ଧର୍ମଶାଳା,୩ା୯(ଡି.ଏନ.ଏ.): ଯାଜପୁର ଜିଲା ଧର୍ମଶାଳା ଥାନା ଅନ୍ତର୍ଗତ ନେଉଳପୁର ବାଜାରରୁ ଏସ୍ବିଆଇ ଏଟିଏମ୍ ଲୁଟ୍ ଘଟଣାର ପର୍ଦ୍ଦାଫାଶ କରିଛି ପୋଲିସ। ଲୁଟ୍ ଘଟଣାରେ ସମ୍ପୃକ୍ତ ରାଜସ୍ଥାନର ୫ ଯୁବକଙ୍କ ସମେତ ଓଡ଼ିଶାର ୨ଜଣ ଯୁବକଙ୍କୁ ମିଶାଇ ମୋଟ୍ ୭ଜଣଙ୍କୁ ପୋଲିସ ଗିରଫ କରି ଶୁକ୍ରବାର କୋର୍ଟଚାଲାଣ କରିଛି। ଏଥିସହିତ ସେମାନଙ୍କ ନିକଟରୁ ନଗଦ ୩ ଲକ୍ଷ ୬୮ ହଜାର ଟଙ୍କା, ନମ୍ବର ପ୍ଲେଟ୍ ବଦଳାଯାଇ ଡକାୟତିରେ ବ୍ୟବହୃତ ହୋଇଥିବା ୨ଟି କାର୍, ଲୁଟ୍ ଏଟିଏମ୍, ଲୁଟରେ ବ୍ୟବହୃତ ସରଞ୍ଜାମ, ୮ଟି ମୋବାଇଲ ଫୋନ ଓ ୧୦ଟି ସିମ୍ କାର୍ଡ ଜବତ କରାଯାଇଛି। ଗିରଫ ଅଭିଯୁକ୍ତ ହେଲେ ରାଜସ୍ଥାନ ଅଲୱର ଜିଲାର ଅସଲମ ହାସମି(୩୫), ସଦାମ ହୋସେନ (୩୦), ମହମ୍ମଦ ଜମସେଦ ଖାଁ (୩୨), ସୁମୀତ କୁମାର (୩୨), ରାଜସ୍ଥାନ ଦୌସା ଜିଲାର ଏମ୍ପି ମିନା(୨୩) ଓ ଏମାନଙ୍କୁ ଦାନଗଦିଠାରେ ଘରଭଡ଼ା ଯୋଗାଇ ଥିବା ଯାଜପୁର ରୋଡ୍ ଥାନା ଅଧୀନ ଦାନଗଦୀ ତ୍ରିଜଙ୍ଗା ଅଞ୍ଚଳର ସେକ୍ ଇଦ୍ରିସ (୩୬) ଏବଂ ଅଭିଯୁକ୍ତଙ୍କୁ ସିମ୍ କାର୍ଡ ଯୋଗାଇଥିବା ଖୋର୍ଦ୍ଧା ଜିଲା ଚତ୍ରମା ଅଞ୍ଚଳର ତପନ କୁମାର ପ୍ରଧାନ(୨୮)। ଯାଜପୁର ଏସ୍ପି ରାହୁଲ ପିଆର୍ ଧର୍ମଶାଳା ଥାନାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଏ ସମ୍ପର୍କରେ ସୂଚନା ଦେଇଛନ୍ତି।
ଏସ୍ପି କହିଛନ୍ତି, ଧର୍ମଶାଳା ଥାନା ନେଉଳପୁର ବଜାରରେ ଥିବା ଏଟିଏମ୍କୁ ଗତ ମାସ ୨୪ ତାରିଖ ରାତିରେ ଦୁର୍ବୃତ୍ତ ତାଡ଼ି ନେଇଥିଲେ। ଏହି ଘଟଣା ୨୫ ତାରିଖ ସକାଳେ ଜଣାପଡ଼ବା ପରେ ଏସ୍ବିଆଇ ଏଟିଏମ୍ ପ୍ରୋଜେକ୍ଟ ମ୍ୟାନେଜର ପ୍ରୀତମ କୁମାର ଥାନାରେ ଅଭିଯୋଗ କରିଥିଲେ। ପୋଲିସ ନଂ.୪୮୫/୨୨ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଲୁଟ ଏଟିଏମ୍ରେ ୫ଲକ୍ଷ ୬୭ ହଜାର ୫ ଶହ ଟଙ୍କା ଥିଲା। ପୋଲିସ ବିଶେଷ ସୂତ୍ରରୁ ଖବର ପାଇ ଅଭିଯୁକ୍ତଙ୍କ ପାଇଁ ଘରଭଡ଼ା ଯୋଗାଡ଼ କରିଥିବା ଦାନଗଦୀ ଅଞ୍ଚଳର ଇଦ୍ରିସଙ୍କୁ ପ୍ରଥମେ ଗିରଫ କରିଥିଲା। ତାଙ୍କଠାରୁ ତଥ୍ୟ ହାସଲ ପରେ ଅଭିଯୁକ୍ତଙ୍କୁ ଗିରଫ କରିବାକୁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ଏହି ଅଭିଯୁକ୍ତମାନେ ମୟୂରଭଞ୍ଜ ଜିଲାରେ ଏଭଳି ଏକ ଏଟିମ୍ ଲୁଟ୍ ଯୋଜନା କରିଥିଲେ। ଖବର ପାଇ ମୟୂରଭଞ୍ଜ ପୋଲିସ ସେମାନଙ୍କୁ ଧରିବା ପାଇଁ ଉଦ୍ୟମ ଚଳାଇଥିଲା। ପରେ ମୟୂରଭଞ୍ଜ ଓ ଯାଜପୁର ପୋଲିସ ମିଳିତ ଭାବେ ଦାନଗଦୀ ଅଞ୍ଚଳରେ ଚଢ଼ାଉ କରି ରାଜସ୍ଥାନର ୫ ଯୁବକଙ୍କୁ ଗିରଫ କରିଥିଲେ। ଏହାପରେ ସିମ୍ ବ୍ୟବସାୟୀ ତପନଙ୍କୁ ଗିରଫ କରାଯାଇଥିଲା। ଅଭିଯୁକ୍ତଙ୍କ ବୟାନ ଅନୁଯାୟୀ, ଅଗଷ୍ଟ ୨୦ରେ ସେମାନେ ରାଜସ୍ଥାନରୁ ଆସି ଦାନଗଦୀ ଅଞ୍ଚଳରେ ଏକ ଭଡ଼ା ଘର ନେଇ ରହିବା ସହ ଖୋର୍ଦ୍ଧା ଅଞ୍ଚଳର ମୋବାଇଲ୍ ସିମ ବ୍ୟବସାୟୀ ତପନଙ୍କ ପାଖରୁ ୧୦ଟି ସିମ୍ କିଣିଥିଲେ। ଏହି ଖବରଦାତା ସମ୍ମିଳନୀରେ ଯାଜପୁର ଏସ୍ଡିପିଓ ପ୍ରମୋଦ ମଲ୍ଲିକ ଓ ଧର୍ମଶାଳା ଥାନା ଅଧିକାରୀ ରାକେଶ ତ୍ରିପାଠୀ ଉପସ୍ଥିତ ଥିଲେ।