ଲୁଧିଆନା, ୨୦।୪ : ପଞ୍ଜାବର ଲୁଧିଆନାରେ ଦୁଃଖଦାୟକ ଘଟଣା ଘଟିଛି। ଏକ ଝୁମ୍ପୁଡ଼ି ଘରେ ନିଆ ଲାଗି ଗୋଟିଏ ପରିବାରର ୭ ଜଣ ଜୀବନ୍ତ ଦଗ୍ଧ ହୋଇଛନ୍ତି। ସେମାନଙ୍କର ନିଦ ହେଲା ଶେଷନିଦ୍ରା ପାଲଟିଛି। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ଜବତ କରି ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ବୁଧବାର ସକାଳେ ଏହି ଦୁଃଖଦାୟକ ଘଟଣା ଘଟଛି। ସହକାରୀ ପୋଲିସ କମିଶନର (ପୂର୍ବ) ଲୁଧିଆନା, ସୁରିନ୍ଦର ସିଂ କହିଛନ୍ତି ଯେ ସେମାନେ ପ୍ରବାସୀ ଶ୍ରମିକ ଏବଂ ଏଠାରେ ଟିବ୍ବା ରୋଡରେ ଥିବା ମ୍ୟୁନିସିପାଲିଟି ଅଳିଆ ଆବର୍ଜନା ଘର ନିକଟରେ ନିଜ ଝୁମ୍ପୁଡ଼ି ଘରେଶୋଇଥିଲେ। ଟିବ୍ବା ପୋଲିସ ଷ୍ଟେସନର ଏସ୍ଏଚ୍ଓ ରଣବୀର ସିଂ ସୂଚନା ଦେଇଛନ୍ତି ଯେ ଦମ୍ପତି ଏବଂ ସେମାନଙ୍କର ପାଞ୍ଚ ସନ୍ତାନ ଝୁମ୍ପୁଡ଼ି ଘରେ ଶୋଇଥିଲେ।
ସୁରେଶ ସାଇନି (୫୫), ରୋଶନୀ ଦେବୀ (୫୦), ରାଖୀ କୁମାରୀ (୨୫), ମନୀଷା କୁମାରୀ (୧୦), ଚନ୍ଦା କୁମାରୀ (୮), ଗୀତା କୁମାରୀ (୬), ସନ୍ନି (୨)ଙ୍କର ଏହି ଘଟଣାରେ ମୃତ୍ୟୁ ଘଟିଥିବା ପୋଲିସ କହିଛି। ପରିବାରର ଜଣେ ସଦସ୍ୟ ରାଜେଶ କୁମାର ଜୀବିତ ଅଛନ୍ତି। ସେମାନେ ବିହାରର ସମସ୍ତିପୁରର ବାସିନ୍ଦା। ରାତ୍ରୀ ଭୋଜନ ପରେ ପରିବାର ଲୋକ ରାତି ଆଠଟା ବେଳେ ଶୋଇଥିଲେ ବୋଲି ରାକେଶ କହିଛନ୍ତି।