କାଲିଫର୍ନିଆ, ୨୯।୧୨: ଲିଙ୍ଗଗତ ଭେଦଭାବ ମାମଲାର ସମାଧାନ ପାଇଁ ଭିଡିଓ ଗେମ ନିର୍ମାତା ରୟଟ ଗେମ୍ସ ପକ୍ଷରୁ କମ୍ପାନୀରେ କାର୍ଯ୍ୟ କରୁଥିବା ୨,୦୦୦ ମହିଳା କର୍ମଚାରୀଙ୍କୁ ୭୫୦ କୋଟି ଟଙ୍କା କ୍ଷତିପୂରଣ ଦେବାକୁ ରାଜି ହୋଇଛି। ଏବେ କମ୍ପାନୀରେ କାର୍ଯ୍ୟ କରୁଥିବା ତଥା ପୂର୍ବତନ ମହିଳା କର୍ମଚାରୀମାନେ ୨୦୧୮ରେ କମ୍ପାନୀ ବିରୋଧରେ ମକଦ୍ଦମା ଦାୟର କରିଥିଲେ। ପୂର୍ବରୁ ଏହି ମାମଲାକୁ ମାତ୍ର ୭୫ କୋଟି ଟଙ୍କାରେ ସମାଧାନ କରିବାର ପ୍ରୟାସ କରାଯାଇଥିଲା। ଏନେଇ କାଲିଫର୍ନିଆର ଦୁଇଟି କର୍ମଚାରୀ ଏଜେନ୍ସି ସମାଧାନ ବନ୍ଦ କରିବାକୁ ହସ୍ତକ୍ଷେପ କଲେ ଯାହା ଦ୍ୱାରା ମହିଳାମାନଙ୍କୁ ଉଚିତ କ୍ଷତିପୂରଣ ପ୍ରଦାନ କରାଯାଇପାରିବ।
ଶେଷରେ ଚାଇନାର ଟେକ ଜଏଣ୍ଟ ଟେନ୍ସେଣ୍ଟ ଦ୍ୱାରା ପରିଚାଳିତ ରାୟଟ ଗେମ୍ସ୍କୁ ମୁଣ୍ଡ ନୋଇବାକୁ ପଡ଼ିଛି। ନଭେମ୍ବର ୨୦୧୪ରୁ କାର୍ଯ୍ୟ କରୁଥିବା କର୍ମଚାରୀଙ୍କୁ ପ୍ରାୟ ୬୦୦ କୋଟି ଟଙ୍କା ଏବଂ ଆଟର୍ଣ୍ଣି ଫି ସମେତ ଅନ୍ୟାନ୍ୟ ଖର୍ଚ୍ଚ ପାଇଁ ୧୫୦ କୋଟି ଟଙ୍କା ପ୍ରଦାନ କରାଯିବ ବୋଲି କମ୍ପାନୀ ପକ୍ଷରୁ କୁହାଯାଇଛି।
କମ୍ପାନୀ ପକ୍ଷରୁ କୁହାଯାଇଛି ଯେ, କର୍ମଚାରୀଙ୍କ ବେତନ ଏବଂ ଚାକିରି ସମ୍ବନ୍ଧୀୟ କାର୍ଯ୍ୟରେ ଲିଙ୍ଗଗତ ସମାନତାର ବିଶ୍ଳେଷଣ ତୃତୀୟ ପକ୍ଷଙ୍କ ଦ୍ୱାରା କରାଯିବ।
କାଲିଫର୍ନିଆର ଫେୟାର ଏମ୍ପ୍ଲୟମେଣ୍ଟ ଆଣ୍ଡ ହାଉସିଂ ବିଭାଗର ନିର୍ଦ୍ଦେଶକ କଓ୍ବେିନ କିଶଙ୍କ ଅନୁଯାୟୀ, ଲସ ଆଞ୍ଜେଲସ ସୁପ୍ରିମକୋର୍ଟ ଏହି ବୁଝାମଣାକୁ ଅନୁମତି ପ୍ରଦାନ କରିବା ପରେ ଖେଳ ଜଗତ ସମେତ ସମସ୍ତ ଉଦ୍ୟୋଗ କ୍ଷେତ୍ରରେ ସମାନ ଦରମା ଏବଂ ଲିଙ୍ଗମୁକ୍ତ କାର୍ଯ୍ୟକ୍ଷେତ୍ର ସ୍ଥାପନ ପଥ ସହଜ ହେବ।
