ଢେଙ୍କାନାଳ,୨୯ା୧୦(ରତନ ନାୟାର): ଢେଙ୍କାନାଳ ସହର ଗାନ୍ଧୀ ମନ୍ଦିର ରୋଡ୍ର ଶରତ ମହାପାତ୍ରଙ୍କୁ ଗତ ୭ ମାସ ତଳେ ବିବାହ କରିଥିବା ମୌସୁମୀ ମଧୁସ୍ମିତାଙ୍କ ରବିବାର ସନ୍ଦେହଜନକ ଅବସ୍ଥାରେ ମୃତ୍ୟୁ ହୋଇଛି। ମୃତ୍ୟୁର କାରଣ ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇ ନ ଥିବାବେଳେ ସ୍ବାମୀ ଶରତଙ୍କ ସମେତ ଶାଶୁଘର ଲୋକେ ଘରଛାଡ଼ି କେଉଁଆଡ଼େ ପଳାଇଯାଇଛନ୍ତି। ଫଳରେ ଝିଅ ମଧୁସ୍ମିତାଙ୍କୁ ଶାଶୁଘର ଲୋକେ ହତ୍ୟା କରିଥିବା ନେଇ ସଦର ଥାନା ସିମିନଇ ଗ୍ରାମର ସରୋଜ କୁମାର ସିଂହ ସୋମବାର ଢେଙ୍କାନାଳ ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି।
ମଧୁସ୍ମିତାଙ୍କ ସ୍ବାମୀ ଶରତ, ଶ୍ୱଶୁର ହେମନ୍ତ ମହାପାତ୍ର, ଶାଶୁ ସରୋଜିନୀ ମହାପାତ୍ର ଓ ଦିଅର ତଥା ଜିଲା ଛାତ୍ର ବିଜେଡି ସଭାପତି ସୁରଜ ମହାପାତ୍ର ଏବଂ ଯାଆ ଇତିଶା ଜେନାଙ୍କ ନାମରେ ସରୋଜ ଏହି ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତିକରି ପୋଲିସ ନଂ. ୭୩୨/୨୦୨୪ରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଜାରି ରଖିଛି। ଏଥିସହ ଜିଲା ମୁଖ୍ୟ ଚିକିତ୍ସାଳୟରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଲିସ ମୃତଦେହ ବ୍ୟବଚ୍ଛେଦ କରାଇଛି।
ଅଭିଯୋଗରେ ସରୋଜ ଦର୍ଶାଇଛନ୍ତି, ବଡ଼ଝିଅ ମୌସୁମୀ ମଧୁସ୍ମିତା ଗତ ୨୬ ମାର୍ଚ୍ଚ ୨୦୨୪ରେ ଢେଙ୍କାନାଳ ସହର କଲେଜ ବାଇପାସସ୍ଥିତ ଶିବ ମନ୍ଦିରରେ ସହରସ୍ଥିତ ଗାନ୍ଧୀ ମନ୍ଦିର ରୋଡ୍ ନିବାସୀ ହେମନ୍ତ ମହାପାତ୍ରଙ୍କ ପୁଅ ଶରତଙ୍କୁ ବୈଦିକ ରୀତିରେ ବିବାହ କରିଥିଲେ। ରବିବାର ଅପରାହ୍ନ ୨ଟା ୪୮ରେ ଝିଅଙ୍କ ସହ ସେ କଥା ହୋଇଥିଲେ। ସେହି ସମୟରେ ଝିଅ ସ୍ବାଭାବିକ ଭାବେ କଥାବାର୍ତ୍ତା କରିଥିଲେ। କିନ୍ତୁ ସନ୍ଧ୍ୟା ୬ଟା ୪୪ରେ ସେ ଝିଅଙ୍କୁ ଫୋନ କରିବାରୁ ଶାଶୁ ଫୋନ ଉଠାଇ ଝିଅ କ’ଣ ଖାଇଦେଇଛି, ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ବୋଲି କହିବା ସହ ଫୋନ କାଟିଦେଇଥିଲେ।
ଜିଲା ମୁଖ୍ୟ ଚିକିତ୍ସାଳୟରେ ସେ ପହଞ୍ଚିବା ପରେ ଝିଅଙ୍କ ମୃତ୍ୟୁ ହୋଇଯାଇଥିବା ଜାଣିବାକୁ ପାଇଥିଲେ। ତେଣୁ ତାଙ୍କ ଝିଅଙ୍କୁ ସ୍ବାମୀ, ଶ୍ୱଶୁର, ଶାଶୁ, ଦିଅର ଓ ଯାଆ ମାରିଦେଇଥିବା ସରୋଜ ଟାଉନଥାନାରେ ଅଭିଯୋଗ କରିଛନ୍ତି। ଏଥିସହ ସରୋଜ ଗଣମାଧ୍ୟମକୁ କହିଛନ୍ତି, ବିବାହ ପରେ ମଝିରେ ମଝିରେ ଝିଅ ଓ ଜ୍ୱାଇଁଙ୍କ ମଧ୍ୟରେ ବିବାଦ ହେଉଥିଲା। ଖବରପାଇ ସେ ଝିଅଘରେ ପହଞ୍ଚି ସମ୍ପର୍କୀୟମାନଙ୍କ ଉପସ୍ଥିତିରେ ସମାଧାନ କରୁଥିଲେ।
ଅଭିଯୋଗ ସମ୍ପର୍କରେ ଟାଉନଥାନା ଅଧିକାରୀ ପ୍ରଭାତ ସାହୁ କହିଛନ୍ତି, ମୃତ ମହିଳାଙ୍କ ବାପାଙ୍କ ଅଭିଯୋଗ କ୍ରମେ ୫ଜଣଙ୍କ ନାମରେ ନୂତନ ଆଇନ ଅନୁଯାୟୀ ହତ୍ୟା ମାମଲା ରୁଜୁ ହୋଇଛି। ଅଭିଯୁକ୍ତମାନେ ଘରେ ନାହାନ୍ତି। ତଦନ୍ତ ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ।