ଡେରାବିଶ, ୧୭ା୧୧(ସ୍ବ.ପ୍ର.): ମହାମାରୀ କରୋନା ସମୟରେ ଛାତ୍ରୀଛାତ୍ରଙ୍କୁ କରୋନା ବିପଦରୁ ରକ୍ଷା ପାଇଁ ରାଜ୍ୟର ସମସ୍ତ ବିଦ୍ୟାଳୟକୁ ବନ୍ଦ କରି ଦିଆଯାଇଥିଲା। ପରବର୍ତ୍ତୀ ଅବସ୍ଥାରେ କରୋନା କଟକଣା ହଟିବା ପରେ ଶିକ୍ଷାନୁଷ୍ଠାନଗୁଡ଼ିକ ପୁନର୍ବାର ଖୋଲିଥିଲା। ତେବେ ପ୍ରାଥମିକ ବିଦ୍ୟାଳୟର ଛାତ୍ରୀଛାତ୍ରଙ୍କ ଶିକ୍ଷାଦାନ ବ୍ୟବସ୍ଥାକୁ ସୁଦୃଢ଼ କରିବାକୁ ଦୁଇବର୍ଷର ପାଠ୍ୟକ୍ରମକୁ ଛାତ୍ରୀଛାତ୍ରଙ୍କୁ ଶିକ୍ଷା ଦେବା ପାଇଁ ଶିକ୍ଷଣ ପରିପୂରଣ ଯୋଜନା ମାଧ୍ୟମରେ ବିଭିନ୍ନ ବିଦ୍ୟାଳୟକୁ ଏକ ବେସରକାରୀ ସଂସ୍ଥା ମାଧ୍ୟମରେ ଗଣଶିକ୍ଷା ବିଭାଗ ପକ୍ଷରୁ ପୁସ୍ତକ ଯୋଗାଇ ଦେବାର ବ୍ୟବସ୍ଥା କରାଯାଇଥିଲା। ଏହିକ୍ରମରେ କେନ୍ଦ୍ରାପଡ଼ା ଜିଲା ଡେରାବିଶ ଶିକ୍ଷା ସର୍କଲ ଅଧୀନରେ ଥିବା ୨୬ଟି ପଞ୍ଚାୟତର ୧୭୪ଟି ପ୍ରାଥମିକ ବିଦ୍ୟାଳୟ ରହିଛି। ପ୍ରତ୍ୟେକ ବିଦ୍ୟାଳୟକୁ ସରକାରଙ୍କ ପକ୍ଷରୁ ଶିକ୍ଷାର୍ଥି ଅଭ୍ୟାସ ପୁସ୍ତିକା ଅକ୍ଟୋବର ୧୦ ତାରିଖ ସୁଦ୍ଧା ଯୋଗାଇ ଦିଆଯିବା କଥା। ତେବେ ଅକ୍ଟୋବର ୧୧ ତାରିଖରୁ ଶିକ୍ଷଣ ପରିପୂରଣ ଯୋଜନାରେ ୫୦ଦିନ ପାଇଁ ପ୍ରତ୍ୟେକ ବିଦ୍ୟାଳୟକୁ ଯୋଗାଇ ଦିଆଯାଇଥିବା ଶିକ୍ଷାର୍ଥୀ ଅଭ୍ୟାସ ପୁସ୍ତିକାକୁ ଛାତ୍ରୀଛାତ୍ରଙ୍କୁ ପଢ଼ାଇ ପ୍ରତି ୨୫ ଦିନ ଅନ୍ତରରେ କରୋନା ସମୟରେ କ୍ଷତି ହୋଇଥିବା ପାଠପଢ଼ା ଛାତ୍ରୀଛାତ୍ରଙ୍କ ପାଇଁ କେତେ ସମୃଦ୍ଧ ହୋଇଛି ତାହାର ଆକଳନ କରାଯିବା କଥା। ଚଳିତ ମାସ ୧୭, ୧୮ ଓ ୧୯ ତାରିଖରେ ବ୍ଲକରେ ୨୫ ଦିନିଆ ଆକଳନ ବ୍ୟବସ୍ଥା କରାଯିବ। ତେବେ ଏହି ଆକଳନ କାର୍ଯ୍ୟକ୍ରମରୁ ୭୭ଟି ବିଦ୍ୟାଳୟ ବାଦ ପଡ଼ିଛି। ଏ ବିଷୟରେ ବିଆରସିସି (ସାଧନ କେନ୍ଦ୍ର ସଂଯୋଜକ) ନରହରୀ ସୂତାରଙ୍କ ସୂଚନା ଅନୁଯାୟୀ, ଏହି ବିଦ୍ୟାଳୟଗୁଡ଼ିକୁ ଏ ଯାଏ ଅଭ୍ୟାସ ପୁସ୍ତିକା ଦିଆଯାଇନାହିଁ। ଯେଉଁଥିପାଇଁ ୨୫ ଦିନିଆ ଆକଳନ ବ୍ୟବସ୍ଥା ୯୭ଟି ବିଦ୍ୟାଳୟରେ କରାଯାଉଥିବା ବେଳେ ଅବଶିଷ୍ଟ ବିଦ୍ୟାଳୟ ପରବର୍ତ୍ତୀ ଅବସ୍ଥାରେ ପୁସ୍ତିକା ଯୋଗାଇ ଦିଆଯିବା ପରେ ଆକଳନ କାର୍ଯ୍ୟକ୍ରମ କରାଯିବ ବୋଲି ସୂତାର କହିଛନ୍ତି। ତେବେ କରୋନା ସମୟର ଶିକ୍ଷାକୁ ଛାତ୍ରୀଛାତ୍ରଙ୍କ ପୂରଣ ପାଇଁ ପରିପୂରଣ ଯୋଜନା ମାଧ୍ୟମରେ ଗଣଶିକ୍ଷା ବିଭାଗ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଥିବା ବେଳେ ବ୍ଲକରେ ଏହାର କାହିଁକି ବ୍ୟତିକ୍ରମ ହେଲା ବୋଲି ଶିକ୍ଷାବିତ୍ ଅଧ୍ୟାପକ ଗୋଲଖ ଚନ୍ଦ୍ର ମହାଭୋଇ ପ୍ରଶ୍ନ କରିଛନ୍ତି। ବାଦ ପଡ଼ିଥିବା ୭୭ ଟି ବିଦ୍ୟାଳୟର ଛାତ୍ରୀଛାତ୍ରଙ୍କ ଅଭିଭାବକମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି।