ଭୁବନେଶ୍ୱର,୧୨।୧୦(ବ୍ୟୁରୋ): ଆସନ୍ତା ଖରିଫ ଓ ରବି ଋତୁରେ ରାଜ୍ୟ ସରକାର ୭୭ ଲକ୍ଷ ମେଟ୍ରିକ ଟନ ଧାନ (୫୨ ଲକ୍ଷ ମେଟ୍ରିକ ଟନ ଚାଉଳ) ସଂଗ୍ରହ କରିବାକୁ ଲକ୍ଷ୍ୟ ଧାର୍ଯ୍ୟ କରିଛନ୍ତି। ଖରିଫରେ ୬୩ ଓ ରବି ଋତୁରେ ୧୪ ଲକ୍ଷ ମେଟ୍ରିକ ଟନ ଧାନ ସଂଗ୍ରହ କରାଯିବ। ଚାଷୀଙ୍କୁ କେନ୍ଦ୍ର ସରକାର ଧାର୍ଯ୍ୟ କରିଥିବା କୁଇଣ୍ଟାଲ ପିଛା ସର୍ବନିମ୍ନ ସହାୟକ ମୂଲ୍ୟ(ଏମ୍ଏସ୍ପି) ୧୯୪୦ ଟଙ୍କା ହିସାବରେ ପ୍ରଦାନ କରାଯିବ। ଅନଲାଇନ ପଞ୍ଜୀକରଣ ସହ ଚାଷୀଙ୍କ ଆକାଉଣ୍ଟକୁ ୨୪ ଘଣ୍ଟା ମଧ୍ୟରେ ଅନଲାଇନ ଜରିଆରେ ଏମ୍ଏସପି ପ୍ରଦାନ କରାଯିବ। ଖାଦ୍ୟ ଓ ସଂଗ୍ରହଣ ନୀତି (ଫୁଡ୍ ଆଣ୍ଡ ପ୍ରୋକ୍ୟୁରମେଣ୍ଟ ପଲିସି) ୨୦୨୧-୨୨କୁ କ୍ୟାବିନେଟ ଅନୁମୋଦନ କରିଛି। ଅଧିକ ସଂଖ୍ୟାରେ ମହିଳା ସ୍ବୟଂ ସହାୟକ ଗୋଷ୍ଠୀ(ଏସ୍ଏଚ୍ଜି)ଙ୍କୁ ଧାନ ସଂଗ୍ରହରେ ନିୟୋଜିତ କରାଯିବ। ଏହାଛଡ଼ା ପ୍ରାଥମିକ ସମବାୟ ସମିତି, ଲାମ୍ପସ୍ ଏବଂ ପାଣିପଞ୍ଚାୟତ ଜରିଆରେ ଧାନ ସଂଗ୍ରହ ହେବ। ଖରିଫ ଧାନ ସଂଗ୍ରହ ୨୦୨୧ ନଭେମ୍ବରୁ ଆରମ୍ଭ ହେବାକୁ ଥିବା ବେଳେ ରବି ଧାନ ସଂଗ୍ରହ ୨୦୨୨ ମେ ଓ ଜୁନ ମଧ୍ୟରେ ଆରମ୍ଭ ହେବ।
ଲୋକାୟୁକ୍ତଙ୍କ ଦ୍ୱାରା ପ୍ରକାଶିତ ବାର୍ଷିକ ରିପୋର୍ଟ-୨୦୨୦କୁ କ୍ୟାବିନେଟ ଅନୁମୋଦନ କରିଛି। ଏହାକୁ ଆସନ୍ତା ବିଧାନସଭାରେ ଉପସ୍ଥାପନ କରାଯିବ। ଓଡ଼ିଶା ସାଧାରଣ ଖାଉଟି ବଣ୍ଟନ ଆଦେଶକୁ ସଂଶୋଧନ କରାଯାଇଛି। ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ଦିଆଯାଇଥିବା ଏହି ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି।