ଭଦ୍ରକ ଅଫିସ,୩ା୬: ବାଲେଶ୍ୱର ଜିଲା ବାହାନଗାଠାରେ ଶୁକ୍ରବାର ସନ୍ଧ୍ୟାରେ ଘଟିଥିବା ଭୟଙ୍କର ଦୁର୍ଘଟଣାରେ ଭଦ୍ରକ ଜିଲାର ୪ଜଣଙ୍କର ମୃତ୍ୟୁ ଘଟିଥିବା ଜଣାପଡ଼ିଛି। ମୃତକମାନେ ହେଲେ ଭଣ୍ଡାରିପୋଖରୀ ବ୍ଲକ ମଞ୍ଜୁରୀରୋଡ୍ ନିକଟସ୍ଥ ଶଙ୍ଖୁଳା ଗ୍ରାମର ରୂପକ ନାୟକ(୩୫), ବାସୁଦେବପୁର ବ୍ଲକର ସାବରଙ୍ଗ ପଞ୍ଚାୟତ ବଳସାହିର ରାଜେଶ ବଳ(୩୦), ସୁଗୋ ପଞ୍ଚାୟତ ସାହୁ ସାହିର ଗୋବିନ୍ଦ ସାହୁ(୨୧), ତିହିଡ଼ି ବ୍ଲକ କୁବେରା ଗ୍ରାମର ହରିହର ସାହୁ(୫୪), ଭଦ୍ରକ ବ୍ଲକ ଚାରିଘରିଆ ଗ୍ରାମର ନାରାୟଣ ଦାସ(୫୫), ଗ୍ରାମାଞ୍ଚଳ ଥାନା ଅଧୀନ ବରାଳପୋଖରୀ ଗ୍ରାମର ଅମିୟ କୁମାର ବନ୍ଧ (୬୪) ଓ ଧାମନଗର ବ୍ଲକ ଧୂଷୁରୀ ଥାନା ଅଧୀନ ଅର୍ଜୁନପୁର ବାଲିପାଟଣା ଗ୍ରାମର ଆଲୋକ ନାୟକ(୨୭)।
ଗୋବିନ୍ଦ କୋଲକାତାରୁ କରମଣ୍ଡଳ ଏକ୍ସପ୍ରେସ୍ରେ ଘରକୁ ଫେରୁଥିଲେ। ସେ କୋଲକାତାରେ ପାଇପ୍ ମିସ୍ତ୍ରୀ ଭାବେ କାର୍ଯ୍ୟ କରୁଥିଲେ। ଟ୍ରେନ୍ ଦୁର୍ଘଟଣା ଖବରପାଇ ପରିବାର ଲୋକେ ତାଙ୍କ ମୋବାଇଲକୁ କଲ୍ କରିଥିବା ବେଳେ ଅନ୍ୟ ଜଣେ ଉଠାଇ ତାଙ୍କର ମୃତ୍ୟୁ ନେଇ ସୂଚନା ଦେଇଥିଲେ। ପରିବାର ଲୋକେ ଶନିବାର ଗୋବିନ୍ଦଙ୍କ ମୃତଦେହ ଗ୍ରାମକୁ ଆଣି ଅନ୍ତିମ ସଂସ୍କାର କରିଛନ୍ତି। ଗୋବିନ୍ଦ ଗତବର୍ଷ ବିବାହ କରିଥିବା ବେଳେ ତାଙ୍କର ଏକ ଶିଶୁକନ୍ୟା ଅଛନ୍ତି। ଘରକୁ ଫେରୁଛି ଫୋନ୍ କରି କହିଥିଲେ ମଧ୍ୟ ପହଞ୍ଚି ପାରି ନ ଥିଲେ।
ରାଜେଶ ବାଲେଶ୍ୱରରୁ ଏକ ବୀମା କମ୍ପାନୀର ମିଟିଂ ସାରି ସେହି ଟ୍ରେନ୍ରେ ଫେରୁଥିବା ବେଳେ ଏହି ଦୁର୍ଘଟଣାର ଶିକାର ହୋଇଛନ୍ତି। ତାଙ୍କ ମୃତଦେହ ଗ୍ରାମରେ ପହଞ୍ଚତ୍ବା ପରେ ଶୋକାକୁଳ ପରିବେଶ ସୃଷ୍ଟି ହୋଇଛି। ସେ ଜଣେ ଉଦୀୟମାନ କ୍ରିକେଟ ଖେଳାଳି ସହ ସାମାଜିକ କର୍ମୀ ଥିଲେ। ହରିହର ବାଲେଶ୍ୱର ବିର୍ଲା ଟାୟାରରେ ଚାକିରି କରୁଥିଲେ। ସେ ଭଦ୍ରକରୁ ଯଶୋବନ୍ତପୁର ହାଓ୍ବଡ଼ା ଟ୍ରେନ୍ରେ ବାଲେଶ୍ୱର ଯାଉଥିବା ବେଳେ ଦୁର୍ଘଟଣାରେ ମୃତ୍ୟୁ ଘଟିଛି।