ୱାଶିଂଟନ୍: ମଣିଷର ବୟସ ବଢିବା ସହ ଏକାନ୍ତପଣ ମଧ୍ୟ ବଢ଼ିଥାଏ। ଏହି ସମୟରେ ଯଦି ନିଜ ପରିବାର ପାଖରେ ନଥାଏ, ତେବେ ଏକାନ୍ତପଣକୁ ସାମ୍ନା କରିବା କଷ୍ଟସାଧ୍ୟ ହୋଇପଡ଼ିଥାଏ। ଏପରି ପରିସ୍ଥିତିରେ ମଣିଷ ନିଜ ପାଇଁ ଏକ ନୂତନ ସାଥୀ ଆବଶ୍ୟକ କରିଥାଏ। ତେବେ ବିଭିନ୍ନ ପାଶ୍ଚାତ୍ୟ ଦେଶରେ ଏପରି ଘଟିବା ଏବେ ସାଧାରଣ କଥା ହୋଇଗଲାଣି। ଆମେରିକାର ଟେକ୍ସାସରେ ରହୁଥିବା ଜଣେ ୭୦ ବର୍ଷ ବୟସ୍କ ବ୍ୟକ୍ତି ନିଜର ଏକାନ୍ତପଣକୁ ଦୂର କରିବା ପାଇଁ ଅନେକ ଡଲାର ଖର୍ଚ୍ଚ କରି ବିଜ୍ଞାପନ ଦେଉଥିବା ଜଣାପଡ଼ିଛି।
ଟାଇମ୍ସ ରିପୋର୍ଟ ଅନୁଯାୟୀ ଅଲ୍ ଗିଲବର୍ଟୀ ନାମକ ଜଣେ ୭୦ ବର୍ଷୀୟ ବ୍ୟକ୍ତି ନିଜ ଏକାନ୍ତପଣକୁ ଦୂର କରିବା ପାଇଁ ସାଥୀଟିଏ ଖୋଜୁଛନ୍ତି। ଏଥିପାଇଁ ସେ ପ୍ରତି ସପ୍ତାହରେ ୪୦୦ ଡଲାର ଖର୍ଚ୍ଚ କରି ବିଭିନ୍ନ ହୋର୍ଡିଂରେ ବିଜ୍ଞାପନ ଦେଉଛନ୍ତି। ଏହି ବିଜ୍ଞାପନରେ ଗିଲବର୍ଟୀ କହିଛନ୍ତି, ମୁଁ ଜଣେ ସାଥୀ ଖୋଜୁଛି ଯାହାଙ୍କୁ ମୁଁ ବିବାହ କରିପାରିବି। ସେ ଜଣେ ଖୋଲା ମନୋଭାବର ବିଶ୍ୱସ୍ତ ସାଥୀ ଚାହୁଁଥିବା ଗିଲବର୍ଟୀ ନିଜ ବିଜ୍ଞାପନରେ ଦର୍ଶାଇଛନ୍ତି। ସ୍ବଭାବରେ ସଚ୍ଚୋଟ ଥିବା ସହ ତାଙ୍କୁ ଓ ତାଙ୍କ ମତକୁ ସମ୍ମାନ ଦେଉଥିବା ଜଣେ ସାଥୀ ଆବଶ୍ୟକ ବୋଲି ସେ ବିଜ୍ଞାପନରେ ଦର୍ଶାଇଛନ୍ତି। ରିପୋର୍ଟ ଅନୁଯାୟୀ, ଗିଲବର୍ଟୀଙ୍କ ବିଜ୍ଞାପନରୁ ଗତ ୨ ସପ୍ତାହ ମଧ୍ୟରେ ୪୦୦ଟି କଲ୍ ଓ ୫୦ଟି ଇମେଲ୍ ଆସିଛି। ଅନ୍ୟପକ୍ଷରେ, ଗିଲବର୍ଟୀଙ୍କ ଏହି ବିଜ୍ଞାପନ ଉପରେ ଆଗ୍ରହ ଦେଖାଇଥିବା ଅଧିକାଂଶ ମହିଳା ତାଙ୍କ ସମ୍ପତ୍ତି ବିଷୟରେ ଜାଣିବାକୁ ଚାହିଁଥିବା ନେଇ ବିଜ୍ଞାପନ ଛାପିଥିବା କର୍ମଚାରୀ ଦାବି କରିଛନ୍ତି।