ଭଞ୍ଜନଗର,୧୧ା୧୧(ଡି.ଏନ୍.ଏ.): ସାଧାରଣ ନିର୍ବାଚନ ପୂର୍ବରୁ ଶାସକ ବିଜେଡି ପକ୍ଷରୁ ଅନେକ ପ୍ରକଳ୍ପର ଉଦଘାଟନ ପାଇଁ ପ୍ରସ୍ତୁତି ଚାଲିଛି। ଅନେକ ବଡ଼ ପ୍ରକଳ୍ପ କାର୍ଯ୍ୟକୁ ତ୍ୱରାନ୍ବିତ କରିବା ପାଇଁ ବାରମ୍ବାର ସମୀକ୍ଷା ହେଉଛି। ଭଞ୍ଜନଗର ପୂର୍ତ୍ତ ବିଭାଗ ନିର୍ବାହୀଯନ୍ତ୍ରୀଙ୍କ ଅଧୀନରେ ୯ଟି ଓଡ଼ିଶା ଆଦର୍ଶ ବିଦ୍ୟାଳୟର ଉନ୍ନତୀକରଣ କାମ ଚାଲିଛି। ସେଥିମଧ୍ୟରୁ ବର୍ତ୍ତମାନ ୬ଟି ବିଦ୍ୟାଳୟରେ ଗୋଟିଏ ଲେଖାଏ ଶହେ ଶଯ୍ୟା ବିଶିଷ୍ଟ ଛାତ୍ରୀ ନିବାସ ନିର୍ମାଣ ହେଉଛି। ସେଥିମଧ୍ୟରେ ଭଞ୍ଜନଗର ବ୍ଲକ ଜିଲୁଣ୍ଡି ଆଦର୍ଶ ବିଦ୍ୟାଳୟ, ଜଗନ୍ନାଥପ୍ରସାଦ ବ୍ଲକ ଜାମଗୋରଡ଼ା, ଆସିକା ବ୍ଲକ ନିମିନା, ବେଲଗୁଣ୍ଠା ବ୍ଲକ କ୍ଷତ୍ରିୟବରପୁର, ବୁଗୁଡ଼ାର ଗୋଲିଆ, ପୋଲସରା ବ୍ଲକର ହାତୀଓଟସ୍ଥିତ ଆଦର୍ଶ ବିଦ୍ୟାଳୟ ରହିଛି। ଏ ବାବଦରେ ୧୭ କୋଟି ୭୭ଲକ୍ଷ ଟଙ୍କା ଖର୍ଚ୍ଚ ହେଉଛି। ସେହିପରି ୯ ଆଦର୍ଶ ବିଦ୍ୟାଳୟର ବାଉଣ୍ଡାରୀ ଏବଂ ଭିତ୍ତିଭୂମି ପୁନରୁଦ୍ଧାର ଓ ନୂତନ କୋଠା ନିର୍ମାଣ ବାବଦକୁ ୧୨କୋଟି ୩୧ଲକ୍ଷ ୨ହଜାର ଟଙ୍କା ଖର୍ଚ୍ଚ ହେଉଛି। ସେହିପରି ପୂର୍ତ୍ତ ବିଭାଗ ଅଧୀନ ୭ଟି ଏନଏସିରେ ବିଜୁ ପଟ୍ଟନାୟକ ଇନ୍ଡ଼ୋର ଷ୍ଟାଡ଼ିୟମ(ବହୁମୁଖି ଇନ୍ଡ଼ୋର ଷ୍ଟାଡ଼ିୟମ) ନିର୍ମାଣ ହେଉଛି । ଏ ବାବଦରେ ୪୩ କୋଟି ୯୨ଲକ୍ଷ ୧୮ ହଜାର ଟଙ୍କା ଖର୍ଚ୍ଚ ହେଉଛି ା ଭଞ୍ଜନଗରି, ବେଲଗୁଣ୍ଠା, ବୁଗୁଡ଼ା, ପୋଲସରା, କବିସୂର୍ଯ୍ୟନଗର, ଆସିକା ଓ ସୋରଡ଼ା ଏନ୍ଏସରେ ଏହି ଷ୍ଟାଡିୟମ ନିର୍ମାଣ ଚାଲିଛି।
