ସିମ୍ଲା,୨୦।୪: ନିର୍ବାଚନ ପାଖେଇ ଆସିଲେ ଦେବାଳୟମାନଙ୍କରେ ରାଜନେତା ମାନଙ୍କର ଭିଡ଼ ଜମିଥାଏ। ଦେବଦେବୀଙ୍କ ଆଶୀର୍ବାଦ ଲାଭ କଲେ ସହଜରେ ନିର୍ବାଚନ ବୈତରଣୀ ଅବିଳମ୍ବେ ପାରି ହୋଇଯିବେ ବୋଲି ସେମାନଙ୍କର ବିଶ୍ୱାସ। ସେହି ଅନୁସାରେ ଲୋକ ସଭା ନିର୍ବାଚନ ସମୟରେ ହିମାଚଳର ରାମଲୋକ ମନ୍ଦିର ଚର୍ଚ୍ଚାରେ ରହିଆସିଛି। ନିର୍ବାଚନୀ ବିଗୁଲ ବାଜିବା ପରେ ଏବେ ପର୍ଯ୍ୟନ୍ତ ଦେଶର ବିଭିନ୍ନ ସ୍ଥାନରୁ ୭୫ ନେତା ଓ ଆଶାୟୀ ପ୍ରାର୍ଥୀ ନିଜର ବାଜିମାତ୍୍ ପାଇଁ ଏଠାକୁ ଆସିଥିବା ଜଣାପଡ଼ିଛି। ହିମାଚଳ ପ୍ରଦେଶ ସୋଲାନରେ ଥିବା ରାମଲୋକ ମନ୍ଦିର ଦର୍ଶନ ପାଇଁ କଂଗ୍ରେସ ହେଉ କି ଭାଜପା ବା ଅନ୍ୟ ଦଳ, ନିର୍ବାଚନରେ ସଫଳତା ପାଇବା ପାଇଁ ସମସ୍ତେ ଏଠାକୁ ଆସିଥିବା ସୂଚନା ମିଳିଛି। ସାଧୁ ବ୍ରିଜ ନିକଟରେ ଥିବା ଏହି ମନ୍ଦିରରେ ଶ୍ରୀରାମ, ଲକ୍ଷ୍ମଣ ଓ ସୀତାଙ୍କ ଆବକ୍ଷ ମୂର୍ତ୍ତି ରହିଛି। ଯେ କୌଣସି ଭକ୍ତର ଯେତେ ବଡ଼ ବିପଦ ଥିଲେ ବି ଏହି ମନ୍ଦିରରେ ଯଜ୍ଞ କଲେ ତାଙ୍କର ସବୁ ସମସ୍ୟା ଦୂର ହେବା ସହ ମନସ୍କାମନା ପୂରଣ ହୋଇଥାଏ ବୋଲି ବିଶ୍ୱାସ ରହିଛି। ଫଳରେ ଏଠାରେ ରାଜନୈତିକ ଦଳଙ୍କ ସମାଗମ ହୋଇଛି। ତେବେ ଏଠାକୁ ଆସିଥିବା ୭୫ ନେତାଙ୍କ ନାମ ମନ୍ଦିରର ରେଜିଷ୍ଟରରେ ରେକର୍ଡ କରାଯାଇଛି। ଗତ ଏକ ମାସ ଭିତରେ ବିହାରରୁ ମନୋଜ ତିଓ୍ବାରି, ଝାଡ଼ଖଣ୍ଡରୁ ଅର୍ଜୁନ ମୁଣ୍ଡା, ବାବୁଲାଲ ମାରାଣ୍ଡି, ବିହାରର ଅଶ୍ୱିନୀ ଚୌବେ, ଉତ୍ତରପ୍ରଦେଶରୁ ସଞ୍ଜୀବ ବଲିଆନ ଓ କୃଷ୍ଣା ରାଜ, ନୂଆଦିଲ୍ଲୀରୁ ଜୟପ୍ରକାଶ ଅଗ୍ରଓ୍ବାଲ, ମହାବଲ ମିଶ୍ରା ଓ ନବଜୋତ ସିଂ ସିଦ୍ଧୁଙ୍କ ଭଳି ବହୁ ରାଜନେତା ଏହି ମନ୍ଦିରରେ ଅନୁଷ୍ଠାନ କରିଥିବା ଜଣାପଡ଼ିଛି।