ବୁଗୁଡ଼ା,୨୮ା୭(ଡି.ଏନ୍.ଏ.): କିଛିଦିନ ତଳେ ଦଶମ ଶ୍ରେଣୀ ପରୀକ୍ଷା ଫଳ ପ୍ରକାଶନରେ ଅସନ୍ତୁଷ୍ଟ ଥିବା ପରୀକ୍ଷାର୍ଥୀ ପୁଣି ପରୀକ୍ଷା ଦେବା ପାଇଁ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା। ଏହି ମର୍ମରେ ଚଳିତ ମାସ ୧ ତାରିଖରୁ ୧୫ ତାରିଖ ଯାଏ ପଞ୍ଜୀକରଣ ନିମନ୍ତେ ସମୟ ଧାର୍ଯ୍ୟ ହୋଇଥିଲା। ତେବେ ଆସନ୍ତା ଜୁଲାଇ ୩୦ ତାରିଖରୁ ଅଗଷ୍ଟ ୫ ତାରିଖ ପର୍ଯ୍ୟନ୍ତ ହେବାକୁ ଥିବା ଦଶମ ଶ୍ରେଣୀ ପରୀକ୍ଷା ପାଇଁ ବୁଗୁଡ଼ା ବ୍ଲକର ଏକମାତ୍ର କେନ୍ଦ୍ର ଭାବେ ସ୍ଥାନୀୟ ଶ୍ରୀ ବିରଞ୍ଚି ନାରାୟଣ ବାଳିକା ଉଚ୍ଚ ବିଦ୍ୟାଳୟକୁ ସ୍ଥିର କରାଯାଇଥିବା ବେଳେ ଏଠାରେ ମୋଟ ୭୦ ଜଣ ବିଦ୍ୟାର୍ଥୀ ପରୀକ୍ଷା ଦେବେ ବୋଲି ଜଣାଯାଇଛି। ସେମାନଙ୍କ ମଧ୍ୟରେ ଶଙ୍କୁରୁର ଶ୍ରୀ ଭଗବତ ସ୍ବାମୀ ହାଇସ୍କୁଲ, ବାଲିପଦର ହାଇସ୍କୁଲ, ଖରିଡ଼ାର ସ୍ବପ୍ନେଶ୍ବରୀ ହାଇସ୍କୁଲ ଓ ସୋରଡର ବାଲୁଙ୍କେଶରୀ ହାଇସ୍କୁଲ ଆଦିର ୫ ଜଣ ରେଗୁଲାର ପରୀକ୍ଷାର୍ଥୀ ରହିଥିବା ବେଳେ ଅନ୍ୟାନ୍ୟ ବିଦ୍ୟାଳୟର ୮ ଜଣ ଏକ୍ସ-ରେଗୁଲାର ପରୀକ୍ଷାର୍ଥୀଙ୍କ ସହିତ ୫୭ ଜଣ ସି-କୋର୍ସ ପରୀକ୍ଷାର୍ଥୀ ରହିଥିବା ନେଇ ପରୀକ୍ଷା କେନ୍ଦ୍ର ସୁପରିଟେଣ୍ଡେଣ୍ଟ ପ୍ରମୋଦ କୁମାର ମହାପାତ୍ରଙ୍କଠାରୁ ପ୍ରକାଶ ପାଇଛି। ଅନ୍ୟପକ୍ଷରେ ପରୀକ୍ଷା କେନ୍ଦ୍ରର ସୁପରିଚାଳନା ନିମନ୍ତେ ଡେପୁଟି ସୁପରିଟେଣ୍ଡେଣ୍ଟ ଭାବେ ରବୀନ୍ଦ୍ର ନାଥ ବରିହା ନିୟୋଜିତ ହୋଇଥିବା ଜଣାଯାଇଛି।