ମୁନିଗୁଡ଼ା/ରାୟଗଡ଼ା ଅଫିସ,୪।୭: ଏକ ମାଲ୍ ବୋଝେଇ ଟ୍ରକ୍ରୁ ରାୟଗଡ଼ା ଜିଲା ମୁନିଗୁଡ଼ା ପୋଲିସ ଶନିବାର ୭୦ଲକ୍ଷ ଟଙ୍କାର ଗଞ୍ଜେଇ ଜବତ କରିଛି। ଏହି ମାମଲାରେ ସମ୍ପୃକ୍ତ ମୁଖ୍ୟ ଅଭିଯୁକ୍ତ ସମେତ ୬ ଜଣଙ୍କୁ ଗିରଫ କରାଯିବା ସହ ଏକ ଟ୍ରକ୍, ଟ୍ରାକ୍ଟର ଏବଂ ଅଟୋରିକ୍ସା ଜବତ କରାଯାଇଛି। ଗିରଫ ଅଭିଯୁକ୍ତମାନେ ହେଲେ ମୁଖ୍ୟ ଚାଲାଣକାରୀ ତଥା ମାଳି ଢେପାଗୁଡ଼ାର କରୁଣା ହିଆଲ(୫୦) ଏବଂ ତାଙ୍କର ଦୁଇ ପୁଅ ବୀରେନ୍ଦ୍ର ହିଆଲ(୩୦), ଜିତେନ୍ଦ୍ର ହିଆଲ(୨୫), ମୁନିଗୁଡ଼ାର ସହଯୋଗୀ ବାବୁଲା ସେଠୀ, ରାଜସ୍ଥାନର ଟ୍ରକ୍ ମାଲିକ ନିମା ରାଓ(୨୧) ଏବଂ ଚାଳକ ହେମା ରାଓ(୪୨)।
ସୂଚନା ଅନୁଯାୟୀ, ରାଜ୍ୟ ବାହାରକୁ ଅଧିକ ପରିମାଣରେ ଗଞ୍ଜେଇ ଚାଲାଣ ହେଉଥିବା ବିଷମକଟକ ଏସ୍ଡିପିଓ ଆକାଶ ସାହୁଙ୍କୁ ଖବର ମିଳିଥିଲା। ଏନେଇ ମୁନିଗୁଡ଼ା ଥାନା ଅଧିକାରୀ ସୁଜ୍ଞାନୀ ସାହୁ ଏବଂ ପୋଲିସ ଟିମ୍ ଚଢ଼ାଉ କରିଥିଲେ। ମୁନିଗୁଡ଼ା ଥାନା ଅଧୀନ ମାଳିଢେପାଗୁଡ଼ା ରେଳଧାରଣା ନିକଟରେ ଏକ ଟ୍ରାକ୍ଟର ଏବଂ ଅଟୋରିକ୍ସାରୁ ଗଞ୍ଜେଇ ବସ୍ତା ଟ୍ରକ୍(ଆର୍ଜେ ୧୯ ଜିଡି ୮୮୨୩)ରେ ଲୋଡ୍ କରାଯିବା ସମୟରେ ପୋଲିସ ପହଞ୍ଚି ୭ କୁଇଣ୍ଟାଲ ୮୦ କେଜି ଗଞ୍ଜେଇ ଏବଂ ୩ ଗାଡ଼ି ଜବତ କରିବା ସହ ଅଭିଯୁକ୍ତମାନଙ୍କୁ ଗିରଫ କରିଥିଲା। ଗଞ୍ଜେଇ ଚନ୍ଦ୍ରପୁର ବ୍ଲକ୍ ହନୁମନ୍ତପୁରରୁ ରାଜସ୍ଥାନକୁ ଚାଲାଣ ହେଉଥିଲା ବୋଲି ପୋଲିସ ସୂଚନା ଦେଇଛି। ଏ ନେଇ ମୁନିଗୁଡ଼ା ଥାନାରେ ୮୩/୨୧ ରେ ଏକ ମାମଲା ରୁଜୁ କରାଯାଇ ଅଧିକ ତଦନ୍ତ ଚାଲିଥିବା ଏସ୍ଡିପିଓ ସାହୁ ସୂଚନା ଦେଇଛନ୍ତି।