ବାଲେଶ୍ୱର ଅଫିସ, ୩ା୨: ବାଲେଶ୍ୱର ସହରସ୍ଥିତ କରଞ୍ଜିଆ ଅଞ୍ଚଳର ମୂରଲୀଧର ପାଣିଗ୍ରାହୀଙ୍କ ସ୍ତ୍ରୀ ସୁଚିସ୍ମିତା ଗତ ଜାନୁୟାରୀ ୨୬ତାରିଖରେ ଏକ ଘରୋଇ ଡାକ୍ତରଖାନାରେ ଏକ ଶିଶୁକନ୍ୟାକୁ ଜନ୍ମ ଦେଇଥିଲେ। ଜନ୍ମ ହେବାର ଦୁଇ ଘଣ୍ଟା ପରେ ଶିଶୁକନ୍ୟାଟି ରକ୍ତବାନ୍ତି କରିବାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ସେଠାରେ ଅବସ୍ଥା ଗୁରୁତର ହେବାରୁ ଡାକ୍ତର ଶିଶୁକନ୍ୟାକୁ କଟକ ଶିଶୁଭବନକୁ ପଠାଇ ଦେଇଥିଲେ। ସେଠାରେ ବେଡ୍ ନ ମିଳିବାରୁ ପରିବାର ଲୋକେ ବାଧ୍ୟ ହୋଇ ଏକ ଘରୋଇ ଡାକ୍ତରଖାନାରେ ଶିଶୁକନ୍ୟାକୁ ଭର୍ତ୍ତି କରି ଚିକିତ୍ସା କରୁଛନ୍ତି। ଇତିମଧ୍ୟରେ ମା’ବାପା ୧ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରିସାରିଥିବା ବେଳେ ଶିଶୁକନ୍ୟା ରୋଗମୁକ୍ତ ହେବା ପାଇଁ ଲକ୍ଷାଧିକ ଟଙ୍କା ଆବଶ୍ୟକ ବୋଲି ଡାକ୍ତରଙ୍କ ପକ୍ଷରୁ କୁହାଯାଇଥିବା ମା’ ସୁଚିସ୍ମିତା କହିଛନ୍ତି।
ମୂରଲୀଧର ଏକ ଘରୋଇ ଶିକ୍ଷାନୁଷ୍ଠାନରେ କର୍ମଚାରୀ ଭାବେ କାର୍ଯ୍ୟରତ ଥିବା ବେଳେ ମା’ ସୁଚିସ୍ମିତା ଜଣେ ଗୃହିଣୀ। ମୂରଲୀଧରଙ୍କ ସ୍ବଳ୍ପ ଆୟରେ ପରିବାର ଚଳେ। ହଠାତ୍ ଝିଅର ଏଭଳି ରୋଗ ଦେଖାଦେବାରୁ ଲକ୍ଷାଧିକ ଟଙ୍କା ଖର୍ଚ୍ଚ ଓ ଅଧିକ ଟଙ୍କା ଆବଶ୍ୟକ ଥିବାରୁ ସେ ଭାଙ୍ଗିପଡ଼ିଛନ୍ତି। ଏପରି ପରିସ୍ଥିତିରେ ପରିବାର ଲୋକେ ଶିଶୁକନ୍ୟାର ଚିକିତ୍ସା ପାଇଁ ଅନୁରୋଧ କରି ସହାୟତା ଲୋଡ଼ିଛନ୍ତି। ସହାୟତା ପାଇଁ ଏହି ମୋବାଇଲ ନମ୍ବର ୮୧୧୭୦୦୪୭୫୭/ ୯୪୩୯୬୫୭୫୬୧ରେ ଯୋଗାଯୋଗ କରିବାକୁ ପରିବାର ପକ୍ଷରୁ ଅନୁରୋଧ କରାଯାଇଛି।