ଭୁବନେଶ୍ୱର,୩୧।୫(ବ୍ୟୁରୋ)-ମଙ୍ଗଳବାର ବ୍ରଜରାଜନଗର ଉପନିର୍ବାଚନ ପାଇଁ ଭୋଟ ଗ୍ରହଣ ଶେଷ ହୋଇଛି। ଇଭିଏମ୍ରେ ପ୍ରତିଦ୍ୱନ୍ଦ୍ୱିତା କରୁଥିବା ୧୧ ଜଣ ପ୍ରାର୍ଥୀଙ୍କ ଭାଗ୍ୟ ସିଲ୍ ହୋଇଛି । ତେବେ ଅପରାହ୍ନ ୫ଟା ସୁଦ୍ଧା ମତଦାନ ୬୯ ପ୍ରତିଶତ ହୋଇଥିବା ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ ସୂଚନା ଦେଇଛନ୍ତି । ତେବେ କୌଣସି ସ୍ଥାନରେ ହିଂସା ହୋଇନାହିଁ । ସମସ୍ତ ବୁଥ୍ରେ ଶାନ୍ତିପୂର୍ଣ୍ଣ ମତଦାନ ହୋଇଛି । ୨୦୧୯ରେ ବ୍ରଜରାଜନଗର ବିଧାନସଭାରେ ମତଦାନ ହାର ୬୮ ପ୍ରତିଶତ ହୋଇଥିଲା । ଏଥର ମତଦାନ ଗତ ଥରକୁ ଟପିବ ବୋଲି ମୁଖ୍ୟ ନିର୍ବାଚନ ଅଧିକାରୀ କହିଛନ୍ତି । ମତଦାନ ହାର ୭୨ ପ୍ରତିଶତ ହେବ ବୋଲି ଅନୁମାନ କରାଯାଇଛି। ଏହି ନିର୍ବାଚନରେ ମୋଟ ୨,୧୫,୮୭୮ ଜଣ ଭୋଟର ସେମାନଙ୍କର ମତଦାନ ଅଧିକାର ସାବ୍ୟସ୍ତ କରିଛନ୍ତି। ଆସନ୍ତା ଜୁନ୍ ୩ ତାରିଖରେ ଭୋଟ ଗଣତି ହେବ। ତେବେ ସେହିଦିନ ମତଦାତା କାହା ମୁଣ୍ଡରେ କଳସ ଢାଳିଛନ୍ତି ତାହା ଜଣାପଡ଼ିବ।