ଭଞ୍ଜନଗର ନିର୍ବାଚନ ମଣ୍ଡଳୀର ଗାଲେରି-ବଦାଙ୍ଗି ରାସ୍ତାର ଉନ୍ନତୀକରଣ ପାଇଁ ୧୭ କୋଟି ୭୯ଲକ୍ଷ ୬୦ ହଜାର ଟଙ୍କା ଖର୍ଚ୍ଚ ହେଉଛି । ଲାଲସିଂ ବାହାଡ଼ାପଦର ରାସ୍ତା ପାଇଁ ୧୬ କୋଟି ୬୫ଲକ୍ଷ ୩୩ ହଜାର, ପହଣ୍ଡା ଛକରୁ ଗାଲେରି ରାସ୍ତା ପାଇଁ ୨୪ କୋଟି ୯୯ଲକ୍ଷ ୮୬ ହଜାର ଖର୍ଚ୍ଚ ହେଉଛି । ଏସବୁ କାମ ଦ୍ରୁତ ଗତିରେ ଚାଲିଛି । ଅନ୍ୟପକ୍ଷରେ ଭଞ୍ଜନଗର-କୋଟିବିରାଡ଼ି ରାସ୍ତା ପାଇଁ ୧୩କୋଟି ୯୯ଲକ୍ଷ ୬୦ ହଜାର, ଭଞ୍ଜନଗର-କରସିଙ୍ଗି ପାଇଁ ୫୩ କୋଟି ୩୦ଲକ୍ଷ ୨୨ହଜାର ଏବଂ ସୁନାମୁହିଁରୁ ଜଗନ୍ନାଥପ୍ରସାଦ ରାସ୍ତା ପାଇଁ ୧୯ କୋଟି ୯୯ଲକ୍ଷ ୩୫ ହଜାର ଟଙ୍କା ଖର୍ଚ୍ଚ ହେବ। ଉକ୍ତ କାମର ଟେଣ୍ଡର ସରିବା ସହ କାମ ଖୁବଶୀଘ୍ର ଆରମ୍ଭ ହେବାକୁ ଯାଉଛି । ସେହିପରି କଣ୍ଟେଇପଲ୍ଲୀ-ସୋରଡ଼ା ରାସ୍ତା ପାଇଁ ୩୩କୋଟି ୩୦ଲକ୍ଷ ୫୫ ହଜାର, ଧରାକୋଟ ଜାନିବିଲି ରାସ୍ତା ପାଇଁ ୭ କୋଟି ୯୮ଲକ୍ଷ ୯୭ ହଜାର, ହାତୀଓଟ ଢ଼ୁଙ୍କାପଡ଼ା ଭାୟା ଚଢ଼େୟାପଲ୍ଲୀ ରାସ୍ତା ପାଇଁ ୨୩କୋଟି ୯୭ଲକ୍ଷ ୬୮ ହଜାର ଟଙ୍କା ଖର୍ଚ୍ଚ ହେବ। ବାଲିପଦରରୁ କରସିଙ୍ଗି ରାସ୍ତା ପାଇଁ ୪୨ କୋଟି ୩୨ଲକ୍ଷ, ବିରଞ୍ଚିପୁର ଠାରୁ ଜିରାବାଡ଼ି ରାସ୍ତା ପାଇଁ ୨୧କୋଟି ୫୭ଲକ୍ଷ ୩୮ ହଜାର, ଝଗଡ଼େଇରୁ ସୋରଡ଼ା ରାସ୍ତା ପାଇଁ ୨୫ କୋଟି ୭୬ଲକ୍ଷ ୭୮ ହଜାର ଟଙ୍କା ଏବଂ ଧନିଚାପଲ୍ଲୀରୁ ବେଲଗୁଣ୍ଠା ରାସ୍ତା ପାଇଁ ୩ କୋଟି ଟଙ୍କା ଖର୍ଚ୍ଚ ହେବ । ଏଭଳି ଅନେକ ଉନ୍ନୟନ ପ୍ରକଳ୍ପ ପୂର୍ତ୍ତ ବିଭାଗ ଅଧୀନରେ ଚାଲିଛି। ପୂର୍ତ୍ତ ବିଭାଗ ନିର୍ବାହୀଯନ୍ତ୍ରୀ ଆଶିଷ କୁମାର ନାୟକ କହିଛନ୍ତି, ରାଜ୍ୟ ସରକାର ବିଭିନ୍ନ କ୍ଷେତ୍ରରେ ଭିତ୍ତିଭୂମି ସୁଦୃଢ଼ କରିବା ପାଇଁ ଅନୁଦାନ ଦେଉଛନ୍ତି । ପ୍ରକଳ୍ପ ଗୁଡ଼ିକ କିଭଳି ନିର୍ଦ୍ଧାରିତ ସମୟରେ ସରିବ ସେଥିପାଇଁ ପଦକ୍ଷେପ ନିଆଯାଉଛି ।