ରାମପୁର, ୯।୮: ନୂଆ ଜୀବନର ଅନେକ ସ୍ବପ୍ନ ନେଇ ଶାଶୁ ଘରେ ପହଞ୍ଚତ୍ଥିଲେ ନବବିବାହିତ କନ୍ୟା। ଏପରିକି ହାତରୁ ମେହେନ୍ଦି ମଧ୍ୟ ଲିଭି ନ ଥିଲା। ଅଗ୍ନିକୁ ସାକ୍ଷୀ ରଖି ସାତ ଜନ୍ମର ସାଥୀ ହେବା ଲାଗି ଯାହା ଭରସାରେ ଘରୁ ଗୋଡ଼ କାଢ଼ି ଆସିଥିଲା ଶେଷରେ ସିଏ ହିଁ ଧୋକା ଦେଲା। ବିବାହର ୮ ଦିନ ନ ବିତୁଣୁ ନବବିବାହିତ ସ୍ତ୍ରୀକୁ ଛାଡ଼ି ସ୍ବାମୀ ଆଉ ଜଣେ ଯୁବତୀ ସହ ଫେରାର୍ ହୋଇଯାଇଛନ୍ତି। ଏପରିକି ତାଙ୍କୁ ଆଉ ନ ଖୋଜିବା ଲାଗି ଯୁବକ ଜଣଙ୍କ ଫୋନ କରି ସ୍ତ୍ରୀଙ୍କୁ ଜଣାଇ ଦେଇଛନ୍ତି। ଏହି ଘଟଣାରେ ପୋଲିସ ଯୁବକଙ୍କ ନାମରେ ମାମଲା ରୁଜୁ କରି ଅନୁସନ୍ଧାନ ଆରମ୍ଭ କରିଛି।
ଏକ ଘଟଣା ଉତ୍ତର ପ୍ରଦେଶର ରାମପୁର ଜିଲାରେ ଘଟିଛି। ରାମପୁଜ ଜିଲାର ଅଜିମ ନଗର ଥାନା ଅନ୍ତର୍ଗତ ଏକ ଗ୍ରାମର ଜଣେ ଯୁବତୀଙ୍କ ବିବାହ ୮ ଦିନ ତଳେ ସିରାଜ ନାମକ ଜଣେ ଯୁବକଙ୍କ ସହ ହୋଇଥିଲା। କିନ୍ତୁ ରବିବାର ସକାଳେ ହଠାତ୍ ସିରାଜ ଘରୁ କେଉଁଆଡ଼େ ପଳାଇ ଯାଇଥିଲେ। ବହୁ ଖୋଜାଖୋଜି ପରେ ମଧ୍ୟ ପରିବାର ଲୋକ ସିରାଜର କୌଣସି ପତ୍ତା ପାଇ ନ ଥିଲେ। ଏହାପରେ ଦ୍ୱିପହର ସମୟରେ ସିରାଜ ନିଜ ସ୍ତ୍ରୀଙ୍କୁ ଫୋନ କରି ସମସ୍ତ ଘଟଣା ଜଣାଇ ଦେଇଥିଲେ। ନିଜର ପୂର୍ବତନ ପ୍ରେମିକା ସହ ସେ ପଳାଇ ଯାଇଛନ୍ତି ଏବଂ ତାଙ୍କୁ ଆଉ ନ ଖୋଜିବା ଲାଗି ସିରାଜ ଫୋନ ଯୋଗେ ସ୍ତ୍ରୀଙ୍କୁ କହିଥିଲେ। ସ୍ବାମୀଙ୍କଠାରୁ ଏ ସମସ୍ତ ଘଟଣା ଶୁଣିବା ପରେ ନବବିବାହିତ କନ୍ୟା ଚେତାଶୂନ୍ୟ ହୋଇଯାଇଥିଲେ। ସମସ୍ତ ଘଟଣା ସେ ତାଙ୍କ ପରିବାର ସଦସ୍ୟଙ୍କୁ ଜଣାଇବା ସହିତ ସ୍ବାମୀଙ୍କ ନାମରେ ଥାନାରେ ଅଭିଯୋଗ କରିଥିଲେ। ଏହି ଘଟଣାରେ ପୋଲିସ ସିରାଜ ଓ ତାଙ୍କ ସହଯୋଗୀ ଅନ୍ୟ ଜଣେ ଯୁବକଙ୍କ ନାମରେ ମାମଲା ରୁଜୁ କରି ଖୋଜିବା ଆରମ୍ଭ କରିଛି।