ବେହେରା,୨।୭(ଭୁପେଶ ତିୱାରୀ): କଳାହାଣ୍ଡି ଜିଲା ଧର୍ମଗଡ଼ ବ୍ଲକ ମିର୍ଜାପୁର୍ ବିଜୁ ଏକ୍ସପ୍ରେସ ନିକଟରେ ରବିବାର ଏକ ହାଇୱା ଧକ୍କାରେ ୭ ମାସ ଶିଶୁର ମୃତ୍ୟୁ ହୋଇଥିବା ବେଳେ ଦମ୍ପତି ଗୁରୁତର ଆହତ ହୋଇଛନ୍ତି।
ମିଳିଥିବା ସୂଚନା ମୁତାବକ, ସୋନପୁର ଜିଲା ବିନିକା ଅଞ୍ଚଳର ସୋହେବ ଶବର(୨୮) ସ୍ତ୍ରୀ ଓ ବାପା ମା’ଙ୍କ ସହ ପେଟପାଟଣା ପାଇଁ ବେହେରାରେ ରହୁଛନ୍ତି। ସୋହେବ ତାଙ୍କ ସ୍ତ୍ରୀ ଏବଂ ୭ ମାସ ଶିଶୁଙ୍କୁ ଧରି ରବିବାର ସାରେ ଜୁନାଗଡ଼ରୁ ବେହେରା ଆସୁଥିଲେ। ହେଲେ ମିର୍ଜାପୁର ନିକଟରେ ଏକ ହାଇୱା (ନଂ.ଓଡି୦୮କେ- ୩୪୩୭) ବାଇକ୍କୁ ପଛପଟୁ ଧକ୍କା ଦେଇଥିଲା। ଫଳରେ ସେମାନେ ରାସ୍ତାରେ ଛିଟିକି ପଡ଼ିଥିଲେ। ସ୍ଥାନୀୟ ଲୋକ ସେମାନଙ୍କୁ ଉଦ୍ଧାର କରି ପର୍ଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ହେଲେ ଡାକ୍ତର ଶିଶୁଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷେ ଗୁରୁତର ସ୍ତ୍ରୀ, ସ୍ବାମୀଙ୍କୁ ଧର୍ମଗଡ଼ ଡାକ୍ତରଖାନକୁ ସ୍ଥାନାନ୍ତର କରାଯାଇଛି। ଖବର ପାଇ କୋକସରା ଓ ଅମପାଣୀ ପୋଲିସ ଘଟଣାସ୍ଥଳ ପହଞ୍ଚି ତଦନ୍ତ କରୁଥିବା ବେଳେ ସ୍ଥାନୀୟ ଲୋକେ ମୃତକଙ୍କ ପରିବାର ଲୋକଙ୍କୁ କ୍ଷତି ପୂରଣ ଯୋଗାଇ ଦାବି କରିଛନ୍ତି।
