7th Pay Commission: କେନ୍ଦ୍ରୀୟ କର୍ମଚାରୀମାନଙ୍କ ପାଇଁ ଖୁସିଖବର, ଏହି ଦିନ ବଢିବ DA

ନୂଆଦିଲ୍ଲୀ,୧୭।୩: କେନ୍ଦ୍ର ସରକାର ଖୁବଶୀଘ୍ର ସରକାରୀ କର୍ମଚାରୀଙ୍କୁ ଏକ ବଡ଼ ଉପହାର ଦେଇପାରନ୍ତି। ଆସନ୍ତା ସପ୍ତାହ ସୁଦ୍ଧା, ସରକାର କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ମହଙ୍ଗା ଭତ୍ତା (DA) ଏବଂ ମହଙ୍ଗା ରିଲିଫ (DR) ବୃଦ୍ଧି କରିପାରନ୍ତି। ଯଦି ଏହି ଘୋଷଣା କରାଯାଏ, ତେବେ ୧.୨ କୋଟି କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀ ଉପକୃତ ହେବେ। ଏହି ବୃଦ୍ଧି ସପ୍ତମ ବେତନ କମିଶନ ଅଧୀନରେ ଦିଆଯିବ, ଯାହା ଲକ୍ଷ ଲକ୍ଷ ସରକାରୀ କର୍ମଚାରୀ ଏବଂ ପେନସନଭୋଗୀଙ୍କୁ ଲାଭ ଦେବ। ଆସନ୍ତୁ ଜାଣିବା ଏଥର ଡିଏ କେତେ ବୃଦ୍ଧି ପାଇପାରେ ଏବଂ ଦରମା ଉପରେ ଏହାର କ’ଣ ପ୍ରଭାବ ପଡ଼ିବ।

ସୂତ୍ର ଅନୁସାରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା କ୍ୟାବିନେଟ ବୈଠକରେ ଡିଏ ବୃଦ୍ଧି ନିଷ୍ପତ୍ତି ନିଆଯାଇପାରେ। ସାଧାରଣତଃ କ୍ୟାବିନେଟ ବୈଠକ ବୁଧବାର ଅନୁଷ୍ଠିତ ହୁଏ, ତେଣୁ କର୍ମଚାରୀମାନେ ଏହି ସପ୍ତାହର ଯେକୌଣସି ଦିନ ଖୁସି ଖବର ପାଇପାରିବେ।

ରିପୋର୍ଟ ଅନୁଯାୟୀ, ଏଥର ସରକାର ଡିଏ ୨ ପ୍ରତିଶତ ବୃଦ୍ଧି କରିପାରନ୍ତି। ବର୍ତ୍ତମାନ ସରକାରୀ କର୍ମଚାରୀମାନେ ୫୩ ପ୍ରତିଶତ ଡିଏ ପାଉଛନ୍ତି। ୨ ପ୍ରତିଶତ ବୃଦ୍ଧି ପରେ ଏହା ୫୫ ପ୍ରତିଶତ ହୋଇଯିବ। ଡିଏ ବୃଦ୍ଧି ୧ ଜାନୁଆରୀ, ୨୦୨୫ ରୁ କାର୍ଯ୍ୟକାରୀ ହେବ ବୋଲି ବିବେଚନା ହେବ ଅର୍ଥାତ୍‌ କର୍ମଚାରୀମାନେ ମଧ୍ୟ ସେମାନଙ୍କର ବକେୟା ପାଉଣା ପାଇବେ। ଶେଷ ଥର ପାଇଁ, ଜୁଲାଇ ୨୦୨୪ରେ, ସରକାର ଏହାକୁ ୩% ବୃଦ୍ଧି କରିଥିଲେ, ଯାହା ଦ୍ୱାରା ଡିଏ ୫୦% ରୁ ୫୩% କୁ ବୃଦ୍ଧି କରାଯାଇଥିଲା।