ମୁମ଼୍ବାଇ, ୧୩।୦୭: ମହାରାଷ୍ଟ୍ର ରାଜନୀତିରେ ଘଡ଼ିକେ ଘୋଡ଼ା ଛୁଟୁଛି କହିଲେ ଚଳେ । ବିରୋଧୀ ଦଳ ମେଣ୍ଟ ମହା ବିକାଶ ଅଘାଡ଼ି ପାଇଁ ଏବେ ଚିନ୍ତା ବଢ଼ିଛି । ଲୋକସଭା ନିର୍ବାଚନରେ ବିରୋଧୀ ମେଣ୍ଟ ୪୮ରୁ ୩୦ ଲୋକସଭା ଆସନ ହାତେଇବା ପରେ ଦଳ ଏବେ କଂଗ୍ରେସର କିଛି ବିଧାୟକଙ୍କୁ ନେଇ ଅଡ଼ୁଆରେ ପଡ଼ିଛି । କାରଣ ବିଧାନ ପରିଷଦ ନିର୍ବାଚନରେ ହୋଇଥିବା ଭୋଟରେ କଂଗ୍ରେସର ୭ ବିଧାୟକ କ୍ରସ୍ ଭୋଟିଂ କରିଛନ୍ତି । ଭାରତୀୟ ଜନତା ପାର୍ଟିର ମେଣ୍ଟକୁ ଏମାନେ ସମର୍ଥନ ଜଣାଇଛନ୍ତି । ଯାହିକି ଏବେ ବିରୋଧୀଙ୍କ ଚିନ୍ତା ବଢ଼ାଇଛି ।
ସୂଚନା ଥାଉକି, ଭାରତୀୟ ଜନତା ପାର୍ଟିର ମେଣ୍ଟ ମହାରାଷ୍ଟ୍ରରେ ହୋଇଥିବା ବିଧାନ ପରିଷଦ ନିର୍ବାଚନର ୧୧ ଆସନରୁ ୯ଟିରେ ବିଜୟ ହାସଲ କରିଛି । ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ଶିବ ସେନା, ଏନ୍ସିପିର ଉପ-ମୁଖ୍ୟମନ୍ତ୍ରୀ ଅଜିତ୍ ପାୱାର ଏବଂ ଭାଜପା ମିଳିତ ଭାବେ ଏହି ବିଜୟ ହାସଲ କରିଛନ୍ତି । ଲୋକସଭା ନିର୍ବାଚନରେ ମେଣ୍ଟ ସେତେଟା ଭଲ ପ୍ରଦର୍ଶନ କରିନଥିବା ବେଳେ ବିଧାନ ପରିଷଦ ନିର୍ବାଚନରେ ୧୧ରୁ ୯ ସିଟ୍ ହାତେଇବାକୁ ସକ୍ଷମ ହୋଇଛି ।
ଭାଜପା ନେତା ପଙ୍କଜ ମୁଣ୍ଡେ, ପରିଣୟ ଫୁକେ ଏବଂ ଯୋଗେସ ତିଲେକରଙ୍କୁ ୨୬ ଟି ଲେଖାଏଁ ଭୋଟ ମିଳିଛି । ପାୱାରଙ୍କ ଦଳରୁ ରାଜେଶ ଭିଟେକାର ଏବଂ ଶିବାଜୀରାଓ ଗାର୍ଜେ ଏହି ନିର୍ବାଚନରେ ବିଜୟ ହାସଲ କରିଛନ୍ତି । ଅନ୍ୟପଟେ ଶିନ୍ଦେ ସେନାର ଭବନ ଗ଼୍ବାଲି ମଧ୍ୟ ନିର୍ବାଚନ ଜିତିଛନ୍ତି । ଅନ୍ୟପଟେ ବିରୋଧୀ ଦଳ କଂଗ୍ରେସ, ଉଦ୍ଧବ ଗୋଷ୍ଠୀ ଶିବସେନା ଏବଂ ଏନ୍ସିପିର ମେଣ୍ଟ ମହା ବିକାଶ ଅଗାଡ଼ି, ଉଦ୍ଧବ ଠାକ୍ରେ ଏବଂ ଶରଦ ପାୱାରଙ୍କ ନେତୃତ଼୍ବରେ ୩ ଟି ଆସନ ହାତେଇବାକୁ ସକ୍ଷମ ହୋଇଛି ।