ମାହାଙ୍ଗା,୧୪ା୮(ଯଯାତୀ ସିଂହ): ବିଦ୍ୟାଳୟର କ୍ରୀଡ଼ା ଶିକ୍ଷକଙ୍କ ସହ ଅନୈତିକ ସମ୍ପର୍କ ପାଇଁ ଜଣେ ଦଶମ ଶ୍ରେଣୀର ଛାତ୍ରୀଙ୍କ ଜୀବନ ଯାଇଛି। ଏହି ଘଟଣା ସମ୍ପର୍କରେ ପୋଲିସର କେତେଜଣ ଅଧିକାରୀଙ୍କ ସହ ଜନ ପ୍ରତିନିଧି ଅବଗତ ଥିଲେ। ମାତ୍ର ଘଟଣାକୁ ଚପାଇ ଦେବା ପାଇଁ ଜୋରଦାର ପ୍ରୟାସ ହୋଇଥିଲା। କିନ୍ତୁ ସବୁ କିଛି ଫସର ଫାଟିଯାଇଛି। ନାବାଳିକାଙ୍କ ମୃତ୍ୟୁର ୫୭ ଦିନ ପରେ ଏକ ଅଡିଓ କଲ ଭାଇରାଲ୍ ହେବାରେ ଲାଗିଛି। ସେଥିରେ ମୃତ୍ୟୁ ପଛର କାହାଣୀ ସହ ଜଡ଼ିତ ଥିବା ସମସ୍ତ ଘଟଣା ସାମ୍ନାକୁ ଆସିଛି। ଏ ସମ୍ପର୍କରେ ଫୋନ ମାଧ୍ୟମରେ ଜଣେ ପୂର୍ବତନ ବ୍ଲକ ଅଧ୍ୟକ୍ଷ ବଖାଣିଛନ୍ତି।
ସୂଚନାମୁତାବକ, କଟକ ଜିଲା ମାହାଙ୍ଗା ବ୍ଲକର ଏକ ବିଦ୍ୟାଳୟରେ ସମ୍ପୃକ୍ତା ନାବାଳିକା ଦଶମ ଶ୍ରେଣୀରେ ପଢ଼ୁଥିଲେ। ଉକ୍ତ ବିଦ୍ୟାଳୟର କ୍ରୀଡା ଶିକ୍ଷକଙ୍କ ସହ ତାଙ୍କ ପ୍ରେମ ସମ୍ପର୍କ ଗଢ଼ିଉଠିଥିଲା। ଘଟଣା ସମ୍ପର୍କରେ ଛାତ୍ରୀଙ୍କ ପରିବାର ଲୋକେ ଜାଣିବା ପରେ ଏହା ନୂଆ ମୋଡ଼ ନେଇଥିଲା। ଏହାପରେ ଗତ ଜୁନ୍ ୧୮ରେ ନାବାଳିକା ଛାତ୍ରୀଙ୍କ ସନ୍ଦେହଜନକ ମୃତ୍ୟୁ ଘଟିଥିଲା। ଘଟଣା ସମ୍ପର୍କରେ ସ୍ଥାନୀୟ ପୋଲିସ ଅବଗତ ଥିଲେ ମଧ୍ୟ ମୃତ୍ୟୁର କାରଣ ଖୋଜାଯାଇ ନ ଥିଲା। ଅତି ତରବରିଆ ଭାବେ ମୃତଦେହ ପୋଡ଼ି ଦିଆଯାଇଥିଲା। ପ୍ରମାଣ ନଷ୍ଟ କରିବା ପାଇଁ ପୋଡା ଯାଇଥିବା ସ୍ଥାନରୁ ମାଟି ପାଉଁଶ ତାଡିନେଇ ନିକଟସ୍ଥ ନଦୀ ଗର୍ଭକୁ ଫୋପାଡି ଦିଆଯାଇଥିଲା। ଏହାପଛରେ ବ୍ଲକର ଜଣେ ପୂର୍ବତନ ଅଧ୍ୟକ୍ଷଙ୍କ ସମ୍ପୃକ୍ତି ଥିବା ଜଣାପଡ଼ିିଛି। ସେ ଫୋନରେ ସତ ବଖାଣୁଥିବା ଅଡିଓ କଲ ଶୁକ୍ରବାର ଭାଇରାଲ ହେବାରେ ଲାଗିଛି। ଏ ପ୍ରସଙ୍ଗକୁ ଚପାଇ ଦେବା ପାଇଁ କ୍ରୀଡା ଶିକ୍ଷକଙ୍କ ମା’ଙ୍କୁ ଘଟଣା ଦିନ ସେ ଫୋନ କରିଥିଲେ। ଏଥିପାଇଁ ଉଭୟଙ୍କ ମଧ୍ୟରେ ୭୦ ହଜାର ଟଙ୍କାର ଡିଲ୍ ହୋଇଥିଲା। ଏପରିକି ଘଟଣାକୁ ଆଗକୁ ନ ବଢ଼ାଇବା ପାଇଁ ସ୍ଥାନୀୟ ପୋଲିସକୁ ହାତବାରିଶ କରାଯାଇଥିବା ଅଡିଓ କଲରେ ସ୍ପଷ୍ଟ ହୋଇଛି। ଏବେ ଘଟଣା ସାମ୍ନାକୁ ଆସିବା ପରେ ଏହାପଛରେ କେବଳ ପୂର୍ବତନ ବ୍ଲକ ଅଧ୍ୟକ୍ଷ ନା ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ରହିଛି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଠିକ୍ ଭାବେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନେବା ପାଇଁ ସାଧାରଣରେ ଦାବି ହୋଇଛି।