ଅନୁଗୋଳ ଅଫିସ, ୪।୧: ଅନୁଗୋଳ ଜିଲା ଶିଶୁ ସୁରକ୍ଷା ଅଧିକାରୀ ଗୌରୀ ଶଙ୍କର ବେହେରା ସୋମବାର ଆଠମଲ୍ଲିକ ବ୍ଲକ ଗସ୍ତରେ ଯାଇ ଯତ୍ନ ଓ ସୁରକ୍ଷା ଆବଶ୍ୟକ କରୁଥିବା ୮ ଶିଶୁଙ୍କୁ ଭେଟି ଥଇଥାନ ବ୍ୟବସ୍ଥା ନିମନ୍ତେ ପଦକ୍ଷେପ ନେଇଛନ୍ତି। ଗୋଟଏ ପରିବାରର ମା’ ବାପା ଆଜୀବନ କାରାଦଣ୍ଡରେ ଦଣ୍ଡିତ ହୋଇଥିବାରୁ ସେମାନଙ୍କ ୪ ପିଲା ବୃଦ୍ଧା ଜେଜେ ମା’ଙ୍କ ନିକଟରେ ଆଶ୍ରୟ ନେଇଛନ୍ତି। ଏହି ଖବରପାଇ ଜିଲା ଶିଶୁ ସୁରକ୍ଷା ଅଧିକାରୀ ବେହେରା ଉକ୍ତ ଘରକୁ ଯାଇ ପିଲାଙ୍କୁ ଭେଟିଥିଲେ। ତେବେ ପିଲାଙ୍କ ମାଉସୀ ସେମାନଙ୍କୁ ପାଖରେ ରଖିବାକୁ ଆଗ୍ରହ ଦେଖାଇଥିଲେ। ପିଲାମାନେ ମଧ୍ୟ ଏଥିରେ ସହମତ ହୋଇଥିଲେ। ଏହି ପିଲାମାନଙ୍କୁ ସରକାରଙ୍କ ସମସ୍ତ ପ୍ରକାର ସହାୟତା ଯୋଗାଇ ଦିଆଯିବାର ବ୍ୟବସ୍ଥା କରିଥିଲେ। ସେହିପରି ଅନ୍ୟ ୨ ପରିବାରର ୪ ଶିଶୁ ମା’ ବାପାଙ୍କୁ ହରାଇଥିବାରୁ ସେମାନଙ୍କୁ ଭେଟି ପାଠପଢ଼ା ପାଇଁ ସହାୟତା କରିବାକୁ ପଦକ୍ଷେପ ନେଇଥିଲେ। ସମସ୍ତ ପିଲା ଜାତିଗତ ପ୍ରମାଣପତ୍ର ପାଇବା ପରେ ନିକଟସ୍ଥ ଜାତି ଓ ଜନଜାତି ବିଭାଗ ଆବାସିକ ବିଦ୍ୟାଳୟରେ ସେମାନଙ୍କ ନାମ ଲେଖାଯିବ। ରାଶନ କାର୍ଡରେ ନାମ ନ ଥିବା ଶିଶୁଙ୍କର ତୁରନ୍ତ ଅନ୍ତର୍ଭୁକ୍ତ କରାଯିବାକୁ ବିଭାଗୀୟ ଅଧିକାରୀ ତଥା ସ୍ଥାନୀୟ ବିଡିଓଙ୍କ ସହ ଆଲୋଚନା କରିଥିଲେ। ବେହେରାଙ୍କ ଏହି ପରିଦର୍ଶନ ବେଳେ ଆଠମଲ୍ଲିକ ଏନ୍ଏସି ଅଧ୍ୟକ୍ଷା ଆଶା କୁମାରୀ ସାହୁ, କମ୍ପଲା ସରପଞ୍ଚ ସୁଧୀର ସେଠୀ, ସମିତି ସଭ୍ୟା ମାମୀ ସେଠୀ, ଆଶା ଦିଦି ପ୍ରମୁଖ ଉପସ୍ଥିତ ଥିଲେ।
