ଖୋର୍ଦ୍ଧା ଅଫିସ,୧୦ା୧୦: ଦୀର୍ଘଦିନ ଧରି ପୋଲିସ ଆଖିରେ ଧୂଳି ଦେଇ ୧୬ନମ୍ବର ଜାତୀୟ ରାଜପଥରେ ଲୁଟପାଟ ଓ ଡକାୟତି କରୁଥିବା ଏକ ହାଇୱେ ଲୁଟେରା ଗ୍ୟାଙ୍ଗ ଖୋର୍ଦ୍ଧା ପୋଲିସ ହାତରେ ଧରାପଡ଼ିଛି। ଶନିବାର ବିଳମ୍ବିତ ରାତିରେ ତୋଟାପଡ଼ା ଖୋର୍ଦ୍ଧା ଟାଉନ ଷ୍ଟେଶନ ନିକଟରେ ଏକ ଗ୍ୟାଙ୍ଗ ରାଜପଥରେ ମାଲବାହୀ ଟ୍ରକ ସମେତ ଡ୍ରାଇଭରଙ୍କୁ ଅପହରଣ ଲାଗି ଯୋଜନା କରୁଥିବା ଖବରପାଇ ପାଟ୍ରୋଲିଂ କରୁଥିବା ପୋଲିସ ଟିମ୍ ପହଞ୍ଚି ଘଟଣାସ୍ଥଳରୁ ୭ଜଣଙ୍କୁ ଗିରଫ କରିଛି। ସେମାନଙ୍କ ନିକଟରୁ ଏକ ନମ୍ବର ବିହୀନ କାର୍, ନଗଦ ୮୦ହଜାର ଟଙ୍କା, ୨ଟି ଚାପଡ଼, ଲୁହାରଡ, ପ୍ଲାଷ୍ଟିକ ପାଇପ, ୩ଟି କାଠବାଡି ଜବତ କରାଯାଇଛି। ଗିରଫ ଅଭିଯୁକ୍ତମାନେ ହେଲେ ବେଗୁନିଆ ଥାନା ଅନ୍ତର୍ଗତ କୁଶପଲ୍ଲାର ଏସ୍.କେ. ଜାଫର ଓରଫ ରାଜା (୨୭), ଡ୍ରାଇଭର ଶୁଭମ ମହାପାତ୍ର (୨୧), ପ୍ରତାପ କୁମାର ସାହୁ(୨୨), ଖୋର୍ଦ୍ଧା ଥାନା ଅଧୀନ ତରତୁଆର ଅଲିମ ଖାନ(୨୧) ଓ ଚନ୍ଦନ କୁମାର ବେହେରା (୪୧), ଭୁବନେଶ୍ୱର ଖଣ୍ଡିଗିରି ଥାନା ଅଧୀନ ଯଦୁପୁରର ଅବଦୁଲ୍ ଜାହିର ଖାନ (୨୫) ଏବଂ ଏମ୍.ଡି. ସାଜିଦ୍(୨୬)। ଏମାନଙ୍କ ସହ ଆଉ କେଉଁମାନେ ସମ୍ପୃକ୍ତ ସେ ନେଇ ପୋଲିସ ଖୋଳତାଡ଼ କରୁଛି।
ସୂଚନା ଅନୁଯାୟୀ, ଅନ୍ଧାର ରାତିର ସୁଯୋଗ ନେଇ ଭୁବନେଶ୍ୱର-ଚେନ୍ନାଇ ୧୬ ନମ୍ବର ଜାତୀୟ ରାଜପଥରେ ଏକ ଲୁଟେରା ଗ୍ୟାଙ୍ଗ ମାରଣାସ୍ତ୍ର ଦେଖାଇ ଗତ କିଛି ଦିନ ଧରି ମାଲବାହୀ ଟ୍ରକ, ଯାନବାହନ ପ୍ରଭୃତି ଅଟକାଇ ଲୁଟ୍ପାଟ୍ କରୁଥିଲେ। ଏହି ଖବର ପୋଲିସ ନିକଟରେ ପହଞ୍ଚିଥିଲା। ଏହାପରେ ଏସ୍ପିଙ୍କ ନିର୍ଦ୍ଦେଶ କ୍ରମେ ପୋଲିସ ପକ୍ଷରୁ ହାଇୱେ ପାଟ୍ରୋଲିଂ ଏବଂ ରାତ୍ରକାଳୀନ ପାଟ୍ରୋଲିଂକୁ କଡ଼ାକଡି କରାଯାଇଥିଲା। ଶନିବାର ରାତିରେ ଟାଉନ ଥାନା ଏସ୍ଆଇ ସୁକାନ୍ତ କୁମାର ଦଳାଇ ପାଟ୍ରୋଲିଂ କରୁଥିବା ବେଳେ ଜାତୀୟ ରାଜପଥରେ ଲୁଟ୍ପାଟ୍ ଲାଗି ଏକ ଗ୍ୟାଙ୍ଗ ଯୋଜନା କରୁଥିବା ଖବର ପାଇଥିଲେ। ତାଙ୍କ ସହିତ ଏସ୍ଆଇ ସସ୍ମିତା ବେହେରା, ଏଏସ୍ଆଇ ପି.କେ. ପ୍ରଧାନ, ହାବିଲଦାର ବି.କେ. ପାତାଳସିଂ, କନଷ୍ଟେବଳ ପ୍ରଦୀପ ହରିଚନ୍ଦନ ଏବଂ ଏମ୍.ଖାନ ପ୍ରମୁଖ ସାମିଲ ହୋଇଥିଲେ। ଲୁଟେରାମାନେ ଏକ ନମ୍ବର ବିହୀନ କାର୍ରେ ମାରଣାସ୍ତ୍ର ସହ ଲୁଟ୍ ଯୋଜନା କରୁଥିବେଳେ ପୋଲିସ ସେମାନଙ୍କୁ ଘେରିଯାଇ କାବୁ କରିଥିଲା। ସେମାନଙ୍କୁ ପଚରାଉଚରା ବେଳେ ରାଜପଥରେ ଲୁଟ୍ ଯୋଜନା ସମ୍ପର୍କରେ ପୋଲିସ ଆଗରେ ସ୍ବୀକାର କରିଥିବା ଏସ୍ଆଇ ଦଲାଇ କହିଛନ୍ତି। ଏହି ଗ୍ୟାଙ୍ଗର ଚେର କେତେବାଟ ପର୍ଯ୍ୟନ୍ତ ଲମ୍ବିଛି, ତାହାର ଖୋଳତାଡ଼ ଚାଲିଛି ବୋଲି ସେ କହିଛନ୍ତି।