପରପକ୍ଷରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଭାରପ୍ରାପ୍ତ ଅଧିକାରୀ ଡ଼ା ନିରଞ୍ଜନ କରଙ୍କୁ ପଚାରିବାରେ କେତେଜଣ ଅସାମାଜିକ ବ୍ୟକ୍ତିମାନେ ନାପକିନ ଚୋରି କରି ଥାଇପାରନ୍ତି ବୋଲି ସେ କହିଛନ୍ତି। ଏଠାରେ ପ୍ରଶ୍ନ ଉଠେ ଛାତ୍ରୀମାନଙ୍କୁ ବଣ୍ଟନ ନ କରି ଗୋଦାମ ଘରେ କାହିଁକି ଗଚ୍ଛିତ ରଖାଯାଇଥିଲା। ବିଭାଗୀୟ ବିଶେଷ ସୂତ୍ରରୁ ପ୍ରକାଶ ପୂର୍ବ ସରକାର ରେ ଏହି ନାପକିନ ଗାଏବ କରାଯାଇଥିଲା। ହେଲେ ସରକାର ବଦଳିବା ପରେ ଅଡିଟ ହେବାରୁ ନାପକିନର କିଛି ହିସାବ ନାହିଁ। ଶେଷରେ ବିଭାଗୀୟ ଗୋପନୀୟ ତଥ୍ୟକୁ ଲୁଚାଇବା ଓ ତଥ୍ୟ ପଦାରେ ପଡ଼ିବା ଭୟ ଉଚ୍ଚ କର୍ତ୍ତୃପକ୍ଷଙ୍କ ଚିନ୍ତାର କାରଣ ପାଲଟିଛି। ବିଭାଗର ଜୈନିକ କର୍ମଚାରୀ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତିଳ କେନ୍ଦ୍ର ପକ୍ଷରୁ ଥାନାରେ ଚୋରି ଅଭିଯୋଗ କରି ଚୁପ୍ ହୋଇ ବସିଛି ବୋଲି ସାଧାରଣରେ ଆଲୋଚନା ହେଉଛି। ଉଚ୍ଚସ୍ତରୀୟ ତଦନ୍ତ କରିବାକୁ ସ୍ଥାନୀୟ ବୁଦ୍ଧିଜୀବୀ ଦାବି କରିଛନ୍ତି।