ବାସୁଦେବପୁର,୬।୩(ନାରାୟଣ ପ୍ରସାଦ ବାରିକ୍): ବାସୁଦେବପୁର-ବାଲିଛନ୍ଦା ଘାଟ ରାସ୍ତାର ବାସୁଦେବପୁର ବଜାରଠାରୁ ସୁଦର୍ଶନପୁର ପଞ୍ଚାୟତର ମାଛହାଟ ଛକ ପର୍ଯ୍ୟନ୍ତ ସମ୍ପ୍ରସାରଣ କାର୍ଯ୍ୟ ଚାଲିଛି। ବାସୁଦେବପୁରରୁ ବାଲେଶ୍ୱରକୁ ସଂଯୋଗ କରୁଥିବା ପ୍ରାୟ ୪ କିଲୋମିଟର ରାସ୍ତା ପ୍ରଶସ୍ତୀକରଣ ପାଇଁ ୭୧୧ଟି ଗଛକୁ ବନ ବିଭାଗର ଅନୁମୋଦନକ୍ରମେ କଟାଯାଇଛି। ରାସ୍ତାର ଉଭୟପାର୍ଶ୍ୱରେ ପ୍ରାୟ ୧୦ ବର୍ଷ ପୂର୍ବେ ୭ଶହରୁ ଊର୍ଦ୍ଧ୍ୱ ଗଛ ବନ ବିଭାଗ ପକ୍ଷରୁ ଲଗାଯାଇ ଏହାର ରକ୍ଷଣାବେକ୍ଷଣ ଓ ଯନତ୍ ନିଆଯାଇଥିଲା। କଟାଯାଇଥିବା ଗଛ ମଧ୍ୟରେ ୧୧ରୁ ଊର୍ଦ୍ଧ୍ୱ ପୁରାତନ ବୃକ୍ଷ ବର ଓ ଅଶ୍ୱତ୍ଥ ପ୍ରାୟ ୨ଶହ ବର୍ଷରୁ ଊର୍ଦ୍ଧ୍ୱ ହେବ ରାସ୍ତାକଡ଼ରେ ଥିବା ଗଛକୁ କାଟି ଦିଆଯାଇଛି। ଫଳରେ ଏହି ରାସ୍ତା ଏବେ ବୃକ୍ଷଶୂନ୍ୟ ହୋଇଯାଇଛି।
ଆଗକୁ ଗ୍ରୀଷ୍ମଦିନ ଆସୁଥିବା ବେଳେ ଏହି ରାସ୍ତାରେ ଯାତ୍ରୀ ଓ ପଶୁପକ୍ଷୀଙ୍କ ପାଇଁ ଛାଇ ତଥା ଆଶ୍ରୟ ମିଳିବା କଷ୍ଟକର ହୋଇପଡ଼ିବ। ରାସ୍ତାପାର୍ଶ୍ୱରେ ଥିବା କଦମ୍ବ, ଶାଗୁଆନ, ରାଧାଚୁଡ଼ା, କରଞ୍ଜ, ଚାକୁନ୍ଦା, ଆମ୍ବ, ଶିମିଳି, ନିମ୍ବ, ଅଶ୍ୱତ୍ଥ, ବର, ଆକାଶିଆ ମେନଜିୟମ, ଆକାଶୀ ଆଦି ବହୁ କିସମର ଗଛକୁ କଟାଯାଇ ରାଜ୍ୟ ବନ ଉନ୍ନୟନ ନିଗମକୁ ଏହାର କାଠ ସରକାରୀ ଭାବେ ହସ୍ତାନ୍ତର କରାଯାଇଥିବା ବାସୁଦେବପୁର ରେଞ୍ଜର କପିଳେନ୍ଦ୍ର ପ୍ରଧାନ କହିଛନ୍ତି। ରାଜସ୍ବ, ବନ ବିଭାଗ, ଆର୍ ଆଣ୍ଡ୍ ବି, ରାଜ୍ୟ ବନ ଉନ୍ନୟନ ନିଗମ ଆଦି ବିଭାଗର ମିଳିତ କ୍ଷେତ୍ରୀୟ ତଦନ୍ତ ପରେ ଗଛ କଟା ଯାଇଥିଲା। ରାସ୍ତା କାର୍ଯ୍ୟ କରୁଥିବା ଠିକାଦାର ବନ ବିଭାଗ ପାଖରେ ମଧ୍ୟ ୪୦ ଲକ୍ଷ ଟଙ୍କା ଡିପୋଜିଟ କରିଛନ୍ତି। ରାସ୍ତା କାର୍ଯ୍ୟ ସମ୍ପୂର୍ଣ୍ଣ ହେବାର ୨ ବର୍ଷ ମଧ୍ୟରେ ପୁଣି ବନ ବିଭାଗ ପକ୍ଷରୁ ପୂର୍ବପରି ରାସ୍ତାପାର୍ଶ୍ୱରେ ଚାରାରୋପଣ କରାଯିବ ବୋଲି ରେଞ୍ଜର ପ୍ରଧାନ କହିଛନ୍ତି।