ବ୍ରହ୍ମପୁର ଅଫିସ,୧୬ା୪:ଗଞ୍ଜାମ ଜିଲାରେ ସମୁଦାୟ ଜନସଂଖ୍ୟାର ପ୍ରାୟ ୭୦% କେବଳ ବିଭିନ୍ନ ଚାଷ ଉପରେ ନିର୍ଭର କରୁଛନ୍ତି। ଏହି ଜିଲାରେ ଥିବା ୪ ଲକ୍ଷାଧିକ ହେକ୍ଟର ଜମି ମଧ୍ୟରୁ ଅର୍ଦ୍ଧେକରେ ଖରିଫ ଧାନ ଏବଂ ଅବଶିଷ୍ଟରେ ଅଣଧାନ ଓ ପନିପରିବା ଚାଷ ହେଉଥିବା ତଥ୍ୟ ରହିଛି। କୃଷିଜାତ ପଦାର୍ଥର ଗୁଣାତ୍ମକ ଉପତ୍ାଦନ ବୃଦ୍ଧି ନିମନ୍ତେ ସରକାରଙ୍କ ନିର୍ଦ୍ଦେଶ ରହିଛି। ଚାଷୀଙ୍କୁ ସୁବିଧାରେ ଋଣ ଯୋଗାଇଦେବା ବ୍ୟବସ୍ଥା ଅଛି। ବ୍ରହ୍ମପୁର ଓ ଆସିକା ସମବାୟ କେନ୍ଦ୍ର ବ୍ୟାଙ୍କ ପକ୍ଷରୁ ଶହ ଶହ କୋଟି ଟଙ୍କା କୃଷିଋଣ ଲଗାଣ କରାଯାଉଛି। ଆଉ କେତେକ ରାଷ୍ଟ୍ରାୟତ୍ତ ଓ ଗ୍ରାମ୍ୟ ବ୍ୟାଙ୍କ ମଧ୍ୟ ଋଣ ପଞ୍ଜିକୃତ ଚାଷୀଙ୍କୁ ଦେଉଛନ୍ତି। ତେଣୁ କୃଷିପ୍ରଧାନ ଏହି ଜିଲାରେ ସରକାରୀ କୃଷି କଲେଜ ପ୍ରତିଷ୍ଠା କରିବାକୁ ବୁଦ୍ଧିଜୀବୀ ମହଲରେ ଦାବି ହେଉଛି। ତେବେ କାର୍ଯ୍ୟକାରୀ କରିବାରେ ଅବହେଳା ଅବ୍ୟାହତ ରହିଛି।
ଜିଲାରେ କୃଷି ମହାବିଦ୍ୟାଳୟ ସ୍ଥାପନ ପାଇଁ ଭିତ୍ତିଭୂମି ଅଛି। ରଙ୍ଗେଇଲୁଣ୍ଡା ଓ କୁକୁଡ଼ାଖଣ୍ଡି ସମେତ ବିଭିନ୍ନ ବ୍ଲକରେ ପର୍ଯ୍ୟାପ୍ତ ସରକାରୀ ଜମି ରହିଛି। ଗୋଳନ୍ଥରାରେ କୃଷି ବିଜ୍ଞାନ କେନ୍ଦ୍ର, ରଙ୍ଗେଇଲୁଣ୍ଡାରେ ଆଞ୍ଚଳିକ କୃଷି ତାଲିମ କେନ୍ଦ୍ର ଅଛି। ନୂଆ ଟେକ୍ନୋଲୋଜି ଅନୁସାରେ ଚାଷୀଙ୍କୁ ସଚେତନ କରାଇବାର ବ୍ୟବସ୍ଥା ରହିଛି। ରଙ୍ଗେଇଲୁଣ୍ଡାରେ ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ ଅଧୀନ ମତ୍ସ୍ୟ ବିଜ୍ଞାନ କଲେଜ ବହୁବର୍ଷ ତଳୁ ପ୍ରତିଷ୍ଠା ହୋଇଛି। ତେଣୁ କୃଷି କଲେଜ ନିମନ୍ତେ ସବୁ ସୁବିଧା ଉପଲବ୍ଧ ଅଛି। କାର୍ଯ୍ୟକାରୀ ହେଲେ ଦକ୍ଷିଣ ଓଡ଼ିଶାର ଛାତ୍ରୀଛାତ୍ର ପାଠ ପଢ଼ିବାର ସୁଯୋଗ ପାଇବେ ଏବଂ ଚାଷୀଙ୍କୁ ଆଧୁନିକ ଜ୍ଞାନ କୌଶଳରେ କୃଷି କାର୍ଯ୍ୟକ୍ରମ ଲାଗି ସଚେତନ କରାଯାଇପାରିବ।
