ଅନୁଗୋଳ ଅଫିସ/ ଛେଣ୍ଡିପଦା,୧୨।୧ – ଅନୁଗୋଳ ଜିଲାକୁ ଡକାୟତି ପାଇଁ ଆସୁଥିବା ଏକ ଗ୍ୟାଙ୍ଗର ୭ ଜଣଙ୍କୁ ଅନୁଗୋଳ ସ୍ପେଶାଲ୍ ସ୍କ୍ବାଡ୍ ସୋମବାର ବିଳମ୍ବିତ ରାତିରେ ଧରିବାରେ ସଫଳ ହୋଇଛି। ସେମାନଙ୍କଠାରୁ ବନ୍ଧୁକ, ଗୁଳି ଓ ୩୧ ହଜାରରୁ ଅଧିକ ଟଙ୍କା ଜବତ କରାଯାଇଛି। ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏକ ଡକାୟତ ଦଳ ଦୁଇଟି ଗାଡ଼ିରେ ଅନୁଗୋଳ-ଛେଣ୍ଡିପଦା ୬୩ନଂ ରାଜ୍ୟ ରଜପଥରେ ଯାଉଥିବା ଖବରପାଇ ସ୍ପେଶାଲ ସ୍କ୍ବାଡ୍ ନିଶା ଶିଳାଞ୍ଚଳ ଥାନା ସମ୍ମୁଖରେ ରାସ୍ତା ଅବରୋଧ କରି ଜଗି ରହିଥିଲା। ଡକାୟତଙ୍କ ଗାଡ଼ି ସେଠାରେ ପହଞ୍ଚିବା ପରେ ରାସ୍ତା ନ ପାଇ ଢାବା ଆଡକୁ ଚାଲିଯାଇଥିଲା। ତୁରନ୍ତ ପୋଲିସ ଉକ୍ତ ଢାବା ସମ୍ମୁଖରେ ପହଞ୍ଚି ଦୁଇଟି ଗାଡ଼ି (ନଂ. ଓଆର୦୨ବିଏନ-୮୬୨୪ ଓ ଓଡି୦୨ବିଆର-୩୪୬୩) ଓ ୭ ଅଭିଯୁକ୍ତଙ୍କୁ ଅଟକ ରଖି ଯାଞ୍ଚ କରିଥିଲା। ଯାଞ୍ଚ ବେଳେ ପୋଲିସ ଗାଡିରୁ ଗୋଟିଏ ବନ୍ଧୁକ, ୪ଟି ଜୀବନ୍ତ ଗୁଳି ଓ ଟଙ୍କା ଜବତ କରିଥିଲା। ନିଶା ଶିଳ୍ପାଞ୍ଚଳରେ ଡକାୟତି ଉଦ୍ଦେଶ୍ୟରେ ସମ୍ପୃକ୍ତ ୭ଜଣ ଆସିଥିବା ତଦନ୍ତରୁ ଜଣାପଡ଼ିବା ପରେ ନଂ. ୪/୨୨ରେ ମାମଲା ରୁଜୁ କରାଯାଇ ସେମାନଙ୍କୁ ଗିରଫ କରାଯାଇଥିଲା। ଗିରଫ ଅଭିଯୁକ୍ତମାନେ ହେଲେ ଖୋର୍ଦ୍ଧା ଜିଲା ମଞ୍ଚେଶ୍ୱର ଥାନା ରୁକୁଟା ଗ୍ରାମର ଦେବାଶିଷ ରାଉତ(୨୬), ଢେଙ୍କାନାଳ ଜିଲା ସଦର ଥାନା ଶିଆରିଆ ଗ୍ରାମର ସୁନୀଲ କୁମାର ରାଉତ(୨୮), କଟକ ଜିଲା ଆଠଗଡ ଥାନା ଲକ୍ଷ୍ମୀନାରାୟଣପୁର ଗ୍ରାମର ଉମେଶ ଚନ୍ଦ୍ର ସାମଲ(୨୭), ସୁବାଶିଷ ସାହାଣୀ(୩୫), ଢେଙ୍କାନାଳ ଜିଲା ରାସୋଳ ଥାନା ବ୍ରହ୍ମପୁର ଗ୍ରାମର ରାଜେଶ ପ୍ରଧାନ(୨୨), କଟକ ଜିଲା ଆଠଗଡ ଥାନା ଉପରସାହିର ଜିତୁରଞ୍ଜନ ବେହେରା(୨୭), ଅନୁଗୋଳ ଜିଲା ଜରପଡା ଥାନା ଜରପଡା ଗ୍ରାମର ସୁଶାନ୍ତ ସାହୁ(୨୬)। ଉକ୍ତ ଗ୍ୟାଙ୍ଗ ବଇଣ୍ଡା ଅଞ୍ଚଳରେ ହୋଇଥିବା ବ୍ୟାଙ୍କରୁ ଚୋରି ଘଟଣାରେ ସମ୍ପୃକ୍ତ ଥାଇପାରନ୍ତି ବୋଲି ସନ୍ଦେହ କରୁଛି। ଆବଶ୍ୟକ ପଡିଲେ ସେମାନଙ୍କୁ ରିମାଣ୍ଡରେ ଅଣାଯିବ ବୋଲି ନିଶା ଶିଳ୍ପାଞ୍ଚଳ ପୋଲିସ ପ୍ରକାଶ କରିଛି।