ମୁମ୍ବାଇ: ମିସ୍ ୟୁନିଭର୍ସ ୨୦୨୧ର ମୁକୁଟ ଭାରତର ହରନାଜ ସଂନ୍ଧୁଙ୍କ ନାଁରେ ହୋଇ ସାରିଛି । ହରନାଜ ଚଣ୍ଡିଗଡ଼ ବାସିନ୍ଦା ହୋଇଥିବା ବେଳେ ଏଥର ପୂରା ଦେଶର ନାଁ ରଖିଛନ୍ତି । ପାଖାପାଖି ୨୧ ବର୍ଷ ପରେ ଭାରତ ମିସ୍ ୟୁନିଭର୍ସ ତାଜ ନିଜ ନାଁରେ କରି ନେଇଛି । ଏହା ପୂର୍ବରୁ ୨୦୦୦ରେ ଲାରା ଦତ୍ତ ମିସ୍ ୟୁନିଭର୍ସ ଟାଇଟଲ ଜିତି ଇତିହାସ ରଚିଥିଲେ । ଚଳିତ ବର୍ଷର ମିସ୍ ୟୁନିଭର୍ସ କଣ୍ଟେଷ୍ଟ ଇସାଏଲରେ ଅନୁଷ୍ଠିତ ହୋଇଥିବା ବେଳେ ବଲିଉଡ୍ ନାୟିକା ଉର୍ବଶୀ ରୌତେଲା ଏହାକୁ ଜଜ୍ କରିଥିଲେ । ଯେତେବେଳେ ହରନାଜ ମିସ୍ ୟୁନିଭର୍ସ ହୋଇଗଲେ ସେତେବେଳେ ଉର୍ବଶୀ ଇମୋଶନାଲ ହୋଇଯାଇଥିଲେ । ଏତିକି ବେଳେ ତାଙ୍କ ଆଖିରେ ଆନନ୍ଦର ଅଶ୍ରୁ ଆସିଯାଇଥିଲା ।
ଯେତେବେଳେ ଷ୍ଟେଜ ଉପରେ ମିସ୍ ୟୁସିଭର୍ସ ହରନାଜ ସଂନ୍ଧୁଙ୍କ ନାଁ ଘୋଷଣା କରାଯାଇଥିଲା ସେତେବେଳେ ସେ ସେହିଠାରେ କାନ୍ଦି ପକାଇଥିଲେ । ଆଉ ତାଙ୍କୁ ଦେଖି ଉର୍ବଶୀଙ୍କ ଆଖିରୁ ବି ଲୁହ ଝରିପଡିଥିଲା । ନିକଟରେ ଉର୍ବଶୀ ରୌତେଲା ସୋସିଆଲ ମିଡିଆରେ ଏକ ଭିଡିଓ ଶେୟାର କରିଛନ୍ତି । ଏଥିରେ ଦେଖିବାକୁ ମିଳିଛି ହରନାଜଙ୍କ ନାମ ଘୋଷଣା ହେବା ପରେ ପରେ ସେ ଜୋରରେ କାନ୍ଦୁଛନ୍ତି । ଏହାସହ ଉର୍ବଶୀଙ୍କ ଆଖିରେ ବି ଲୁହ ଆସିଯାଇଥିଲା । ସେ ନିଜକୁ ସମ୍ଭାଳି ପାରି ନ ଥିଲେ । ତଥାପି ନିଜକୁ ସମ୍ଭାଳି ଠିଆ ହୋଇ ହରନାଜଙ୍କ ପାଇଁ ଖୁବ୍ କ୍ଲାପିଙ୍ଗ କରିଥିଲେ । ଏହାସହ ଆଉ ଏକ ଭିଡିଓରେ ଉର୍ବଶୀ ଜାତୀୟ ପତାକା ଧରିଥିବା ବେଳେ ହରନାଜ ମିସ୍ ୟୁନିଭର୍ସ ମୁକୁଟ ପିନ୍ଧି ଠିଆ ହୋଇଥିବା ଦେଖାଯାଇଛି । ଆଉ ଏଥିରେ ହରନାଜ କହୁଛନ୍ତି ମୋତେ ବିଶ୍ୱାସ ହେଉନି ଯେ ମୁଁ ଆପଣଙ୍କ ସହ ଠିଆ ହୋଇଛି । ସୂଚନାଯୋଗ୍ୟ, ୨୦୧୫ରେ ଉର୍ବଶୀ ମିସ୍ ୟୁନିଭର୍ସରେ ଭାରତର ପ୍ରତିନିଧିତ୍ୱ କରିଥିଲେ । ଏହାପରେ ସେ ବଲିଉଡରେ ପାଦ ରଖିଥିଲେ ।