ବ୍ରହ୍ମପୁର ଅଫିସ,୨୦ା୮: ମଦ ବ୍ୟବସାୟୀଙ୍କୁ ଦାଦାବଟି ମାଗିବା ସହ ତାଙ୍କ ଦୋକାନର ସେଲସମ୍ୟାନ୍ଙ୍କୁ ହତ୍ୟା ଉଦ୍ୟମ କରିଥିବା ଘଟଣାରେ ସଦର ଥାନା ପୋଲିସ ଘଟଣାର ମାଷ୍ଟରମାଇଣ୍ଡ୍ ସମେତ ୭ ଜଣଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ ମାଷ୍ଟରମାଇଣ୍ଡ୍ ବେନ୍ଦାଳିଆ ଗ୍ରାମର ଦୁର୍ଦ୍ଦାନ୍ତ ଅପରାଧୀ କାହ୍ନା ପଡିହାରୀ (୩୨), ମାରବାଡ଼ି ଦାସ((୩୦) , ରାମ ଦାସ(୨୨) , ସୋନୁ ଦାସ(୨୦) , ଜିତେନ୍ଦ୍ର ଦାସ (୨୮),ମୁନା ଦାସ(୨୨) ଓ କାଳିଆ ଗୌଡ଼(୩୦)। କେସ୍ ନମ୍ବର ୨୩୨/୨୦ ଅନୁସାରେ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି ବୋଲି ଥାନାଧିକାରୀ ସନ୍ତୋଷିନୀ ଓରାମ ସୂଚନା ଦେଇଛନ୍ତି। ସେମାନଙ୍କ ନିକଟରୁ ଘଟଣା ସମୟରେ ବ୍ୟବହୃତ ଗୋଟିଏ କଟୁରି, ଗୋଟିଏ ଠେଙ୍ଗା ଓ ୨ଟି ବାଇକ୍ ମଧ୍ୟ ଜବତ ହୋଇଥିବା ସେ କହିଛନ୍ତି ।
ସୂଚନାଯୋଗ୍ୟ, କୁଆଁରପୁର ଗ୍ରାମରେ ଥିବା ଏକ ଦେଶୀ ମଦ ଦୋକାନ ମାଲିକଙ୍କୁ କାହ୍ନା ମାସକୁ ୧୦ ହଜାର ଟଙ୍କା ଦାଦାବଟି ମାଗିବା ସହ ଧମକ ଦେଇଥିଲେ। ଦାଦାବଟି ନ ଦେଲେ ଦୋକାନ ଉଡାଇଦେବାକୁ ଧମକଚମକ ଦେଇଥିଲେ। ଗତ ୧୭ ତାରିଖରେ ବ୍ୟବସାୟୀ ଜଣଙ୍କ ଦାଦାବଟି ଦେବାକୁ ମନା କରିବାରୁ କାହ୍ନା ଓ ତାଙ୍କ ସହଯୋଗୀମାନେ ସେଠାରେ ପହଞ୍ଚି ଆତଙ୍କରାଜ ଖେଳାଇଥିଲେ। ଦୋକାନ ଭିତରେ ସେଲ୍ସମ୍ୟାନ୍ ଭାବେ କାମ କରୁଥିବା ସୁଦାମ ପ୍ରଧାନଙ୍କୁ ଦୋକାନ ଭିତରୁ ଟାଣି ଆଣି ତାଙ୍କ ବେକରେ କଟୁରି ରଖି ଜୀବନରେ ମାରିଦେବାକୁ ଧମକ ଦେଇଥିଲେ। ସେଠାରେ ଥିବା ଅନ୍ୟ କେତେକ ଲୋକଙ୍କୁ ମଧ୍ୟ ଅପରାଧୀମାନେ ଆକ୍ରମଣ କରିଥିଲେ। ଘଟଣାର ଖବର ପାଇ ପୋଲିସ ସେଠାରେ ପହଞ୍ଚି ସୁଦାମଙ୍କ ଅଭିଯୋଗ କ୍ରମେ ଏକ ମାମାଲା ରୁଜୁ କରି ତଦନ୍ତ ଆରମ୍ଭ କରିଥିଲା।
