ସୋନପୁର,୧୧।୬(ନି.ପ୍ର.): ନକଲି ଚେକ୍ ଜରିଆରେ ସୋନପୁର କଲେଜ ଆକାଉଣ୍ଟରୁ ୭୦ ଲକ୍ଷ ୪୨ ହଜାର ୯୦୦ ଟଙ୍କା ହରିଲୁଟ ହୋଇଛି । ଏନେଇ କଲେଜ ଅଧ୍ୟକ୍ଷ ରାଜୀବଲୋଚନ ଆଚାର୍ଯ୍ୟ ସୋନପୁର ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ.୧୧୮/୨୨) ରୁଜୁ କରିଛି। ପୋଲିସ ଅଭିଯୁକ୍ତ ଏବଂ ମାଷ୍ଟାରମାଇଣ୍ଡକୁ ଧରିବାକୁ ତନାଘନା ଜାରି ରଖିଛି । ଏହି ଘଟଣାରେ ବ୍ୟାଙ୍କ ଅଧିକାରୀ ସମ୍ପୃକ୍ତ ଥିବା ପୋଲିସର ପ୍ରାଥମିକ ଅନୁସନ୍ଧାନରୁ ଜଣାପଡିଛି।
ସମ୍ପୃକ୍ତ କଲେଜ ଭିତ୍ତିଭୂମିର ବିକାଶ ପାଇଁ ଆଇଡିପି ବିଶ୍ୱବ୍ୟାଙ୍କ ସହାୟତାରେ କାମ ଚାଲିଛି। ମିଳିଥିବା ଅନୁଦାନକୁ ବ୍ୟାଙ୍କ ଅଫ ବରୋଦା ସୋନପୁର ଶାଖାରେ କଲେଜ କର୍ତ୍ତୃପକ୍ଷ ଜମା କରିଥିଲେ। ଗତ ୭ ତାରିଖରେ ଏକ ନକଲି ଚେକ୍ ଜରିଆରେ ଉକ୍ତ ଜମାଖାତାରୁ ଟଙ୍କା ଉଠାଯାଇଛି । ଗୁରୁବାର କଲେଜର ଜମାଖାତା ଅପଡେଟ୍ କରିବା ସମୟରେ ଏହି ଘଟଣା ପଦାକୁ ଆସିଛି।
କଲେଜ ଅଧ୍ୟକ୍ଷ ଆଚାର୍ଯ୍ୟ ଏ ସମ୍ପର୍କରେ କଲେଜ ପରିଚାଳନା କମିଟି ସଭାପତି ତଥା ସୁବର୍ଣ୍ଣପୁରର ଅତିରିକ୍ତ ଜିଲାପାଳ ସୂର୍ଯ୍ୟନାରାୟଣ ଦାଶଙ୍କୁ ଜଣାଇବା ପରେ ଥାନାରେ ଅଭିଯୋଗ କରିଛନ୍ତି । କଲେଜର ପ୍ରାକ୍ତନ ଅଧ୍ୟକ୍ଷଙ୍କ ମୋବାଇଲ ନମ୍ବର ହ୍ୟାକ୍ କରି ଏହି ଟଙ୍କା ଉଠାଯାଇଥିବା ପୋଲିସ ପ୍ରାଥମିକ ଅନୁସନ୍ଧାନରୁ ଜାଣିବାକୁ ପାଇଛି । ଚେକ୍ରେ କଲେଜର ଅଧ୍ୟକ୍ଷ ଦସ୍ତଖତ କରି ନ ଥିବା ବେଳେ ଯେଉଁ ଚେକ୍ରେ ଟଙ୍କା ଉଠିଛି, ସେଥିରେ ଓଭର ରାଇଟିଂ ହୋଇଛି। ତେଣୁ କେଉଁ ପରିସ୍ଥିତିରେ ଏଭଳି ଚେକ୍ରେ ବ୍ୟାଙ୍କ କର୍ତ୍ତୃପକ୍ଷ ଟଙ୍କା ଦେଲେ ତାହା ତଦନ୍ତକାରୀ ଅଧିକାରୀଙ୍କୁ ଆଶ୍ଚର୍ଯ୍ୟାନ୍ବିତ କରିଛି । ଅନ୍ୟପକ୍ଷେ ଅଭିଯୁକ୍ତଙ୍କୁ ଧରିବା ପାଇଁ ଏସ୍ପି ଅମରେଶ କୁମାର ପଣ୍ଡା ନିଜେ ତଦନ୍ତକୁ ତ୍ୱରାନ୍ବିତ କରିବା ସହ ଏକ ଟିମ୍ ଗଠନ କରିଛନ୍ତି। ସିସିଟିଭି ଫୁଟେଜ୍କୁ ଯାଞ୍ଚ କରିବା ସହ ବ୍ୟାଙ୍କ ଅଫ୍ ବରୋଦାର ଶାଖା ପରିଚାଳକଙ୍କ ସମେତ ଅନ୍ୟ ୨ ଜଣ କର୍ମଚାରୀଙ୍କୁ ଅଟକ ରଖି ପଚରାଉଚୁରା ପରେ ପୋଲିସ ଛାଡି ଦେଇଛି। ଅନ୍ୟପକ୍ଷେ ଉକ୍ତ ଟଙ୍କା ପଶ୍ଚିମବଙ୍ଗର କୁଚ୍ବିହାରସ୍ଥିତ ଏକ ଆଇସିଆଇସିଆଇ ବ୍ୟାଙ୍କ ଆକାଉଣ୍ଟକୁ ଟ୍ରାନ୍ସଫର ହୋଇଥିବା ଜଣାପଡିଛି। ଏହି ଘଟଣାରେ ସମ୍ପୃକ୍ତ ଅଭିଯୁକ୍ତ ଓ ମାଷ୍ଟରମାଇଣ୍ଡଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ଏସ୍ପି ପଣ୍ଡା କହିଛନ୍ତି।
