ଭୁବନେଶ୍ୱର,୨୦ା୧୨(ବ୍ୟୁରୋ): ରାଜଧାନୀର ଅନେକ ସ୍ଥାନରେ ରାସ୍ତାପାର୍ଶ୍ୱରେ ପରିତ୍ୟକ୍ତ ଅବସ୍ଥାରେ ଅନେକ ଗାଡ଼ି ପଡ଼ିରହୁଛି। ରାସ୍ତାର ଉଭୟ ପାର୍ଶ୍ୱରେ ଗାଡ଼ିଗୁଡିକ ପଡ଼ିରହୁଥିବାରୁ ବହୁ ଜାଗା ମାଡ଼ିବସୁଛି, ଯାହାକି ଟ୍ରାଫିକ ସମସ୍ୟା ସୃଷ୍ଟି କରୁଛି। ଏଥିପାଇଁ ଅନେକ ଦୁର୍ଘଟଣା ଘଟିବାର ମଧ୍ୟ ନଜିର ରହିଛି। ଏଭଳି ସମସ୍ୟାକୁ ନେଇ ବହୁବାର ଅଭିଯୋଗ ହେବାପରେ ଏନେଇ କମିଶନରେଟ୍ ପୋଲିସର ଚେତା ପଶିଛି। କମିଶନରେଟ ପୋଲିସ ପକ୍ଷରୁ ଶନିବାରଠାରୁ ଏକ ୭ଦିନିଆ ସ୍ପେଶାଲ୍ ଡ୍ରାଇଭ ଆରମ୍ଭ କରାଯାଇଛି ବୋଲି ଟ୍ରାଫିକ ଡିସିପି ସୌମ୍ୟା ମିଶ୍ର ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ସେ କହିଛନ୍ତି, ଏହି ସ୍ପେଶାଲ ଡ୍ରାଇଭରେ ରାସ୍ତା ପାର୍ଶ୍ୱରେ ଦୀର୍ଘଦିନ ଧରି ପଡ଼ିରହିଥିବା ଗାଡିଗୁଡ଼ିକୁ ହଟାଇନେବାକୁ ମାଲିକମାନଙ୍କୁ ଡାକବାଜି ଯନ୍ତ୍ର ମାଧ୍ୟମରେ ସୂଚନା ଦିଆଯାଉଛି। ପ୍ରାଥମିକଭାବେ ସେମାନଙ୍କୁ ପୋଲିସ ପକ୍ଷରୁ ସଚେତନ କରାଯାଉଛି। ଏହାସତ୍ତ୍ୱେ ଯଦି ଗାଡ଼ିମାଲିକ ଅମାନିଆ ହୋଇ ରାସ୍ତାପାର୍ଶ୍ୱରୁ ଗାଡ଼ି ନ ଉଠାନ୍ତି, ତେବେ ପୋଲିସ କ୍ରେନ୍ ସାହାଯ୍ୟରେ ଗାଡ଼ି ଉଠାଇନେଇ ଏକ ଡମ୍ପିଂ ୟାର୍ଡରେ ରଖିବ। ପରେ ସମ୍ପୃକ୍ତ ମାଲିକଙ୍କ ନିକଟରୁ ଜରିମାନା ଆଦାୟ କରାଯାଇ ଗାଡ଼ି ଛଡ଼ା ଯିବ। ଗାଡ଼ି ଉଠାଇବା ସମୟରେ ହୋଇଥିବା ସମସ୍ତ ଖର୍ଚ୍ଚ ସମ୍ପୃକ୍ତ ଗାଡ଼ିମାଲିକ ବହନ କରିବେ। ଏଥିସହ ମେଶିନ୍ ମାଧ୍ୟମରେ ଗାଡ଼ି ଉଠାଇବା ସମୟରେ ଗାଡ଼ିର ଯଦି କିଛି କ୍ଷତି ହୁଏ ସେଥିପ୍ରତି ପୋଲିସ ଦାୟୀ ରହିବ ନାହିଁ। ଡ୍ରାଇଭ୍ର ପ୍ରଥମ ଦିନରେ ବରମୁଣ୍ଡା, ରସୁଲଗଡ଼ ଏବଂ କଳ୍ପନା ଅଞ୍ଚଳରୁ ୩୦ରୁ ଊର୍ଦ୍ଧ୍ୱ ଗାଡ଼ି ଉଠାଯାଇଛି। ଆଗାମୀ ଦିନରେ ଏହି ଡ୍ରାଇଭକୁ ବ୍ୟାପକ କରାଯିବା ସହ ସହରର ସମସ୍ତ ସ୍ଥାନରୁ ଏଭଳି ବେଆଇନ ପାର୍କିଂ ଉଚ୍ଛେଦ କରାଯିବ। ଡ୍ରାଇଭର ପ୍ରଥମ ଦିନରେ ଟ୍ରାଫିକ ପୋଲିସ ଫୋକସ୍ରେ ବରମୁଣ୍ଡା ବସ୍ ଷ୍ଟାଣ୍ଡ ରହିଥିଲା। ବସ୍ଷ୍ଟାଣ୍ଡ ସାମ୍ନା ରାସ୍ତାରେ ମାସମାସ ଧରି ଅଚଳ ଅନେକ ବସ୍ ପରିତ୍ୟକ୍ତ ଭାବେ ପଡ଼ିରହିଛି। ବସ୍ଗୁଡିକୁ ପୋଲିସ ଉଠାଇନେବା ସମୟରେ କିଛି ସମୟ ପାଇଁ ବସ୍ ମାଲିକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା।