ନୂଆଦିଲ୍ଲୀ,୭।୯: ଆତ୍ମହତ୍ୟା କରିବା ପୂର୍ବରୁ କେହି କେହି ଏହାର କାରଣ ଦର୍ଶାଇ ସୁଇସାଇଡ୍ ନୋଟ ଲେଖିଛନ୍ତି। ତେବେ ୭୭ ପୃଷ୍ଠାର ସୁଇସାଇଡ୍ ନୋଟ୍ ଲେଖିବା ପ୍ରଥମ ଘଟଣା। ଦିଲ୍ଲୀର ଜଣେ ୨୫ ବର୍ଷୀୟ ଯୁବକ ଜୀବନ ହାରିବା ପୂର୍ବରୁ ଏଭଳି ଏକ ଲମ୍ବା ପତ୍ର ଲେଖିଛନ୍ତି। କେବଳ ସେତିକି ନୁହେଁ ସେ ୩ ଦିନ ପୂର୍ବରୁ ନିଜ ମାଆଙ୍କୁ ହତ୍ୟା କରି ଘରେ ରଖିଥିଲେ। ଦୁର୍ଗନ୍ଧ ନ ବାହାରିବା ପାଇଁ ସେ ଘରେ ଅତର ସ୍ପ୍ରେ କରିଥିଲେ ଓ ଗୀତାପାଠ କରିଥିଲେ। ରୋହିଣୀ ଅଞ୍ଚଳରେ ରହୁଥିବା କ୍ଷିତିଜଙ୍କ ଘରୁ ଦୁର୍ଗନ୍ଧ ଆସିବାରୁ ରବିବାର ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ତଦନ୍ତରୁ ଜଣାପଡ଼ିଥିଲା ଯେ ଗତ ଗୁରୁବାର କ୍ଷିତିଜ ତାଙ୍କ ମାଆଙ୍କୁ ହତ୍ୟା କରିଥିଲେ। ରବିବାର ସକାଳ ୭ଟାରେ ସେ ତାଙ୍କର ଜଣେ ସାଙ୍ଗଙ୍କୁ ଏ ସମ୍ପର୍କରେ ସୂଚନା ଦେବା ସହ ନିଜେ ଆତ୍ମହତ୍ୟା କରିବାକୁ ଯାଉଥିବା ଟେଲିଫୋନ୍ ଯୋଗେ କହିଥିଲେ। ସେ ଅବସାଦରେ ଥିଲେ ଏବଂ ମାଆଙ୍କୁ ହତ୍ୟା କରିବା ସମ୍ପର୍କରେ ୭୭ ପୃଷ୍ଠାର ସୁଇସାଇଡ୍ ନୋଟରେ ସ୍ବୀକାର କରିଛନ୍ତି। ବେରୋଜଗାରୀ କାରଣରୁ ସେ ଆତ୍ମହତ୍ୟା କରିବାକୁ ଚାହିଁଲେ ବୋଲି ସେଥିରେ ଉଲ୍ଲେଖ କରିଛନ୍ତି।