ଖୋର୍ଦ୍ଧା ଅଫିସ,୨୯ା୭: ନିଜକୁ ଆର୍ବିଏଲ ବ୍ୟାଙ୍କ ଓଡ଼ିଶା ମୁଖ୍ୟ ପରିଚୟ ଦେଇ ଋଣ ଓ ଚାକିରି କରାଇଦେବାକୁ କହି ଏକାଧିକ ବ୍ୟକ୍ତିଙ୍କଠାରୁ ୭ ଲକ୍ଷ ୧୩ ହଜାର ଟଙ୍କା ଠକି ନେଇଥିବା ଅଭିଯୋଗରେ ଖୋର୍ଦ୍ଧା ଆଦର୍ଶ ଟାଉନ ଥାନା ପୋଲିସ ବୁଧବାର ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ହେଲେ ବାଲେଶ୍ୱର ସଦର ଥାନା ଶଙ୍କରପୁର ଗ୍ରାମର ଅନିଲ କୁମାର ମହାନ୍ତି (୩୩)। ଗୁରୁବାର ତାଙ୍କୁ କୋର୍ଟ ଚାଲାଣ କରାଯିବ।
ଶିକାର ମହିଳା ଥାନାର ଦ୍ୱାରସ୍ଥ
କଟକ ସାଲେପୁର ଅଞ୍ଚଳରେ ମହିଳାଙ୍କୁ ସିଲେଇ ତାଲିମ ଓ ମେଶିନ ଯୋଗାଇବା ନାମରେ ୨୫ଟି ସ୍ବୟଂସହାୟକ ଗୋଷ୍ଠୀଙ୍କଠାରୁ ଅନିଲ ମହାନ୍ତି ଲକ୍ଷାଧିକ ଟଙ୍କା ଠକି ନେଇଛନ୍ତି। ବୁଧବାର ଉକ୍ତ ଅଞ୍ଚଳର ବହୁ ମହିଳା ଟାଉନ ଥାନାକୁ ଆସି ଏହି ଅଭିଯୋଗ କରିଛନ୍ତି। ସମ୍ପୃକ୍ତ ମହିଳାମାନେ ପୋଲିସ ପାଖରେ ଏ ସଂକ୍ରାନ୍ତ କାଗଜପତ୍ର ଦାଖଲ କରିଛନ୍ତି।
ଅଭିଯୋଗକାରୀମାନଙ୍କ ଠାରୁ ମିଳିଥିବା ତଥ୍ୟ ଅନୁଯାୟୀ, ୨୦୧୭ରେ ଅନିଲ ସାଲେପୁରରେ ଏକାଡେମୀ ଅଫ ସଂସ୍କୃତି ଏଜୁକେଶନ ନାମରେ ଏକ ସଂସ୍ଥା ଖୋଲିଥିଲେ। ଏହା ଜରିଆରେ ମହିଳାଙ୍କୁ ୧୨ସପ୍ତାହ ସିଲେଇ ପ୍ରଶିକ୍ଷଣ ପରେ ମେଶିନ ଯୋଗାଇଦେବାକୁ ସାଲେପୁର, ନିଶ୍ଚିନ୍ତକୋଇଲି, ମାର୍ଶାଘାଇ, ହିନ୍ଦୋଳ ପ୍ରଭୃତି ଅଞ୍ଚଳର ୨୫ଟି ଏସ୍ଏଚ୍ଜି ସହ ଚୁକ୍ତି କରିଥିଲେ। ପ୍ରାୟ ୫ହଜାର ଯୁବତୀ, ମହିଳାଙ୍କ ବାବଦକୁ ଲକ୍ଷାଧିକ ଟଙ୍କା ଧରି ରାତାରାତି ଚମ୍ପଟ ମାରିଥିଲେ। ଏନେଇ ୨୦୧୮ ସେପ୍ଟେମ୍ବର ୧୨ରେ ସମ୍ପୃକ୍ତ ମହିଳାମାନେ ସାଲେପୁର ଥାନାରେ ଏତଲା ଦେଇଥିଲେ। ଫଳରେ ସେ ଫେରାର ହୋଇଯାଇଥିଲେ। ବୁଧବାର କୌଣସି ସୂତ୍ରରୁ ଖବର ପାଇ ମାର୍ଶାଘାଇର କଳ୍ପନା ଦ୍ୱିବେଦୀ, ଜ୍ୟୋତିର୍ମୟୀ ନାୟକ, ପ୍ରତାପ କୁମାର ସିଂ, ନିଶ୍ଚିନ୍ତ କୋଇଲିର ପ୍ରତିମା ନାୟକ, ସାଲେପୁରର ଶିବପ୍ରସାଦ ସ୍ବାଇଁ ପ୍ରମୁଖ ଥାନାରେ ପହଞ୍ଚି ଅନିଲଙ୍କ ବିରୋଧରେ ଅଭିଯୋଗ କରିଛନ୍ତି। ଏନେଇ ଥାନାଧିକାରୀ ସଞ୍ଜୟ ପଟ୍ଟନାୟକ କହିଛନ୍ତି,ଏହି ଘଟଣା ସାଲେପୁର ଅଞ୍ଚଳରେ ଘଟିଥିବାରୁ ସେହି ଥାନାରେ ଅଭିଯୋଗ କରିବାକୁ ସେମାନଙ୍କୁ ପରାମର୍ଶ ଦିଆଯାଇଛି।
ସଙ୍ଗିନ ଅଭିଯୋଗ ଆଣିଲେ ସ୍ତ୍ରୀ
ଅନିଲଙ୍କ ବିରୋଧରେ ତାଙ୍କ ସ୍ତ୍ରୀ ସୋନାଲି ପଟ୍ଟନାୟକ ସଙ୍ଗିନ ଅଭିଯୋଗ ଆଣିଛନ୍ତି। ସୋନାଲି କହିଛନ୍ତି, ଅନିଲ ତାଙ୍କୁ ଯୌତୁକ ନିର୍ଯାତନା, ଗର୍ଭ ନଷ୍ଟ, ହତ୍ୟା ଧମକ ଦେଉଥିଲେ। ଏ ନେଇ ସେ ବୁଧବାର ଖୋର୍ଦ୍ଧା ଟାଉନ ଥାନାରେ ଅଭିଯୋଗ କରିବା ପରେ ପୋଲିସ କେସ୍ (ନଂ. ୨୯୨/୨୧) ରୁଜୁ କରିଛି।