ଚିପଲୁନ୍,୨୭।୭: ମହାରାଷ୍ଟ୍ରରେ ବହୁ ଅଞ୍ଚଳରେ ବର୍ଷା ଓ ବନ୍ୟା ଯୋଗୁଁ ଏପର୍ଯ୍ୟନ୍ତ ୧୬୪ ଜଣ ଲୋକ ପ୍ରାଣ ହରାଇଥିବାବେଳେ ୧୦୦ ଜଣ ନିଖୋଜ ଅଛନ୍ତି। ରତ୍ନାଗିରି, କୋଲହାପୁର, ସାଙ୍ଗଲି ଏବଂ ରାୟଗଡ ଭଳି ଜିଲ୍ଲା ଏବେ ବି ପାଣିରେ ବୁଡି ରହିଛି। ପ୍ରାକୃତିକ ବିପର୍ଯ୍ୟୟ ସମୟରେ ବି ସରକାରୀ ରାଜସ୍ବକୁ ସୁରକ୍ଷିତ ରଖିବା ଲାଗି ନିଆରା କାର୍ଯ୍ୟ କରି ଜଣେ ବସ୍ ଡିପୋ ମ୍ୟାନେଜର ଅନ୍ୟମାନଙ୍କ ପାଇଁ ଏକ ଉଦାହରଣ ସୃଷ୍ଟି କରିଛନ୍ତି। ରତ୍ନାଗିରିର ଚିପଲୁନ୍ରେ ବର୍ଷା ଓ ବନ୍ୟା ଯୋଗୁଁ ସଙ୍କଟ ପରିସ୍ଥିତି ମଧ୍ୟରେ ବସ ଡିପୋ ମ୍ୟାନେଜର ରଣଜିତ୍ ରାଜଶୀରକେ ରାଜ୍ୟ ପରିବହନ ବିଭାଗର ୯ ଲକ୍ଷ ଟଙ୍କାର ରାଜସ୍ବକୁ ସୁରକ୍ଷିତ ରଖିପାରିଛନ୍ତି। ଏବେ ଏହି ଘଟଣା ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି। ପ୍ରବଳ ବର୍ଷା ପରେ ଜଳ ସ୍ତର ବଢୁଥିବାବେଳେ ରଣଜିତ୍ ସକାଳ ୪ଟା ୩୦ରେ କାର୍ଯ୍ୟାଳୟରେ ପହଞ୍ଚି ସଂଗ୍ରୁହୀତ ହୋଇଥିବା ରାଜସ୍ବ ହାତରେ ଧରି ବାହାରକୁ ଆସିଥିଲେ। ତେବେ ବସ୍ ଡିପୋ ପାଣିରେ ବୁଡ଼ିଯାଇଥିବାର ଦେଖି ପାଣିରେ ବୁଡ଼ି ଯାଇଥିବା ଏକ ବସ୍ ଛାତ ଉପରକୁ ଚଢ଼ିଯାଇଥିଲେ। ତାଙ୍କ ସହିତ କାର୍ଯ୍ୟାଳୟର ୬ ସଦସ୍ୟ ଭୋର୍ ସକାଳ ୫ଟା ୩୦ରେ ବସ ଛାତ ଉପରକୁ ଚଢ଼ି ସେଠାରେ ୭ ଘଣ୍ଟା ବସି ରହିଥିଲେ। ପରେ ସେମାନଙ୍କୁ ଏନଡିଆରଏଫ ଉଦ୍ଧାରକାରୀ ଦଳ ଉଦ୍ଧାର କରିଥିଲେ। ସେହି ମୁହୂର୍ତ୍ତକୁ ମନେ ପକାଇ ରଣଜିତ କୁହନ୍ତି, ’ଏହା ବହୁତ ଭୟାନକ ଥିଲା। ଏମିତି ଏକ ସମୟ ଆସିଲା ଯେତେବେଳେ ଜଳ ସ୍ତର ବହୁତ ଉଚ୍ଚକୁ ବଢ଼ିଗଲା ଏବଂ ବସ ଥରିିବାକୁ ଲାଗିଲା। ଆମେ ଭୟଭୀତ ହୋଇ ଯାଇଥିଲୁ। ଯେ କୌଣସି ସମୟରେ ଆମେ ବସରୁ ଖସିପଡିବାର ଆଶଙ୍କା ଥିଲା। କିନ୍ତୁ ଆମେ ସେଠାରେ ମନୋବଳ ଦୃଢ଼ କରି ଅଟକି ରହିଲୁ। ରାଜ୍ୟ ସରକାର ଏବେ ରଣଜିତ ଏବଂ ତାଙ୍କ ସହିତ ବସ ଛାତରେ ବସି ରହିଥିବା ସଦସ୍ୟଙ୍କୁ ସମ୍ମାନିତ କରିବାକୁ ଯୋଜନା କରୁଛନ୍ତି।
