କୋଚି: ପ୍ରତ୍ୟେକ କାର୍ଯ୍ୟ ପାଇଁ ମନରେ ଆଗ୍ରହ ରହିବା ଦରକାର। ଏହା ଦ୍ୱାରା କାର୍ଯ୍ୟଗୁଡ଼ିକ ଅତି ଉତ୍ତମ ଭାବେ ସମ୍ପାଦିତ ହୋଇଥାଏ। କୋଚିର ରାଧାମଣୀ ଅମ୍ମ। ୭୨ ବର୍ଷରେ ପାଦ ଥାପିସାରିଲେଣି। କିନ୍ତୁ ତାଙ୍କ କାର୍ଯ୍ୟ ଦକ୍ଷତା କଥା କହିଲେ, ଯେ କେହି ବି ଆଶ୍ଚର୍ଯ୍ୟ ହୋଇଯିବେ। ରୋଡ୍ ରୋଲର, ଜେସିବି, ବସ୍, କାର୍, ବାଇକ୍ ପରି ୧୧ ପ୍ରକାର ଗାଡ଼ି ଚଲାପାରନ୍ତି ରାଧାମଣୀ। ୧୯୮୧ରେ ସେ ଡ୍ରାଇଭିଂ ଲାଇସେନ୍ସ ପ୍ରାପ୍ତ କରିଥିଲେ। ଗାଡ଼ି ଚାଳନା ଦିଗରେ ତାଙ୍କର ରୁଚି ଥିବା କାରଣରୁ ଏହା ସମ୍ଭବ ହୋଇଥିବା ରାଧାରାଣୀ କହିଛନ୍ତି। ବର୍ତ୍ତମାନ ତାଙ୍କପାଖରେ ସବୁ ପ୍ରକାର ଗାଡ଼ି ଚଲାଇବାର ଲାଇସେନ୍ସ ରହିଛି। ରାଧାରାଣୀଙ୍କ ସ୍ବାମୀ କୋଚିରେ ଏ-ଜେଟ୍ ନାମରେ ଏକ ଡ୍ରାଇଭିଂ ସ୍କୁଲ ଚଲାଉଥିଲେ। ସ୍ବାମୀଙ୍କ କହିବା ଅନୁସାରେ ରାଧାରାଣୀ କାର୍ ଚଲାଇବା ଶିଖିଲେ। କିନ୍ତୁ ସେ ସମୟରେ ଗାଡ଼ି ଚାଳନା ପ୍ରତି ତାଙ୍କର ଆଗ୍ରହ ନ ଥିଲା। ୨୦୦୪ରେ ଯେତେବେଳେ ସ୍ବାମୀଙ୍କର ମୃତ୍ୟୁ ଘଟିଲା ସେ ସମୟରେ ପରିବାର ଚଳାଇବା ପାଇଁ ରାଧାରାଣୀ ଡ୍ରଇଭିଂ ସ୍କୁଲ ବୁଝାବୁଝି ଆରମ୍ଭ କଲେ। ବର୍ତ୍ତମାନ ରାଧାରାଣୀ ଭାରି ଯାନ ଚଳାଇବାର ପ୍ରଶିକ୍ଷଣ ମଧ୍ୟ ଦେଉଛନ୍ତି। ଡ୍ରାଇଭିଂ କ୍ଷେତ୍ରରେ ପାରଦର୍ଶିତା ହାସଲ କରିବା ପରେ ରାଧାରାଣୀ ଏବେ ଅଟୋ ମୋବାଇଲ ଇଞ୍ଜିନିୟରିଂ କ୍ଷେତ୍ରରେ ଡିପ୍ଲୋମା କରୁଛନ୍ତି।