ଏହି ଜିଲାରୁ ମୁଖ୍ୟମନ୍ତ୍ରୀ ପ୍ରତିନିଧିତ୍ୱ କରୁଛନ୍ତି। ବିଧାନସଭା ବାଚସ୍ପତିଙ୍କ ସମେତ ଆଉ ଦୁଇଜଣ ମନ୍ତ୍ରୀ ପଦ ପାଇଛନ୍ତି। ଏତଦବ୍ୟତୀତ ଶାସକ ଦଳର ଆଉ ୮ ବିଧାୟିକା ଓ ବିଧାୟକ ଅଛନ୍ତି। ସମସ୍ତେ ଏକାଠି ମୁଖ୍ୟମନ୍ତ୍ରୀଙ୍କୁ ଭେଟି କୃଷି ମହାବିଦ୍ୟାଳୟ ସ୍ଥାପନ ପାଇଁ ଚାପ ପକାଉ ନ ଥିବା ବିଭିନ୍ନ ଚାଷୀ ସଂଗଠନ ନେତାମାନେ ସମାଲୋଚନା କରୁଛନ୍ତି। ବିରୋଧୀ ଦଳ ନେତାମାନେ ମଧ୍ୟ ଏହି ପ୍ରସଙ୍ଗରେ ଚୂପ ରହିଛନ୍ତି। ଅପରପକ୍ଷରେ ୨୦୨୧ ସେପ୍ଟେମ୍ବର ୧୫ରେ ଜିଲା ବିଜେଡିର ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକ ଭଞ୍ଜନଗରରେ ଅନୁଷ୍ଠିତ ହୋଇଥିଲା। ଉପସ୍ଥାପିତ ରାଜନୈତିକ ଚିଠା ପ୍ରସ୍ତାବରେ ସରକାର ଗଞ୍ଜାମ ଜିଲାରେ କୃଷି କଲେଜ ପ୍ରତିଷ୍ଠା ଦାବି କରାଯାଇଥିଲା। ଏହାର ମଧ୍ୟ ଦେଢ଼ ବର୍ଷ ପାର ହୋଇଛି ଏବଂ ବିଜେଡିର ଦାବି ପ୍ରସ୍ତାବରେ ଅଟକି ଯାଇଛି।
ଜିଲା ବିଜେଡି ସଭାପତି ଏବେ ରାଜ୍ୟ ଯୋଜନା ବୋର୍ଡ ସଦସ୍ୟ ଅଛନ୍ତି। ତେଣୁ ସେ ଗଞ୍ଜାମରେ ସରକାରୀ କୃଷି କଲେଜ ପାଇଁ ରାଜ୍ୟ ଯୋଜନାରେ ଅନ୍ତର୍ଭୁକ୍ତ କରିବା ନିମନ୍ତେ ବିଭିନ୍ନ ମହଲରୁ ଦାବି କରାଯାଇଛି। ଯୋଗାଯୋଗ ବେଳେ ଯୋଜନା ବୋର୍ଡ ସଦସ୍ୟ ଆଗାମୀ ଦିନରେ କଲେଜ ସ୍ଥାପନ କରାଯିବାର ଯୋଜନା ଅଛି ବୋଲି ସୂଚନା ଦେଇଛନ୍ତି। ଅନ୍ୟପକ୍ଷରେ କେଉଁ ନିର୍ବାଚନ ମଣ୍ଡଳୀରେ କରାଯିବ ସେ ନେଇ ନିଷ୍ପତ୍ତି ହୋଇ ନ ଥିବା ଜଣାପଡ଼ିଛି।